«Jon sapraŭdy dapamoh ukrainskaj armii». Va Ukrainie zapuścili naśmiešlivy fłešmob pra Maksa Karža
Niečakany ažyjataž vakoł asoby biełaruskaha śpievaka Maksa Korža pačaŭsia paśla publikacyj ukrainskaha aktyvista i błohiera Siarhieja Ściarnienki ŭ sacsietcy Threads. Jon apublikavaŭ niekalki paviedamleńniaŭ, u jakich śćviardžaŭ, što Korž nibyta dapamahaŭ USU. Heta vyklikała mocny vodhuk va ŭkrainskaj aŭdytoryi i pieratvaryłasia ŭ ździeklivy fłešmob.
Siarhiej Ściarnienka, viadomy svaimi vostrymi miedyjnymi kampanijami suprać prarasijskich i apalityčnych znakamitaściaŭ, spačatku apublikavaŭ łakaničny post «Maks Korž», i dadaŭ da hetych słoŭ smajlik pocisku ruki.
Heta imhnienna spravakavała łavinu kamientaryjaŭ, dzie karystalniki pačali iranizavać, nibyta artyst tajemna pieravioŭ uvieś svoj hanarar ukrainskim vajskovym fondam. A praź niekalki hadzin Ściarnienka padkinuŭ u ahoń jašče droŭcaŭ, apublikavaŭšy nastupnaje: «Tak, jon sapraŭdy dapamoh ukrainskaj armii».
Z padačy Ściarnienki ŭ internecie pačali masava źjaŭlacca žarty, miemy i paviedamleńni pra toje, što śpiavak nibyta pieraličyŭ hrošy na padtrymku USU. Niekatoryja karystalniki navat nazyvali mierkavanyja sumy achviaravańniaŭ i spasyłalisia na «paćviardžeńni», choć nijakich aficyjnych dokazaŭ abo zajaŭ samoha Korža pra takija danaty nie było.
Ź ciaham času častka karystalnikaŭ pryjšła da vysnovy, što heta byŭ tolki trolinh abo svojeasablivy sacyjalny ekśpierymient, jaki pakazaŭ, nakolki chutka niepravieranaja infarmacyja moža raspaŭsiudžvacca ŭ sacyjalnych sietkach.
Šturšok hetamu svojeasablivamu fłešmobu byŭ zadadzieny niadaŭnim kancertam Maksa Karža ŭ Stambule. Padčas vystupleńnia ŭ fan-zonie byli zaŭvažanyja ludzi sa ściahami Ukrainy, Rasii, Biełarusi i inšych krain, a taksama z łozunham F*ck politics. Heta vyklikała vostruju reakcyju ŭ internecie: adny ličyli heta zaklikam nie źmiešvać muzyku i palityku, inšyja ž raskrytykavali takija žesty va ŭmovach vajny.
Pazicyja samoha Maksa Karža adnosna vajny va Ukrainie ŭžo nieadnarazova vyklikała sprečki. Paśla pačatku poŭnamaštabnaha ŭvarvańnia Rasii va Ukrainu jon vystupiŭ suprać vajny i zaklikaŭ da spynieńnia hvałtu, adnak častka ŭkrainskaj hramadskaści ličyć, što jaho pazicyja niedastatkova vyraznaja, bo jon nie robić rehularnych palityčnych zajaŭ i praciahvaje vystupać dla ruskamoŭnaj aŭdytoryi ŭ roznych krainach.
Pierad hetym padobny fłešmob va ŭkrainskich sacsietkach prynios istotnyja prablemy ŭkrainskaj śpiavačcy Ani Łorak, jakaja paśla pačatku poŭnamaštabnaj vajny Rasii suprać Ukrainy i nieabchodnaści vyznačycca sa svaimi simpatyjami vybrała rasijski bok i praciahnuła zarablać hrošy, vystupajučy ŭ Rasii.
Kali va ŭkrainskich sacsietkach stali raspaŭsiudžvacca čutki pra nibyta finansavuju padtrymku z boku Łorak ukrainskaha vojska, častka rasijskich karystalnikaŭ uspryniała ich jak praŭdu.
Na hetym fonie rasijskija dziaržaŭnyja orhany pačali pravierku vykanaŭcy, a ŭ niekalkich haradach byli admienienyja jaje kancerty. Ułady i častka hramadskaści ŭ Rasii abvinavacili śpiavačku ŭ nibyta niedastatkova vyraznaj pazicyi adnosna vajny va Ukrainie. Pry hetym publičnych dokazaŭ taho, što Ani Łorak sapraŭdy pieraličvała hrošy na padtrymku USU, pradstaŭlena nie było — heta prosta prydumana.
Jak prajšoŭ kancert Maksa Karža ŭ Stambule. Tudy dajechała navat byłaja prapahandystka
«Heta pačućcio ščaślivaha žyćcia». Jak bolš za 40 tysiač čałaviek płakali, śpiavali i abdymalisia na kancercie Maksa Karža ŭ Buchareście
Na kancercie Karža ŭ Buchareście dla achovy areny zadziejničajuć dziesiać tysiač čałaviek
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary
Čałaviek nie moža dva słovy źviazać navat na ruskaj movie, a vy niešta chočvcie ad jaho.