U druhuju noč biesparadkaŭ u Paŭnočnaj Irłandyi paciarpieli 12 palicejskich
Biesparadki ŭ Paŭnočnaj Irłandyi, jakija ŭspychnuli paśla napadu vychadca z Sudana na mužčynu ŭ Biełfaście, praciahvalisia druhuju noč zapar. Palicyja prymianiła vadamioty dla razhonu natoŭpu, jaki kidaŭ u pravaachoŭnikaŭ roznyja pradmiety, u tym liku butelki z zapalnaj sumieśsiu, piša Bi-bi-si.
Padčas biesparadkaŭ paciarpieli 12 palicejskich, ahułam užo aryštavany 16 čałaviek.
Na kadrach, źniatych na kalcavoj raźviazcy ŭ rajonie Sandzinoŭz na paŭnočny zachad ad Biełfasta, vidać, jak pratestoŭcy, apranutyja ŭ čornaje i ŭ maskach, raźbivali padjaznuju darohu kala pryvatnaha doma, vybivajučy kavałdaj kavałki plitki i kidajučy ich u palicejskich.
Taksama byŭ zaŭvažany vialiki aŭtamabil Ministerstva infrastruktury, jaki hareŭ, a jašče padpalenyja śmiećcievyja kantejniery.
U inšych častkach Paŭnočnaj Irłandyi taksama prajšli pratesty, ale jany ŭ asnoŭnym mieli mirny charaktar.
Biesparadki ŭ sieradu nie dasiahnuli maštabaŭ sutyknieńniaŭ, jakija adbylisia ŭ aŭtorak, u vyniku čaho ludzi byli vymušany pakidać svaje damy.
Sutyknieńni pačalisia ŭ aŭtorak paśla taho, jak napiaredadni vychadziec z Sudana Chadzi Aładzid, jaki atrymaŭ prytułak u Vialikabrytanii, napaŭ z nažom na minakoŭ u Biełfaście. U vyniku adzin čałaviek straciŭ voka i atrymaŭ šmatlikija ranieńni tvaru i śpiny.
Napadnika zatrymali vypadkovyja śviedki. U sieradu ŭ mahistrackim sudzie jamu vystavili abvinavačańnie ŭ zamachu na zabojstva i ŭziali pad vartu. Nastupnaje sudovaje pasiadžeńnie pryznačana na 8 lipienia.
Kamientary
Kali ŭ Jeŭropie palili kramy, mašyny, skidali pomniki tamu što, u Amierycy pamier ad pieradaziroŭki fientaniłam pad čas aryštu sieryjny kryminalnik, toje kazali, što heta "amal mirnyja pratesty", "spraviadlivy hnieŭ", "treba płacić za hrachi minułaha", a chto suprać - fašyst!