Dačka milicejskaha načalnika z Hrodna raskazała, jak siadzić u turmie ŭ Niepale prysudžanyja 15 hadoŭ
Alinie Ałdošynaj prysudzili vielizarny termin za kantrabandu kakainu, jana adbyvaje pakarańnie ŭ turmie Katchmandu. Jaje baćka prylataŭ u Niepał, kab vyciahnuć dačku, ale ŭ jaho ničoha nie atrymałasia.
Vy mahli čytać zachaplalnuju historyju Aliny jašče ŭ kancy 2019 hoda. Tady jana, dačka tahačasnaha pieršaha namieśnika načalnika milicyi Leninskaha rajona Hrodna Alaksieja Ałdošyna, była aryštavanaja ŭ aeraporcie Katmandu z 6 kiłahramami kakainu, schavanaha ŭ zimovaj kurtcy. Razam ź joj byŭ zatrymany jaje siabar Pavieł Vasiljeŭ.
Čytajcie:U Niepale zatrymali dvaich maładych biełarusaŭ z 6 kiłahramami kakainu
Kakain znajšli padčas nadhladu bahažu biełarusaŭ u aeraporcie. Maładyja ludzi prylacieli z Turcyi i ŭ toj ža dzień pavinny byli sieści ŭ samalot na Hankonh.
Jak śćviardžali Alina i Pavieł, pra kakain jany navat nie zdahadvalisia, dumali, što ŭ kurtkach štości inšaje. A na pieravozku kurtak pahadzilisia, bo chacieli chutka zarabić hrošaj.
Na dopycie ŭ palicyi biełarusy raskazali, što tavar im pieradali dvoje hramadzian Balivii padčas sustrečy ŭ hateli. Haradziencam abiacali za pracu $2000.
Za kantrabandu narkotykaŭ maładziony atrymali pa 15 hadoŭ źniavoleńnia.
Akazvajecca, Alina pa-raniejšamu znachodzicca ŭ Niepale — naturalna, u turmie. Čamu jana nie stała ekstradavacca ŭ Biełaruś, niezrazumieła. Mahčyma, isnujuć abmiežavańni ź niepalskaha boku. Mahčyma, jana paličyła, što ŭmovy ŭ homielskaj kałonii buduć horšyja, čym u Azii, i vyzvalicca jana paźniej.
Jak minimum u niepalskaj turmie źniavolenyja mohuć karystacca telefonam. Tamu Alina raskazvaje ŭ sacsietkach pra svajo žyćcio ŭ turmie i źbiraje tysiačy reakcyj padpisčykaŭ.
«Padzialusia niaznačnym faktam pra siabie: ja adbyvaju pakarańnie ŭ niepalskaj turmie. Tak, u mianie jość telefon, tut dobra raźvita karupcyja. Toje, što ja zrabiła — heta končany ŭčynak, i ja ni razu siabie nie apraŭdvaju (da chejtu hatova), ale chacieła zapytacca, ci budzie vam cikava daviedacca pra žyćcio niepalskich źniavolenych, dy i pra niepalcaŭ u sukupnaści?», — napisała Alina ŭ Threads.
Tak vyhladaje pakoj dziaŭčyny, u jakim jana žyvie razam z susiedkaj. «U turmie lepšyja ŭmovy, čym u niekatorych niepalcaŭ doma, plus ich kormiać, tamu [niepalcy] i nie źbiahajuć [z turmy]», — napisała Alina ŭ kamientarach.
Dziaŭčyna dadała, što joj zastałosia siadzieć jašče kala 5 hadoŭ, jana spadziajecca vyjści pa ŭmoŭna-daterminovym. Jaje baćka Alaksiej Ałdošyn prylataŭ u Niepał, sprabavaŭ vyciahnuć dačku z turmy, ale ničoha nie atrymałasia. «Jamu tolki sumu kruhleńkuju nazvali i ŭsio», — napisała Alina. Darečy, ciapier u jaje baćki inšaja pasada, ale niezrazumieła jakaja. Adnak dziaŭčyna zapeŭnivaje, što jon zastaŭsia ŭ milicyi.
Dziaŭčyna pakazała, što ŭ niepalskaj turmie dajuć na viačeru: rys, pality harochavym supam, špinat i hryby. «Chto viehietaryjaniec, mnie zdajecca, heta vielmi smačna i karysna, ja taksama ŭžo pryvykła», — kaža jana ŭ videa.
Niepał — hornaja kraina. Naturalna, što i turma znachodzicca ŭ harach. Kožnuju ranicu Alina moža hladzieć na hory.
Kamientary