Paŭnočnakarejskija vojski šmat čamu navučylisia, vajujučy z Ukrainaj
Udzieł paŭnočnakarejskich vojskaŭ u bajavych dziejańniach na baku Rasii ŭ Kurskaj vobłaści staŭ dla Pchieńjana biesprecedentnaj mahčymaściu atrymać realny dośvied viadzieńnia bujnamaštabnaj vajny. Čamu navučylisia paŭnočnakarejskija sałdaty?
Jak adznačajuć aŭtary artykuła ŭ The Wall Street Journal, vyrašalnyja bai ŭ Kurskaj vobłaści, adkul ukrainskaja armija ŭžo ŭ asnoŭnym adstupiła, pakazvajuć, jak paŭnočnakarejskija vojski małankava adaptavali svaju sastarełuju taktyku da najbujniejšaha kanfliktu ŭ Jeŭropie z časoŭ Druhoj suśvietnaj vajny.
Upartaść i masavaść
Pieršyja vyłazki paŭnočnakarejcaŭ na pole boju ŭ śniežni adbyvalisia vialikimi hrupami biez padtrymki artyleryi, bieśpiłotnikaŭ abo braniatechniki, što rabiła ich lohkaj mišeńniu dla ŭkraincaŭ.
Niahledziačy na niedachop technałohij, užo ŭ pieršych bajach paŭnočnakarejcy vyznačalisia vysokaj fizičnaj vytrymkaj, fanatyčnaj addanaściu i hatoŭnaściu iści ŭ šturm pad ščylnym ahniom. Navat pry ciažkich stratach jany praciahvali nastupleńnie. Kali na ich napadali, jany trochi adstupali, pierahrupoŭvalisia i znoŭ nastupali.
Ale navat kali paŭnočnakarejcy ździajśniali nie vielmi prafiesijnyja dziejańni na poli boju, ukraincam było ciažka ŭziać ich u pałon, bo mnohija vybirali śmierć zamiest pałonu.
Dziesiacihodździ tamu paŭnočnakarejskich śpiecnazaŭcaŭ navučali zachoŭvać adnu kulu ŭ pistalecie dla siabie i cisnuć na kurok paśla kryku: «Niachaj žyvie lidar Kim Ir Sien!», kali ich brali ŭ pałon. Ciapier taktyka źmianiłasia — bajcy padryvajuć siabie hranataj.
Chutkaja adaptacyja
Aŭtary adznačajuć, što za niekalki miesiacaŭ bajoŭ paŭnočnakarejskija sałdaty zdoleli adaptavacca. Adna z samych chutkich adaptacyj adbyłasia ŭ baraćbie ź bieśpiłotnikami, jakija zapaŭniajuć nieba nad linijaj frontu. Kali ich upieršyniu razharnuli, paŭnočnakarejcy prosta hladzieli na drony, nie razumiejučy, što jany ŭjaŭlajuć saboj pahrozu. Ale vielmi chutka jany navučylisia taktycy, jakaja dazvalała paźbiahać ci źniščać ich.
Kab paźbiehnuć strat ad atak ukrainskich dronaŭ, paŭnočnakarejcy navučylisia abychodzić praciŭnika z fłanhu: adna častka ŭdzielničała ŭ atacy, a druhaja nanosiła ŭdar z tyłu. Taksama jany raźbivalisia na nievialikija hrupy, kab paźbiehnuć źniščeńnia.
Dakumienty, kanfiskavanyja ŭ paŭnočnakarejskich vajskoŭcaŭ, śviedčać pra dbajnuju fiksacyju pieramiaščeńniaŭ na poli boju i padrabiazny ŭlik vykarystanaha abstalavańnia.
Dakumienty pakazali, što paŭnočnakarejcy z usich sił sprabavali intehravacca z rasijskimi vojskami, adznačajučy, što im patrebnyja źviestki rasijskaj raźviedki pra miescy zapusku bieśpiłotnikaŭ abo pra artyleryjskija pazicyi Ukrainy, kab nanieści ŭdar na apiaredžańnie pa ich i minimizavać straty.
Znoŭ u bai
Paniosšy vielizarnyja straty na pačatkovym etapie, paŭnočnakarejskija vojski adyšli z pola boju pad Kurskam na pačatku studzienia. Jany viarnulisia prykładna praź miesiac, kali Rasija ŭzmacniła namahańni pa vyciskańni ŭkraincaŭ sa svajoj terytoryi.
Pavodle słoŭ ukrainskich vajskoŭcaŭ i analitykaŭ, z taho času paŭnočnakarejskija sałdaty stali adnymi z najbolš kaštoŭnych na poli boju dziakujučy lepšaj intehracyi z rasijskimi vojskami i pieradavoj taktycy ŭ spałučeńni z vynoślivaściu.
Jak adznačaje supracoŭnik ukrainskaj vajskovaj raźviedki, paŭnočnakarejskija kamandziry siadziać razam z rasijanami i pieradajuć instrukcyi na karejskaj movie. Na miescach ža paŭnočnakarejcy razumiejuć elemientarnyja ruskija słovy, jakija jany pavinny byli vyvučyć padčas padrychtoŭki.
U vajnie, dzie bieśpiłotniki zrabili vyžyvańnie piachoty jašče bolš składanym, hatoŭnaść paŭnočnakarejcaŭ nastupać pad ahniom — najvažniejšaja pieravaha. «Dziakujučy vielizarnaj masie, što rvanuła napierad, jany pačali advajoŭvać pazicyi», — kaža kapitan Aleh Šyrajeŭ, kamandzir 225-ha asobnaha šturmavoha pałka, jaki vajavaŭ suprać paŭnočnakarejskich sałdat u Kurskaj vobłaści.
Da lutaha ich vialikaja kolkaść, fizičnaja vytryvałaść i hatoŭnaść prasoŭvacca pad ahniom užo spałučalisia z palepšanaj taktyčnaj daśviedčanaściu, naprykład, ź pieramiaščeńniem nievialikimi hrupami, a taksama z padtrymkaj usiaho rasijskaha arsienała ŭzbrajeńniaŭ — ad płaniernych bombaŭ da artyleryi i vybuchovych bieśpiłotnikaŭ. Jany stali bolš intehravanymi z rasijskimi siłami, a kali paŭnočnakarejcy zaviaršali ataki, to rasijanie zvyčajna zajmali ich pazicyi.
Da siaredziny sakavika ŭkraincy ŭ asnoŭnym adstupili z Kurskaj vobłaści i abaraniali nievialiki ŭčastak na rasijskim baku miažy.
Nieacenny dośvied
«Jany płaciać kryvioju. Ale hety dośvied nie źniknie daremna», — cytuje vydańnie słovy kapitana Aleha Šyrajeva.
Bajavyja dziejańni dajuć paŭnočnakarejcam bahaty dośvied na poli boju. Ciapier hetyja navyki možna pieraniać i raspaŭsiudzić pa ŭsioj vielizarnaj armii krainy. Heta niepakoić praciŭnikaŭ Paŭnočnaj Karei ŭ Sieule i Tokia, jakija i biez taho sutykajucca ź jadziernaj pahrozaj z boku Pchieńjana, jakaja ŭzrastaje.
Choć Kim nie pryznaŭ fakt adpraŭki paŭnočnakarejskich vojskaŭ u Rasiju, jon zaklikaŭ svaich vajskoŭcaŭ vyvučać mahčymaści, prydatnyja dla viadzieńnia sučasnaj vajny, pakolki vajennyja kanflikty stanoviacca zvyčajnaj źjavaj va ŭsim śviecie.
Jak adznačajuć aŭtary, hledziačy na niaŭchilnaje prasoŭvańnie paŭnočnakarejcaŭ pad śmiarotnym ahniom Šyrajeŭ uśviadomiŭ klučavuju pieravahu, jakoj jany vałodajuć u paraŭnańni z ukraincami — vidavočnaje hrebavańnie kaštoŭnaściu čałaviečaha žyćcia, što pieraŭzychodzić navat rasijan.
«Čamu mienavita karejcy iduć u šturm? Jany lepš padrychtavanyja psichałahična i lepš padrychtavanyja fizična. U Kursku jany vykanali svaju misiju», — skazaŭ jon.
Pratasievič: U mianie niama nijakich pierśpiektyŭ, ja nikomu nie patrebien18
Kamientary