U Kitai prajšoŭ paŭmarafon z udziełam robataŭ i ludziej. U ludziej atrymałasia lepš
U paŭmarafonie ŭ Piekinie pobač ź ludźmi biehli čałaviekapadobnyja robaty. Ich było 21. Robat-pieramožca pa imieni Tiangong Ultra prabieh 21 kiłamietr za dźvie hadziny sorak chvilin — bolš čym u dva razy marudniej, čym samy chutki čałaviek. Inšyja robaty akazalisia jašče mienš paśpiachovymi, piša Bi-bi-si.
Choć robaty ŭžo źjaŭlalisia na marafonach i raniej, heta pieršy vypadak, kali jany spaborničali ź ludźmi na takoj dystancyi. Trasa ŭklučała padjomy, pavaroty i niaroŭnyja ŭčastki. Niekatoryja robaty zdoleli zaviaršyć zabieh, a niekatoryja mieli ciažkaści z samaha pačatku.
Adzin robat upaŭ na startavaj linii i pralažaŭ niekalki chvilin, potym padniaŭsia i znoŭ pačaŭ biehčy. Jašče adzin prabieh niekalki mietraŭ i ŭrezaŭsia ŭ aharodžu, u vyniku čaho jaho apieratar-čałaviek upaŭ. Usie robaty byli vyrableny ŭ Kitai roznymi kampanijami.
Jany byli samych roznych formaŭ i pamieraŭ: adny nižejšyja za 120 sm, inšyja — rostam da 180 sm. Adna z kampanij chvaliłasia, što jaje robat vyhladaje amal jak sapraŭdnaja žančyna i ŭmieje padmirhvać i ŭśmichacca.
Niekalki robataŭ biehli ŭ krasoŭkach, adzin byŭ u baksiorskich palčatkach, a jašče adzin nasiŭ čyrvonuju paviazku z nadpisam «Asudžany na pieramohu» na kitajskaj movie.
Kampanii testavali svaich robataŭ na praciahu niekalkich tydniaŭ pierad zabieham, a na spabornictva miechaničnyja biehuny prybyli razam sa svaimi čałaviečymi trenierami. Uličvajučy nieabchodnaść u inžyniernych i navihacyjnych kamandach, mierapryjemstva nahadvała aŭtahonku.
Pieramožca Tiangong Ultra — raspracoŭka Piekinskaha inavacyjnaha centra čałaviekapadobnaj rabatatechniki. Jon prabieh dystancyju za 2 hadziny 40 chvilin (pieramožca-čałaviek — za 1 hadzinu 2 chviliny).
Hety inavacyjny centr na 43% naležyć dziaržavie, a astatniuju dolu paroŭnu dzielać pamiž saboj technałahičny hihant Xiaomi i viadučaja kitajskaja kampanija pa vytvorčaści humanoidnych robataŭ UBTech.
Tan Cziań, techničny dyrektar centra, ličyć, što Tiangong Ultra pakazaŭ dobry vynik dziakujučy doŭhim naham i ałharytmu, jaki dazvalaje imitavać čałaviečy bieh.
«Ja nie chaču chvalicca, ale, dumaju, nivodnaja zachodniaja rabatatechničnaja kampanija nie dasiahnuła takich spartyŭnych pośpiechaŭ, jak Tiangong», — zajaviŭ jon Reuters, dadaŭšy, što robat źmianiaŭ batarei ŭsiaho try razy padčas honki. Pavodle jaho słoŭ, u dalejšym centr źbirajecca zasiarodzicca na raźvićci pramysłovaha prymianieńnia čałaviekapadobnych robataŭ, «kab jany mahli pa-sapraŭdnamu pryjści na fabryki, u dziełavyja śfiery, a zatym i ŭ damy».
Ałan Fiern, prafiesar infarmatyki i rabatatechniki Univiersiteta štata Arehon, nie pahadziŭsia z tym, što heta praryŭ u vykarystańni ŠI, bo prahramnaje zabieśpiačeńnie, jakoje dazvalaje humanoidnym robatam biehčy, było raspracavana i prademanstravana bolš za piać hadoŭ tamu.
«Kitajskija kampanii sapraŭdy zasiarodžvajucca na demanstracyi chady, biehu, tancaŭ i inšych akrabatyčnych zdolnaściaŭ. U cełym heta cikavyja demanstracyi, ale jany mała havorać pra ŭtylitarnuju karysnaść abo pra niejki bazavy intelekt», — zajaviŭ jon Reuters.
Ciapier čytajuć
«Franak, adnosiny pamiž ludźmi mohuć budavacca nie tolki na manipulacyjach». Prakop‘jeŭ daŭ vodpaviedź Biaspałavu. I Viačorku44
Kamientary