Prezident ZŠA Donald Tramp, viadomy svajoj niepradkazalnaściu, znoŭ ździviŭ śviet: jon prypyniŭ dziejańnie častki svaich ambicyjnych taryfaŭ usiaho praź niekalki hadzin paśla taho, jak jany ŭstupili ŭ siłu. Chto i što paŭpłyvała na hetaje rašeńnie, raspaviadaje The Wall Street Journal.
Rašeńnie ab 90-dzionnaj adterminoŭcy asnoŭnych elemientaŭ taryfnaj prahramy było abvieščana ŭ sieradu, kali Tramp, siedziačy ŭ Avalnym kabiniecie razam ź ministram finansaŭ Skotam Besentam i ministram handlu Hovardam Łatnikam, apublikavaŭ adpaviedny dopis u svajoj sacsietcy Truth Social.
Adnačasova jon pavysiŭ taryfy dla Kitaja, padkreśliŭšy, što jaho palityka zastajecca žorstkaj tam, dzie heta nieabchodna. Reakcyja rynkaŭ, jakija pajšli ŭ rost, dazvoliła administracyi padać hety krok jak stratehičny chod, a nie adstupleńnie.
Rola ministra finansaŭ
Pavodle krynic, klučavuju rolu ŭ pryniaćci rašeńnia adyhraŭ ministr finansaŭ Skot Besent. U niadzielu jon admysłova prylacieŭ u Fłarydu, kab sustrecca z prezidentam. Paśla sustrečy Besentu daručyli publična havaryć pra mahčymyja handlovyja pahadnieńni, što supakoiła mnohich u atačeńni Trampa — jany ŭbačyli ŭ im čałavieka, zdolnaha znajści vychad z kryzisu. Na borcie Air Force One, pa darozie ŭ Vašynhton, Besent zaklikaŭ Trampa zasiarodzicca na pieramovach, što stała važnym krokam da razvarotu.
Besent śćviardžaŭ, što bolš za 75 krain vykazali hatoŭnaść da dyjałohu ab źmiakčeńni taryfaŭ, i Japonija staić na čale śpisu. «My prymusili śviet sieści za stoł pieramovaŭ», — skazaŭ jon, padajučy paŭzu jak pieramohu amierykanskaj dypłamatyi.
Cisk z usich bakoŭ
Na rašeńnie Trampa ŭpłyvali nie tolki ŭnutranyja daradcy, ale i źniešnija siły. Padzieńnie rynkaŭ stała dla prezidenta tryvožnym sihnałam.
Biznes-elita taksama nie zastałasia ŭbaku. Telefon kiraŭnicy aparatu Biełaha doma Siuzi Uajłs (Susie Wiles) razryvaŭsia ad zvankoŭ kiraŭnikoŭ kampanij i łabistaŭ, jakija prasili źmiakčyć palityku. Bankiry, rasčaravanyja svaim słabym upłyvam na administracyju, źviarnulisia da respublikanskich kanhresmienaŭ, jakija adkryta papiaredzili Trampa pra ryzyku ekanamičnaha krachu.
Sam Tramp u pryvatnych razmovach pryznavaŭ, što jaho handlovaja palityka moža spravakavać recesiju, ale nastojvaŭ, što nie dapuścić depresii. U apošnija dni jon aktyŭna raiŭsia ź siabrami i daradcami, raspytvajučy pra situacyju na rynkach. Uviečary ŭ aŭtorak jon adznačyŭ, što rynak ablihacyj «vyklikaje zaniepakojenaść».
U sieradu ŭ Biełym domie jon paabiedaŭ ź finansistam i inviestaram Čarlzam Švabam (Charles Schwab), a taksama sustreŭsia z demakratyčnaj hubiernatarkaj Mičyhana Hretchen Uitmier (Gretchen Whitmer), jakaja papiaredziła, što taryfy ŭžo niehatyŭna ŭpłyvajuć na aŭtamabilnuju halinu štata. Choć hetyja sustrečy adbylisia paśla pryniaćcia rašeńnia, jany pakazali, što Tramp aktyŭna źbiraŭ mierkavańni z roznych bakoŭ.
Upłyŭ Dajmana
Tramp uvažliva sačyŭ za navinami. Asablivy ŭpłyŭ na jaho akazała intervju adnaho z samych upłyvovych ludziej amierykanskaj ekanomiki, kiraŭnika banka JPMorgan Chase Džejmsa Dajmana (James Dimon), jakoje vyjšła ŭ sieradu ranicaj na Fox Business.
Dajman, jaki nie mieŭ niepasrednaj suviazi z Trampam apošnija hady, zajaviŭ, što recesija — vierahodny vynik novaj taryfnaj palityki, chacia i padtrymaŭ ideju ŭmieranych taryfaŭ jak instrumienta palapšeńnia handlu.
Jon zaklikaŭ prezidenta dać Besientu čas na zaklučeńnie ździełak. Razumiejučy, što Tramp i jaho kamanda časta hladziać Fox, Dajman raźličvaŭ, što jaho pasłańnie dasiahnie mety.
Tramp pryznaŭ, što kančatkovaje rašeńnie pryniaŭ u sieradu ranicaj. Jon dadaŭ, što nie kansultavaŭsia ź jurystami pa farmuloŭkach i napisaŭ tekst razam z Besentam i Łatnikam:
«Pisali ad serca. My nie chočam škodzić tym, kamu škoda nie patrebnaja. Usie chočuć damaŭlacca».
Chaos u režymie realnaha času
Abviestka pra prypynieńnie taryfaŭ zastała źnianacku navat bližejšych sajuźnikaŭ Trampa. Handlovy pradstaŭnik ZŠA Džejmisan Hryr (Jamieson Greer), jaki ŭ toj momant vystupaŭ pierad kamitetam Pałaty pradstaŭnikoŭ, daviedaŭsia pra rašeńnie prezidenta ź jaho pasta ŭ sacsietcy. Demakrat Styvien Chorsford (Steven Horsford) aburaŭsia:
«Heta dyletanctva. Tak nielha. Jak vy možacie vieści pieramovy, kali prezident publikuje ŭsio heta ŭ tvitary z čort viedaje adkul?»
Besient, u svaju čarhu, skasavaŭ udzieł u abiedzie z najbujniejšaj kansiervatyŭnaj frakcyjaj u Kanhresie, bo jaho vyklikali na sustreču z Trampam, dzie i było pryniata kančatkovaje rašeńnie. Heta tolki padkreśliła impulsiŭny charaktar pracesu.
Stratehija ci impravizacyja?
Sajuźniki Trampa paśpiašalisia padać jaho krok jak majsterski chod. Finansist Bił Aksman, jaki raniej krytykavaŭ taryfy, nazvaŭ rašeńnie «bliskučym» i paraŭnaŭ jaho z taktykaj z knihi Trampa «Mastactva ździełki» (1987).
Besent i inšyja čynoŭniki nastojvali, što žorstkaja pazicyja była patrebnaja, kab zmusić śviet da pieramovaŭ, a pavyšanyja taryfy na Kitaj stali adkazam na dziejańni Piekina.
Adnak krytyki bačać u hetym jašče adzin prykład niepaśladoŭnaści.
«Niełahičnaść hetaj stratehii stała vidavočnaj nie tolki na rynkach, ale i ŭ čakańniach bolš hłybokich ekanamičnych prablem», — adznačyŭ Mark Šort (Marc Short), były kiraŭnik aparatu vice-prezidenta Majka Piensa.
Adnak jon pryznaŭ, što Tramp uvažliva vyvučaje situacyju na rynkach i słuchaje ludziej pa-za miežami Biełaha doma.
Ciapier čytajuć
U piensijaniera z Paleśsia — 92 unuki. I heta rekord7
Kamientary
(Sam stvaryŭ prablemu, sam vyrašyŭ).