«Nie chaču spansaravać Maska». Čamu biełarusy (nie) pradajuć svaje Tesla

Biełaruś

Pradała praz 8 miesiacaŭ, ale nie tamu što Mask, a tamu što «sucelnyja infrastrukturnyja zadačy z zoračkaj»

— U 2020 hodzie ŭ mianie była Model S 2016 hoda vypusku, pryviezienaja z ZŠA. Ja tady była ŭražanaja bijahrafijaj Iłana Maska, chaciełasia dakranucca da praduktu. I ŭvohule ŭ krainie pačynałasia raźvićcio rynku elektratranspartu. Uładalnikam elektrakaraŭ, naprykład, davali peŭnyja bonusy (uładalnikaŭ elektrakaraŭ źbiralisia vyzvalić ad płaty na parkoŭkach).

Ale ŭ vyniku praz 8 miesiacaŭ pradała svaju Tesla. Pryčyn było šmat.

• Zimoj batareja trymaje ŭ 3-4 razy mienš. Tamu ŭ Biełarusi Tesla treba trymać u haražy, bo na vulicy batareja razradžajecca supier chutka.
• Paśla BMW 7-j madeli — nievierahodna biedny i niajakasny sałon.
• Zimoj na miescach dla zaradki časta sabrany śnieh z usioj parkoŭki.
• Adsutnaść kultury ŭ mnohich kiroŭcaŭ. Zajmali miescy dla zaradki i nie pakidali numar telefona. Albo pakidali, ale potym doŭha spuskalisia sa svajho ofisa, kali ty ŭžo ŭsiudy spaźniŭsia.
• Ramont aŭtamabila «na haražach». Kab pamianiać lampačku ŭ fary, treba było razabrać pałovu «mordy».
• Pastajanny raźlik u hałavie, kudy chopić zaradu dajechać i kolki km zastałosia. Heta vielmi napružvała.
• Pry pierapadzie elektraenierhii mašyna mahła prosta pierastać zaradžacca. A ty na sustrečy, naprykład, i niama mahčymaści vybiehčy i pierapadłučyć.

Karaciej, sucelnyja infrastrukturnyja zadačy z zoračkaj. Tamu Tesla rekamienduju ŭ miežach Minska tolki tym, u kaho ŭ dvary/na pracy jość zaradka, albo ŭładalnikam pryvatnych damoŭ.

Mnie ŭ cełym padabajecca Model Y, jana zroblena niadrenna, ale znoŭ ža, dla mianie vielmi aktualnaje pytańnie zapasu chodu. Kali b Tesla mahła prajazdžać 800-900 km biez padzaradki, jak BMW z ruchavikom 2.0 na dyzieli, možna było b razhledzieć.

Što da Maska, to vyhladaje tak, što dostup da ŭłady nie zaŭsiody idzie na karyść mientalnamu zdaroŭju. Nie kožny, vidać, spraŭlajecca z nahruzkaj.

Nie kupiŭ, bo kitajskija kankurenty cikaviejšyja

— Raniej razhladaŭ nabyćcio novaj Tesla3, byŭ hatovy patracić 30 tysiač dołaraŭ. Razhladaŭ Tesla jak alternatyvu jeŭrapiejskim brendam, čytaŭ vodhuki pra poŭny aŭtapiłot. Tesla adpaviadała vobrazu vielmi technałahičnaha aparata.

Ale adšturchoŭvali niekatoryja charaktarystyki i najaŭnaść kitajskich kankurentaŭ. Naprykład, u Tesla kulhaje jakaść afarboŭki i zborki. Farba nanosicca vielmi tonkim słojem na zavodzie i zaŭvažnyja adroźnieńni ŭ zazorach pamiž detalami kuzavami.

U hetym płanie, naprykład, Zeekr 007 (elektramabil kitajskaj Zhejiang Geely Holding Group) cikaviejšy: šmat opcyj, bolš jakasnyja materyjały azdableńnia i dyzajn. Sabrany jon jakasna i ŭnutry bahaciejšy. Ale ŭ vyniku ja kupiŭ Li7 (elektryčny pazadarožnik kitajskaha vytvorcy Li Auto).

Što da majho staŭleńnia da brenda Tesla paśla vykazvańniaŭ uładalnika kampanii, to ŭ peŭnaj stupieni jano źmianiłasia ŭ niehatyŭny bok.

Nie choča pradavać, ale jašče raz nie kupić, kab nie spansavać Maska

— Pieršuju Tesla (Model S) kupiŭ kala 7 hadoŭ tamu. Chacieŭ pasprabavać elektramabil u spravie, a na toj momant alternatyŭ Tesla nie było.

Da hetaha jeździŭ na BMW i vyrašyŭ, što nie budu pradavać. Dumaŭ, što na Tesla daloka nie źjedu. Ale ŭ vyniku BMW prastajała ceły hod biez spravy. Aŭtamabil Tesla mnie ahułam spadabałasia, tamu 4 hady tamu ja kupiŭ novuju Model X, a staruju pradaŭ.

Model X ja pakul nie chaču pradavać. Ale naŭrad ci znoŭ kuplu Tesla. Nie žadaju spansavać takich ludziej, jak Iłan Mask.

Całkam salidarny ź jeŭrapiejcami. Kali da samoha aŭtamabila pytańniaŭ niama, to z Maskam u apošni čas adbyvajecca niešta dziŭnaje. Raniej jon chacieŭ skaryć Mars i prasoŭvaŭ zialonuju enierhietyku, a ciapier zvalniaje rabotnikaŭ IT-śfiery, dziaržaŭnych słužboŭcaŭ i ŭvohule robić dziŭnyja zajavy. Navat niejak kryŭdna, na kaho raŭniacca-ta?

Polšča

Budzie mianiać Tesla Model 3 na Model Y. Dobrych alternatyŭ za hetyja hrošy niama, kampaniju i asobu CEO raźmiažoŭvaje

— Bolš za try hady ja źjaŭlajusia ŭładalnikam Tesla Model 3. Zamaŭlaŭ aŭtamabil jašče letam 2021 hoda z sałona ŭ Hiermanii z dastaŭkaj u Biełaruś praz kampaniju-pasiarednika. Mašynu atrymaŭ praz paŭhoda, z usimi płaciažami Tesla abyšłasia ŭ 50 tysiač jeŭra.

Ciapier płanuju źmianić na novuju Model Y. Źbirajusia kuplać adrazu ŭ Polščy, praz aficyjny sajt, biez pasiarednikaŭ.

Ja dla siabie raźmiažoŭvaju kampaniju i asobu CEO. Aŭtamabili robiać vydatnyja, i dobrych alternatyŭ za hetyja hrošy niama (u kantekście nabyćcia novaha aŭtamabila) u hetaj canavoj katehoryi, asabliva z ulikam ekspłuatacyi aŭto ŭ ES i sietki Supercharger.

Pieravahi:

• Nadziejnaść i prastata absłuhoŭvańnia — za 130 tys. km prabiehu było tolki adno harantyjnaje pytańnie pa padviescy.
• Košt 1 km šlachu: zaradžajusia doma + jość soniečnyja paneli. Vychodzić značna tańniej, čym aŭta z RUZ (ruchavik unutranaha zharańnia) + nizki raschod samoj Tesla ŭ paraŭnańni ź inšymi elektramabilami.
• Aŭtapiłot — vielmi kamfortna pry pajezdkach na dalokija adlehłaści.
• Sietka Tesla Supercharger — adna z samych tannych i nikoli nie padvodziła. Plus navihacyja aŭtamatyčna buduje maršrut pa sietcy stancyj, što dazvalaje nie dumać pra toje, dzie i kolki treba zaradžacca.
• Paskareńnie i kiravalnaść na vyšyni.

Nu i plus usich elektramabilaŭ — biaspłatnyja parkoŭki, mahčymaść jeździć pa aŭtobusnych pałosach (vielmi dapamahaje ŭ hadziny pik).

Mianiać nie budu, ale nalepku «Kupiŭ hetuju mašynu da taho, jak Mask źjechaŭ z hłuzdu» paviesiŭ

— Kupiŭ novuju Tesla u 2022 hodzie niepasredna ŭ sałonie ŭ Varšavie prykładna za 250 tysiač złotych. Z tych časoŭ prajechaŭ užo bolš za 100 tysiač kiłamietraŭ pa ŭsioj Jeŭropie — ad Kanarskich astravoŭ da harnałyžnych kurortaŭ. I ŭražańni tolki stanoŭčyja. Za ŭvieś hety čas adzinyja vydatki — heta zamiena dvornikaŭ. Mahu doŭha abviarhać usie stereatypy pra elektryčnyja aŭto.

Asobna chočacca skazać pra sietku zaradak Tesla — heta adzinaje, što sapraŭdy pracuje całkam stabilna i nadziejna ŭ Jeŭropie. Ščyra kažučy, biez dostupu da Supercharger padarožničać na elektramabili było b ciažka i niazručna.

Mnie zdajecca, usie biełarusy ŭ apošnija hady sutykalisia ź niazručnaściami z-za niapravilnaha koleru pašparta, tamu abvinavačvać mašynu za ŭčynki jaje stvaralnika nie buduć.

U cełym ja spakojna staŭlusia da taho, što kłasnuju reč, dobry film ci štości jašče moža zrabić nie samy pryjemny čałaviek. U aŭtapramie heta nie navina.

Mianiać svaju Tesla pakul dakładna nie źbirajusia, choć nalepku «Kupiŭ hetuju mašynu da taho, jak Mask źjechaŭ z hłuzdu» ja ŭsio ž paviesiŭ. Na Allegro i Amazon takich šmat.

U toj ža čas nie ŭpeŭnieny, što nastupnaja mašyna taksama budzie Tesla. Trymaju ŭ hałavie budučyniu elektraindustryi, ale i reputacyja kampanii, viadoma, upłyvaje. Zrešty, paru hadoŭ u mianie jašče jość.

Litva

Źbiraŭsia kupić u 2025, ale admoviŭsia praz Maska

— U Tesla u Litvie dobryja ŭmovy pa lizinhu, jakasny servis, chutkaja pastaŭka i raźvitaja infrastruktura. Dastupnyja biaspłatnyja parkoŭki, dazvolena jazda pa vyłučanych pałosach.

Sam aŭtamabil prymalnaj jakaści, ź vialikaj kolkaściu sučasnych funkcyj. U cełym, na moj pohlad, heta dobryja suadnosiny koštu i mahčymaściaŭ. Lizinh kaštuje kala 450 jeŭra ŭ miesiac.

Ja płanavaŭ kupić Tesla ŭ hetym hodzie, tym bolš što niadaŭna abnavili Model Y. Adnak mianie rasčaravali pavodziny Iłana Maska — jaho padtrymka Donalda Trampa, krytyka demakrataŭ, vykazvańni pra Kanadu i Džastyna Trudo, a taksama zajavy pra vajnu va Ukrainie.

U cełym, mnie jaho pavodziny padajucca niahodnymi. Krytykavać i mieć inšuju dumku — heta narmalna. Adnak niedapuščalna vykarystoŭvać źnievažalnyja farmuloŭki, jak heta robić Mask. Naprykład, nazyvać premjer-ministra inšaj krainy «dziaŭčynkaj» — heta nie krytyka, a prajava niepavahi. I padobnych prykładaŭ niamała.

U vyniku ja admoviŭsia ad idei nabyć Tesla. Nie chaču ni padtrymlivać, ni asacyjavać siabie z brendam, čyj tvar pavodzić siabie padobnym čynam. Budu kuplać aŭtamabil inšaha brendu, pakul jašče analizuju prapanovy na rynku.

Niderłandy

Zadavoleny Tesla Model 3 Long Range, «aŭtamabili — asobna, asabistyja pohlady i ŭčynki Maska — asobna»

— Jezdžu na Tesla Model 3 Long Range 2020 hoda. Kupiŭ aŭtamabil jašče vosieńniu 2023 hoda za 34 tysiačy jeŭra. Ciapier rynkavaja vartaść kala 22 tysiač jeŭra.

Aŭtamabilem vielmi zadavoleny. Chutkaja, mahutnaja, ustojlivaja na darozie ź nizkim centram ciažaru, kamfortnaja dla kiroŭcy i pasažyraŭ, z vysokim zapasam chodu ŭ 440 km (zimoj) i 600 km (letam).

Niepatrabavalnaja ŭ ekspłuatacyi i tannaja ŭ košcie jazdy, asabliva kali jość mahčymaść vykarystoŭvać svaju zaradnuju stancyju doma, soniečnyja paneli. Całkam zadavalniaje minimalistyčny dyzajn ź nievialikaj kolkaściu fizičnych knopak i častyja abnaŭleńni sistemy, jakija dadajuć novy funkcyjanał.

Ź minusaŭ — niašmat miesca ŭ bahažnym adździaleńni z-za vuzkaha prajomu (u adroźnieńni ad Model Y), mocnaje padzieńnie koštu za apošnija hady.

Akramia taho, zaraz pavialičylisia šancy, što Tesla moža stać mišeńniu dla vandałaŭ, jakija hatovy zryvać svaju niezadavolenaść čarhovym tvitam Iłana Maska ŭ sietcy Ch na aŭtamabili, vypuščanym u hady, kali kiraŭnik kampanii byŭ stanoŭčaj postaćciu ŭ śviecie.

Tym nie mienš učynki Maska nijak nie ŭpłyvajuć na majo staŭleńnie da aŭtamabilaŭ Tesla, uličvajučy, što bolšaść ź ich była sprajektavana i vypuščana jašče da jaho debiutu na palityčnaj scenie ZŠA. Aŭtamabili — asobna, asabistyja pohlady i ŭčynki Maska — asobna.

Kali ž acanić majo asabistaje staŭleńnie da postaci Iłana Maska pa škale 0—10, to da studzienia—lutaha 2024 heta była ćviordaja 8, a ciapier 5. Vielmi škada, što jon demanstruje takija epatažnyja i ekscentryčnyja pavodziny.

Jaho ŭpłyŭ na administracyju Trampa, ahresiŭnyja vypady ministerstva DOGE na adras dziaržaŭnych słužbaŭ ZŠA, padtrymka ŭltrapravaj partyi ŭ Hiermanii pryviali da niehatyŭnych efiektaŭ dla biźniesu samoha Maska.

Fonavyja kaciroŭki akcyj upali z histaryčnaha maksimumu ŭ 400+ jeŭra ŭ śniežni 2024 da 200+ jeŭra ŭ sakaviku 2025, jak i prodažy novych aŭtamabilaŭ u roznych častkach śvietu.

Ź inšaha boku, uličvajučy ŭdzieł Iłana Maska ŭ dziejnaści takich kampanij, jak PayPal, Tesla, SpaceX, Boring Company, Neuralink, ciažka admaŭlać jaho mahčymaści pa źmianieńni śvietu ŭ lepšy bok. Adna paśpiachovaja kampanija mahła b być vypadkovaściu, ale kali ich niekalki — heta ŭžo zakanamiernaść. Vyvieści elektramabili na rynak, jašče nie hatovy da ich, kaštavała vialikich namahańniaŭ, i pośpiech u hetym napramku vyklikaje pavahu.

ZŠA

Ciapier nie kupiŭ by, dumaje pra zamienu

— U minułym hodzie kupili Tesla Model Y Long Range. Nabyć aŭtamabil prapanavała žonka. Dy i mnie samomu było cikava. Mnohija siabry i znajomyja jeździli na Tesla.

Aŭtamabil kupili ŭ kredyt pad 1% hadavych. Nam zrabili dobruju źnižku, plus na mašynu dziejničaŭ fiederalny kredyt u pamiery 7500 dalaraŭ (źnižka) ad dziaržavy. Z kalifarnijskimi padatkami i inšymi zborami, a taksama z ulikam źnižak Tesla abyšłasia ŭ 46+ tysiač dalaraŭ.

Ale ciapier dumajem pra zamienu Tesla. Da samoj mašyny pretenzij niama. Zamienu razhladajem pa niekalkich pryčynach.

Pry takoj dastupnaści aŭtamabilaŭ na rynku chaciełasia b karystacca mašynaj nie bolš za 1,5—2 hady, kab nie adčuvać prablemy z absłuhoŭvańniem i znosam. Taksama mianie zahnali ŭ ofis, i my pierajechali ŭ mienš kamfortnaje miesca dla elektramabilaŭ. Tut mienš zaradnych stancyj, zimoj chaładnavata. Tam, dzie my žyli raniej, stancyj było šmat.

Akramia taho, adčuvaješ siabie nie ŭ svajoj talercy z-za kiraŭnika kampanii. Jaho ŭčynki i vykazvańni adnosna vajny va Ukrainie i samoj Ukrainy, abraźlivyja pramovy ŭ bok Polščy i Hiermanii.

Jaho dostup da adčuvalnych dadzienych, masavyja zvalnieńni, i toje, jak jon heta robić. Mahčyma, heta treba było zrabić, ale z mandatam, biez źjedlivaści i nie zabycca taksama pakazać na atrymanyja hrošy. Mask sa svaim DOGE (Departamient efiektyŭnaści ŭrada), rasśledujučy vydatki dziaržavy, ścipła zamoŭčvaje, kolki atrymała Tesla.

Tamu kožny raz, kali staviš mašynu na zaradku, nie pakidaje pačućcio, što prosta zaraz ty płaciš Masku.

My razvažali z žonkaj i pryjšli da adzinaj dumki, što kali b rašeńnie ab kupli aŭtamabila prymali zaraz, to ŭ Tesla nie było b šancaŭ.

Darečy, usie elektramabili chutka hublajuć u košcie, asabliva tyja, što daražej. Tesla hublała krychu mienš, ale ciapier, pa adčuvańniach, košt staŭ padać chutčej. Pryčyny, chutčej za ŭsio, źmiašanyja, tolki Maska abvinavačvać składana.

Try hady tamu byli čerhi za Tesla i inšymi elektramabilami na miesiacy, časta bolš za paŭhoda. A ciapier — «biary nie chaču». Asnoŭnaja prablema Tesla — bolš darahaja strachoŭka.

• 2
• 0
• 3
• 2
• 0
• 0
• 0
• 0