Amierykaniec Anton Ros, jaki pryjechaŭ ź Litvy ŭ hruzavym vahonie, maje prablemy z pamiaćciu. Jaho šukaje palicyja Ciurycha
Biełaruskaja prapahanda pakazała viečaram 3 krasavika hramadzianina ZŠA Antona Rosa. Jak vyśvietliłasia, chłopca z 21 sakavika šukaje maci. Anton pakutuje na stratu pamiaci.
Apošni raz jaho bačyli ŭ Ciurychu — jon sprabavaŭ vylecieć u Churhadu. Abjavy z prośbaj dapamahčy ŭ pošukach Antona Rosa, 27 hadoŭ, byli apublikavanyja ŭ roznych ruskamoŭnych hrupach u fejsbuku 5 dzion tamu. Chłopca šukaje maci. Paviedamlajecca, što jon apošni raz vychodziŭ na suviaź z aeraporta Ciurycha, piša Reform.news.
«Anton Ros, 27 hadoŭ, hramadzianin ZŠA i Čechii, svabodna razmaŭlaje pa-anhlijsku (biez akcentu), pakutuje na stratu pamiaci. Jon užo niekalki razoŭ za apošnija miesiacy źnikaŭ, nie vychodziŭ na suviaź i źjaŭlaŭsia ŭ roznych miescach. U śniežni 2024 hoda straciŭ dakumienty i asabistyja rečy. Moža znachodzicca ŭ stanie dezynaryjentacyi, nie pamiatać, chto jon, i nie źviartacca pa dapamohu», — havorycca ŭ abjavie.
21 sakavika Anton šmat razoŭ zvaniŭ z čužych telefonaŭ, prasiŭ nabyć bilet u Churhadu. Jaho maci admoviłasia i terminova vyjechała ŭ aeraport Ciurycha. Pavodle infarmacyi palicyi, Anton znachodziŭsia tam da 6:00 ranicy 22 sakavika, ale ŭžo nie byŭ u terminale na momant prybyćcia maci a 7:40.
23 sakavika žančyna padała aficyjnuju zajavu ŭ palicyju Ciurycha ab vyšuku. Jana mierkavała, što Anton moh znachodzicca ŭ lubym rajonie Ciurycha ci inšym horadzie Šviejcaryi, a taksama źviartacca da minakoŭ pa dapamohu, nie tłumačačysia.
Apošniaje viadomaje adzieńnie: śvietłaja kurtka, džynsy, ciomnaja kiepka. Da abjavy prykładziena fota źnikłaha chłopca — heta toj ža čałaviek, što i na videa biełaruskaj prapahandy.
Varta adznačyć, što biełaruskija prapahandysty ŭžo zajavili, što hramadzianin ZŠA žadaje zastacca ŭ Biełarusi.
«Tolki kali b možna było jak-niebudź zastacca… Maci skazać, što ŭsio dobra. Tut kormiać, pojać, ciopła, možna adpačyć. Nu, karaciej, umovy dobryja i ŭsio narmalna», — skazaŭ chłopiec na kamieru BT.
Antona zatrymali nočču 31 sakavika mytniki padčas pravierki čyhunačnaha sastavu. Byŭ raspačaty administracyjny praces za niezakonnaje pierasiačeńnie miažy.
Amierykaniec, jaki pryjechaŭ ź Litvy ŭ tavarnym vahonie, choča zastacca ŭ Biełarusi
Amierykaniec, jakoha znajšli ŭ tavarnym vahonie ŭ Maładziečnie, dvojčy sprabavaŭ trapić u Biełaruś aficyjna. Jaho departujuć
Amierykaniec, zatrymany na čyhuncy pad Maładziečnam, nijak nie źviazany z katastrofaj na palihonie
U Maładziečnie ŭ pustym vahonie znajšli 27-hadovaha amierykanca, jaki nielehalna trapiŭ u Biełaruś ź Litvy
Ciapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary
Nie błytajcie ciopłaje ź miakkim.