Jakija histaryčnyja abjekty ŭ Minsku adrestaŭrujuć u nastupnyja hady

Ahulnyja vydatki na prahramu pa krainie składajuć amal 2,3 młrd rubloŭ.

Dakumient uklučaje bolš za 30 mierapryjemstvaŭ, u tym liku papaŭnieńnie i aličboŭku fondaŭ muziejaŭ i biblijatek, vydańnie knih i vytvorčaść filmaŭ, a taksama padrychtoŭku naminacyjnych daśje na abjekty spadčyny i niemateryjalnyja prajavy tvorčaści čałavieka dla pradstaŭleńnia ŭ arhanizacyi JUNIESKA.

Akramia taho, dziaržprahrama praduhledžvaje restaŭracyju i rekanstrukcyju šeraha historyka-kulturnych kaštoŭnaściej pa ŭsioj Biełarusi. 

Tak, u 2027 hodzie płanujuć zaviaršyć restaŭracyju adzinaha kompleksu budynkaŭ Nacyjanalnaha mastackaha muzieja Biełarusi, jakaja startavała jašče ŭ 2014-m. U nastupnyja dva hady na hetyja mety nakirujuć 123,5 młn rubloŭ z respublikanskaha biudžetu. Budynak na vuł. Lenina, 22, z časam pieratvorycca ŭ častku pieršaha ŭ krainie muziejnaha kvartała, udakładnili va ŭstanovie.

Jašče 69 młn rubloŭ, užo ź miascovaha biudžetu, u miežach dziaržprahramy vydzielać na adnaŭleńnie budynkaŭ na vuł. Vaładarskaha. Raniejšy Piščałaŭski zamak rekanstrujujuć pad šmatfunkcyjanalny kompleks z abjektami hramadskaha charčavańnia i administracyjnymi pamiaškańniami. Zaviaršyć prajekt płanujuć u 2028-m.

U anałahičnyja terminy namiečana skončyć rekanstrukcyju abjektaŭ Łošyckaha siadzibna-parkavaha kompleksu — na hetyja mety ŭ nastupnyja try hady nakirujuć 11,6 młn rubloŭ. Havorka idzie pra kaplicu-pachavalniu Prušynskich, pabudavanuju ŭ XVIII stahodździ, i pra trochpaviarchovy młyn 1901 hoda. Zhodna z architekturna-płanirovačnaj kancepcyjaj, adnoviać pieršapačatkovy vyhlad kaplicy, a ŭ budynku młyna raźmieściacca piakarnia, kafieteryj, kaviarnia i bankietnaja zała.

U miežach dziaržprahramy «Kulturnaja prastora» znojduć srodki i na rekanstrukcyju Biełaruskaha dziaržaŭnaha akademičnaha muzyčnaha teatra — 16 młn rubloŭ. Jak raniej paviedamlała načalnik upraŭleńnia kultury Minharvykankama Kaciaryna Łučyna, u budynku całkam abnoviać usio abstalavańnie, scenu, zały i inšyja pamiaškańni. Da rabot majuć namier prystupić u studzieni 2026-ha, paśla jubileju teatra.

Adnaŭleńnie Čyrvonaha kaścioła ŭ Minsku pavinna zaviaršycca ŭ 2027 hodzie. Na jaho, zhodna z dakumientam, vydatkujuć bolš za 5,5 młn rubloŭ z haradskoha biudžetu.

Častka srodkaŭ u miežach dziaržprahramy budzie vydzielena na restaŭracyju abjektaŭ, zaviaršyć jakija płanujuć užo ŭ 2026-m. Heta budynki na terytoryi Kalvaryjskich mohiłak (kaścioł Uźvižańnia Śviatoha Kryža, šeść kaplic-pachavalniaŭ i centralnaja ŭvachodnaja brama) i budynak na vuł. Revalucyjnaj, 24a, u histaryčnym centry Minska.

Na hety hod taksama zapłanavana zdača ŭ ekspłuatacyju abnoŭlenaha budynka na vuł. Kamunistyčnaj, 8, u jakim raźmiaščajecca Pałac hramadzianskich abradaŭ. Historyka-kulturnaja kaštoŭnaść nie stracić aŭtentyčnyja rysy (pano, lustry, parkiet, vitražy), ale stanie bolš sučasnaj: u pamiaškańniach praviaduć pierapłaniroŭku i stvorać biezbarjernaje asiarodździe. 

Taksama «Kulturnaja prastora» krychu prajaśniaje los darevalucyjnaha budynka pa adrasie vuł. Miaśnikova, 38. Pieršapačatkova jaho pabudavali jak dachodny dom, a ŭ saviecki čas vykarystoŭvali pad kamunałki. Užo ŭ časy suvierennaj Biełarusi abjekt pierajšoŭ pad kryło BDU. Zhodna z dakumientam, u 2026‑m jaho pieraprafilujuć pad administracyjna-haspadarčy budynak.

Amal 70 młn rubloŭ ź miascovaha biudžetu nakirujuć na rekanstrukcyju kapitalnaj budoŭli na pr. Partyzanskim, 154a. Paśla zdačy abjekta ŭ ekspłuatacyju ŭ 2027 hodzie siudy pierajedzie dziaržaŭny archiŭ Minska.

Dziaržprahrama «Kulturnaja prastora» praduhledžvaje nie tolki rekanstrukcyju, ale i ŭźviadzieńnie novych abjektaŭ. Tak, u 2026‑m praciahniecca budaŭnictva adnaho sa znakavych abjektaŭ stalicy — novaha budynka histaryčnaha muzieja Biełarusi ŭ rajonie vuł. Arłoŭskaj. Zhodna ź dziaržprahramaj, na hetyja mety z respublikanskaha biudžetu nakirujuć 95 młn rubloŭ. Niepadalok ad Minskaha zamčyšča budzie ŭstalavany pamiatny znak, pryśviečany historyi horada, — jaho adkryćcio namiečana na 2027 hod.

• 0
• 0
• 0
• 0
• 0
• 0
• 0
• 0