ZŠA prypynili sankcyi suprać iranskaj nafty

ZŠA prypynili na 60 dzion dziejańnie sankcyj, jakija na praciahu dziesiatkaŭ hadoŭ zabaraniali handal naftaj i naftapraduktami ź Irana za dalary, piša Bi-bi-si.

Ministerstva finansaŭ ZŠA vydała licenziju, jakaja da 21 žniŭnia dazvalaje bankaŭskaje absłuhoŭvańnie i strachavańnie vytvorčaści, transpartavańnia i handlu iranskaj naftaj i naftachimičnaj pradukcyjaj za dalary. Heta aznačaje, što Iranu dla hetych metaŭ bolš nie spatrebicca vybudavany im składany łancužok pasiarednikaŭ. Ad hetaha času naftu možna budzie ŭvozić navat naŭprost ź Irana ŭ ZŠA.

U amierykana-iranskim miemarandumie ab uzajemarazumieńni, padpisanym 17 žniŭnia, utrymlivajecca abaviazacielstva ZŠA źniać «usie vidy sankcyj», uviedzienych suprać Irana.

Sankcyi suprać Irana ŭvodzilisia na praciahu mnohich hadoŭ — jak z boku ZŠA, tak i na šmatbakovym uzroŭni: Radaj biaśpieki AAN i Mižnarodnym ahienctvam pa atamnaj enierhii (MAHATE). ZŠA abaviazalisia damahčysia admieny i mižnarodnych sankcyj taksama.

Prypyniajučy dziejańnie svaich sankcyj, administracyja Trampa zrabiła pieršy krok da vykanańnia hetaha abaviazacielstva. U tym ža miemarandumie ab uzajemarazumieńni punkt 10 havoryć, što da kančatkovaj admieny sankcyj Minfin ZŠA abaviazvajecca vydać časovyja licenzii na absłuhoŭvańnie iranskaha naftavaha siektara.

U zajavie ministra finansaŭ ZŠA Skota Biesenta havorycca, što sa svajho boku Iran abaviazaŭsia na praciahu hetych ža 60 dzion nie pierakryvać Armuzski praliŭ i dapuścić inśpiektaraŭ MAHATE.

Taksama ŭ paniadziełak vice-prezident Džej Dzi Vens zajaviŭ žurnalistam, što abmierkavańni pra viartańnie ŭ Iran inśpiektaraŭ MAHATE «mohuć pačacca ŭžo siońnia», a sam praces «jak minimum pačniecca na hetym tydni».

Adnak Iran heta admaŭlaje. MZS krainy zajaviła dziaržaŭnamu ahienctvu IRNA, što nijakich novych abaviazacielstvaŭ na pieramovach z ZŠA, jakija prajšli ŭ niadzielu z udziełam Vensa, Iran nie braŭ. U miemarandumie ab uzajemarazumieńni ŭsio, što datyčycca iranskaj jadziernaj prahramy, nazyvajecca pradmietam vynikovaj ździełki, jakuju jašče treba budzie zaklučyć. Uzajemadziejańnie ź inśpiektarami MAHATE budzie adbyvacca «ŭ ramkach isnujučych pracedur, ustanoŭlenych parłamientam i Vyšejšaj radaj nacyjanalnaj biaśpieki», zajaviŭ pradstaŭnik iranskaha MZS Esmaił Bahaj.

MAHATE pakul nie kamientavała hetaje pytańnie.

Iran prypyniŭ dostup inśpiektaraŭ arhanizacyi da abjektaŭ, jakija byli padvierhnutyja bambardziroŭkam ZŠA i Izraila ŭ chodzie 12‑dzionnaj vajny minułym letam. Na praciahu miesiaca paśla hetaha ŭsie inśpiektary pakinuli krainu.

• 1
• 0
• 0
• 0
• 0
• 0
• 0
• 0