Biełastockija biznesoŭcy prosiać adkryć punkty propusku na miažy ź Biełaruśsiu
Biznesmieny z abjadnańnia «Pradprymalnicki ŭschod» (Przedsiębiorczy Wschód) rychtujucca padać kalektyŭny pazoŭ suprać polskaj dziaržavy praz zakryćcio aŭtamabilnych punktaŭ propusku na miažy ź Biełaruśsiu. Jany ličać, što svaimi dziejańniami ŭrad abmiežavaŭ ich svabodu pradprymalnickaj dziejnaści, i chočuć kampiensacyi stračanaj vyhady, piša Most.
Ab svaich namierach biznesmieny zajavili na sustrečy, pryśviečanaj druhoj hadavinie zakryćcia punkt propusku «Babroŭniki».
Jany prynieśli na imprezu śviečki i zapalili ich u znak taho, što miascovy handlovy biznes zabity. Akramia taho, jany trymali ŭ rukach płakaty «Adzin urad = inšy ŭrad — adzin čort», atajasamlivajučy polskija i biełaruskija ŭłady.
— My adčuvajem siabie ašukanymi i całkam stracili nadzieju na lepšuju budučyniu. Tamu ŭ bližejšy čas my razhladajem mahčymaść padačy kalektyŭnaha pazovu da polskaha Dziaržaŭnaha skarbu, tamu što polskaja dziaržava svaimi dziejańniami abmiežavała našu svabodu pradprymalnickaj dziejnaści, — pryvodzić Radio Białystok słovy pradprymalnika Hžehaža Kapicy.
Ciapier aktyvisty abmiarkoŭvajuć detali pazovu ź jurydyčnaj firmaj.
Straty — 800 młn złotych
Pa dadzienych pradprymalnikaŭ, u siarednim turyst ź Biełarusi pakidaŭ u Polščy 167 dalaraŭ. Pa ich padlikach, z-za zakryćcia pahranpierachodaŭ z boku Hrodzienskaj vobłaści tolki na nie ździejśnienych biełarusami pakupkach Padlašša hublaje 800 młn złotych. Pry hetym pradprymalniki padkreślivajuć, što miaža z boku Lublinskaha vajavodstva zastajecca adkrytaj: tam pracujuć pasažyrski punkt propusku «Brest — Tarespal» i hruzavy «Kazłovičy — Kukuryki».
Evielina Hryhatovič-Šumoŭska padčas sustrečy paviedamiła, što paśla zakryćcia punktaŭ propusku dachody jaje kampanii skaracilisia na 40%, jana była vymušana zvolnić ci pieraprafilavać pracu 17 supracoŭnikaŭ.
Akramia taho, pradstaŭniki biznesu aburalisia, što, začyniŭšy pierachody, miascovyja ŭłady nie dali ludziam alternatyŭnyja sposaby zarobku.
Ruch praz «Kuźnicu» byŭ prypynieny na niavyznačany termin u listapadzie 2021 hoda, a praz «Babroŭniki» — u lutym 2023 hoda, adrazu paśla vyniasieńnia prysudu aktyvistu polskaha pachodžańnia i žurnalistu Andžeju Pačobutu.
Pryhraničny handlovy biznes nieadnarazova źviartaŭsia da miascovych uład z prapanovaj adnavić ruch. Ale takoje rašeńnie naŭrad ci budzie pryniataje, bo Biełaruś nie vykanała ŭmovy, pastaŭlenyja Polščaj. Siarod ich — vyzvaleńnie Pačobuta, spynieńnie mihracyjnaha kryzisu na miažy i sadziejničańnie ŭ znachodžańni mihranta, jaki zabiŭ polskaha sałdata Matevuša Siteka.
Kamientary