Prezident ZŠA Donald Tramp zajaviŭ, što Iran sutykniecca ź niabačanymi raniej bambardziroŭkami, kali nie zaklučyć pahadnieńnie sa Złučanymi Štatami ab raspracoŭcy jadziernaj zbroi. Pra heta Tramp zajaviŭ 30 sakavika padčas telefonnaj razmovy z NBC News.

Tramp pryhraziŭ Iranu vajennymi dziejańniami, kali kraina nie zaklučyć pahadnieńnie z ZŠA, jakoje budzie harantavać, što Iran nie budzie raspracoŭvać jadziernuju zbroju.
«Kali jany nie zaklučać pahadnieńnie, budzie bambavańnie. Heta buduć bambardziroŭki, jakich jany nikoli raniej nie bačyli», — zajaviŭ prezident ZŠA, dadaŭšy taksama, što ŭviadzie suprać Irana druhasnyja taryfy.
Pa słovach Trampa, amierykanskija i iranskija aficyjnyja asoby «viaduć pieramovy» z hetaj nahody.
Miž tym u niadzielu prezident Irana Masud Piezieškijan zajaviŭ, što adchilaje niepasrednyja pieramovy z ZŠA ab iranskaj jadziernaj prahramie, što stała pieršym adkazam krainy na list, nakiravany Trampam viarchoŭnamu lidaru Isłamskaj Respubliki.
U pačatku sakavika Tramp zajaviŭ, što nakiravaŭ viarchoŭnamu lidaru Irana ajatale Ali Chamieniei list z prapanovaj ab iranskaj jadziernaj prahramie. Pavodle infarmacyi krynic vydańnia Axios, list Trampa da Chamieniei byŭ «žorstkim» i ŭtrymlivaŭ nie tolki prapanovu pieramoŭ ab novaj jadziernaj uhodzie, ale i nastupstvy, kali Tehieran jaje adkinie.
Paśla ciapierašnich pahroz Trampa Uzbrojenyja siły Irana padrychtavali rakiety, jakimi zmohuć nanosić udary pa pazicyjach, źviazanych z ZŠA. Pra heta paviedamiła Tehran Times sa spasyłkaj na ŭłasnyja danyja. Pavodle infarmacyi miedyja, «značnuju kolkaść» hatovych da zapusku rakiet užo raźmiaścili ŭ padziemnych schoviščach, zdolnych vytrymać avijaŭdary.
Kamientary