«Vielmi zaminaje volnamu času i pracy». Skarhi na prablemy ź internetam u Biełarusi praciahvajucca

Adzin z čytačoŭ napisaŭ učora nočču, a 2:00: «Mabilny internet na A1 loh. Nie hruzić navat dziaržpartały nakštałt pravo.by». U paćvierdžańnie svaich słoŭ jon prykłaŭ skryn: jon sprabavaŭ adkryć Instagram, zachodziŭ u telehram, na YouTube i navat na pravo.by — ničoha nie pracavała.

Surazmoŭca adznačyŭ, što pieraboi ź internetam jamu asabista «stvarajuć šmat prablem», bo «na im zaviazanaje praktyčna ŭsio». 

— Kankretna hetaj nočču ja nie moh pahladzieć sieryjał pierad snom. Bałazie maju chatniuju sietku. 

Jon uspomniŭ, što toje ž samaje było ź im try dni tamu — prykładna, a 17:30, kali jon jechaŭ pa Zavodskim rajonie Minska: «Mabilny internet nie pracavaŭ na praciahu 20 chvilin». 

Čytač udakładniaje, što praviaraŭ na sajcie pravajdara — «nijakich navin ab praviadzieńni choć jakich rabot na hetym učastku niama».

Jość skarhi i ad inšych karystalnikaŭ:

— Voś tolki siońnia internet prosta ŭziaŭ i adsieksia (abo adsiekli), ale chvilin praz 10 paśla zvanka ŭ «Biełtelekam» adnaviŭsia. 

A da hetaha ŭ niadzielu internetu nie było ad 0:30 nočy i da 16:00 dnia prykładna (pry hetym mabilny pracavaŭ spraŭna). Raniej pieryjadyčna ŭ vychodnyja nočču i rana rankam u niadzielu złučeńnie adsutničała — i tak na praciahu dvuch apošnich miesiacaŭ. 

Surazmoŭca aburajecca, što heta «vielmi zaminaje» i jahonaj pracy, i volnamu času, ale nie ŭdakładniaje jak. Jon abmiarkoŭvaŭ prablemu z susiedziami, u tych pravajdar — A1, i prablem takich niama. 

Jašče adzin čytač raskazaŭ nam, što «ŭčora ŭ Discord nie pracavali niekatoryja emodzi, i ŭ kitajskija hača-hulni składana było zajści — praz raz źjaŭlałasia paviedamleńnie: «Pamyłka raźmierkavańnia sierviera. Praviercie padklučeńnie da sieciva, pierazahruzicie hulniu i pasprabujcie znoŭ». 

U surazmoŭcy chatni internet ad A1. 

Žurnalisty pravieryli sajty pravajdaraŭ: A1 paviedamlaje ab prafiłaktyčnych rabotach, praź jakija 28 studzienia va ŭsioj krainie, a 29 — na vulicy Mazurava — mahli nie pracavać servisy fiksavanaj suviazi i VOKA. U MTS paznačana, što 28 studzienia «buduć pravodzicca płanavyja raboty na sietcy stajačaha vyšej partniora. U pieryjad praviadzieńnia rabot mahčymaje paharšeńnie jakaści prapanavanaj pasłuhi «Internet».

«Biełtelekam» vykłaŭ hrafik rabot u abłaściach i Minsku — praź ich, naprykład, byli mahčymyja pieraboi z chatnim internetam na praśpiekcie Niezaležnaści i vulicy Chmialnickaha.

A jašče adna čytačka raskazvaje pra prablemy z mabilnym internetam ad A1 siońnia zranku. Jana pryviała dzicia ŭ palikliniku — i doŭha nie mahła vyklikać taksi dadomu: złučeńnie adsutničała.

— Paru mam u čarzie pad kabinietam doktara skardzilisia, što praz adsutnaść internetu na telefonie nie mohuć uklučyć dzieciam mulciki, — tak što prablema vidavočna była nie ŭ mianie adnoj. 

Paźniej hetaja ž čytačka ź ciažkaściu zmahła padklučycca da anłajn-mita z kalehami, suviaź była vielmi drennaj. Zapyt u čat-bot pastaŭščyka pasłuh ničoha nie daŭ: čytačcy dasłali instrukcyju, jak ustalavać aŭtamatyčnyja nastrojki na telefonie.

Taksama pastupajuć skarhi na pracu VPN-servisaŭ. Naprykład, što dahetul «ad suboty nie pracuje Proton VPN — pieryjadyčna padklučajecca da redkich siervieraŭ, ale internetu niama». 

Čytač sprabavaŭ i na ByFly, i na A1 — i ničoha. «Pracy heta nie zakranaje», — udakładniaje jon. 

Druhi čytač kaža, što znajšoŭ łajfchaki: jon mianiaje sierviery, pakul nie dojdzie da Rumynii — «da jaje Proton VPN dobra padklučajecca». Adnak u papiaredniaha śpikiera hety łajfchaki nie pracuje: 

— Tak, pieryjadyčna znachodziacca takija sierviery, ale zvyčajna pry padklučeńni da ich albo naohuł źnikaje internet, albo zastajecca pracavać tolki telehram. A ŭčora ja zmoh padklučycca da aŭstryjskaha sierviera — i byŭ internet, ale praz hadzinu padklučeńnie pierastała pracavać.

Pra zboi ŭ pracy VPN-servisaŭ karystalniki paviedamlajuć ad 25 śniežnia. Mnohija ŭ toj dzień nie mahli padklučycca da VPN-servisaŭ Proton, NordVPN, TunnelBear i inšych. Niekatoryja servisy, naprykład, Psiphon, zastavalisia dastupnyja. Siarod sajtaŭ, pry padklučeńni da jakich uźnikli prablemy, — Twitch, Steam i Reddit.

• 1
• 0
• 0
• 3
• 0
• 0
• 1
• 0