Stała viadoma, kolki biełarusaŭ čakaje apieracyi pa zamienie sustavaŭ
U Biełarusi na siońniašni dzień u listach čakańnia na endapratezavańnie znachodziacca 19 797 pacyjentaŭ. Pra heta paviedamili na respublikanskaj naradzie pa vynikach pracy traŭmatołaha-artapiedyčnaj słužby krainy za 2024 hod i zadačach na hety hod, zaŭvažyła «Lusterka» ŭ vydańni «Miedycynski vieśnik».
Hałoŭny pazaštatny traŭmatołah-artapied Ministerstva achovy zdaroŭja Michaił Hierasimienka adznačyŭ, što na 23 maja 2023 hoda ŭ čarzie na zamienu sustavaŭ znachodzilisia 29 862 čałavieki, ale «pravodzicca aktyŭnaja rabota pa skaračeńni kolkaści pacyjentaŭ u listach čakańnia i terminaŭ čakańnia (na siońnia jany nie pieravyšajuć 12 miesiacaŭ)».
Taksama, pavodle jahonych słoŭ, naprykancy 2024 hoda ŭ balnicach i klinikach pracavali 750 daktaroŭ-traŭmatołahaŭ-artapiedaŭ, ź ich 111 — akazvali dapamohu dzieciam. Ukamplektavanaść kadrami skłała 71,2%, kvalifikacyjnyja katehoryi mieli 79,1% śpiecyjalistaŭ. Apieratyŭnaj technikaj endapratezavańnia tazaściehnavych i kalennych sustavaŭ vałodajuć 246 uračoŭ, tady jak u mai 2022 hoda takich było tolki 170.
Michaił Hierasimienka dadaŭ, što endapratezavańnie bujnych sustavaŭ, jakoje adnosicca da sacyjalna značnych apieracyj u Biełarusi, pravodzicca ŭ 46 klinikach. A siarod zadač na 2025 hod — skarot čakańnia na endapratezavańnie tazaściehnavaha sustava da 6 miesiacaŭ, kalennaha — da 12 miesiacaŭ. Dla inšych płanavych apieracyj praduhledžvajecca čakańnie da adnaho miesiaca.
U Biełarusi ŭžo nie pieršy hod zastajecca niavyrašanaj prablema z čerhami na zamienu sustavaŭ. Raniej, u mai 2023 hoda, Alaksandr Łukašenka patrabavaŭ da kanca taho hoda praapieravać usich, chto na toj momant stajaŭ u čarzie na endapratezavańnie bujnych sustavaŭ.
Kamientary
heta jak? žestačajše? niepracazdolnym staviać ajčynnyja. pracazdolnym niamieckija. ale ich 3 hady čakać. łukašenka chacieŭ usim ciap-lap pastavić ajčynnyja? a chto budzie pracavać?