Prysud asudžanamu na 11 hadoŭ ksiandzu Akałatoviču pakinuli bieź źmienaŭ
64-hadovaha chvoraha śviatara adpraviać u kałoniju ŭzmocnienaha režymu. Akramia taho, kanfiskavali ikony i patrabujuć vypłatu vialikaj sumy.
U Viarchoŭnym sudzie Biełarusi 1 krasavika razhladzieli skarhu na rašeńnie Minskaha abłasnoha suda pa spravie katalickaha śviatara Hienrycha Akałatoviča. Nastajaciel parafii ŭ Vałožynie byŭ asudžany pa abvinavačvańni ŭ «zdradzie dziaržavie» na 11 hadoŭ źniavoleńnia, ale nie pryznaŭ siabie vinavatym i abskardziŭ prysud, piša katolik.life.
Vierniki daviedalisia pra vynik razhladu spravy — Viarchoŭny sud admoviŭ u zadavalnieńni skarhi ksiandza Akałatoviča i pakinuŭ bieź źmienaŭ rašeńnie abłasnoha suda.
Akramia vialikaha terminu śviataru byŭ prysudžany bujny štraf, taksama patrabujuć vypłatu jašče niekalkich sum, u cełym heta ekvivalentna pryblizna 1 miljonu jeŭra. Ale viernikam dakładna nieviadomy prysud, tamu jany nie razumiejuć, na jakoj padstavie ŭźnikła takaja zachmarnaja suma.
Pavodle źviestak, što dajšli da viernikaŭ, bolšaja častka hetaj sumy nie vypłačana. Častkova jaje pahasili za košt kanfiskavanych padčas pieratrusu hrošaj śviatara i parafii. Taksama viernikam viadoma, što KDB kanfiskavaŭ nie tolki hrošy, ale i ikony, niekatoryja ź jakich, u tym liku adna staradaŭniaja, nie naležali ksiandzu Hienrychu, a tolki zachoŭvalisia ŭ jaho.
«Źbieražeńni, jakija jamu naležali, jon źbiraŭ sabie na staraść. Bo viadoma, što ŭ śviataroŭ niama pracoŭnaha stažu, tamu jany mohuć raźličvać tolki na samuju minimalnuju piensiju, na jakuju pražyć niemahčyma. A ciapier hetyja hrošy zabrali i jašče patrabujuć zachmarnuju sumu. Spadziajucca, što Vatykan zapłacić? Niaŭžo heta nasamreč torh za hrošy?» — zadajucca pytańniem vierniki.
Takim čynam, rašeńnie suda ŭstupaje ŭ siłu, i ŭ chutkim časie śviatara pavinny nakiravać u kałoniju ŭzmocnienaha režymu.
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary