Francyja i Kanada adkryli konsulstvy ŭ Hrenłandyi

Na cyrymonii adkryćcia kanadskaha konsulstva prysutničali ministr zamiežnych spraŭ krainy Anita Anand i Mery Sajman, jakaja zajmaje pasadu hienierał-hubiernatara Kanady, paviedamlaje Deutsche Welle.

Sajman zajaviła, što adkryćcio kanadskaha pradstaŭnictva ŭ Nuuku nie tolki ŭmacoŭvaje dypłamatyčnyja suviazi, ale i «paćviardžaje pavahu Kanady da naroda Hrenłandyi, pavahu da vašaj demakratyi, vašaha suvierenitetu i vašaha prava farmiravać ułasnuju budučyniu».

U svaju čarhu Žan-Nael Puarje, jaki staŭ konsułam Francyi na vostravie, zajaviŭ, što «kali ŭźnikaje kryzis, my arhanizoŭvajemsia, kab być na miescy padziej». Jon taksama adznačyŭ, što stavić pierad saboj zadaču «zrazumieć pazicyju hrenłandcaŭ», a Francyja budzie hatovaja padtrymać miascovych žycharoŭ, «kali jany i dacki bok hetaha pažadajuć». Pry hetym u francuzskaha konsulstva pakul niama pastajannaha adrasa na vostravie.

Francyja pryznaje: adkryćcio konsulstva ŭ Hrenłandyi — palityčny sihnał

Adkryćcio konsulstvaŭ Francyi i Kanady ŭ Hrenłandyi adbyvajecca na fonie raniejšych zajaŭ prezidenta ZŠA Donalda Trampa pra žadańnie ŭklučyć paŭnočny vostraŭ u skład Złučanych Štataŭ.

Raniej ministr zamiežnych spraŭ Francyi Žan-Nael Baro padkreśliŭ, što adkryćcio konsulstva na vostravie źjaŭlajecca «palityčnym sihnałam, źviazanym z žadańniem uzmacnić prysutnaść Francyi ŭ Hrenłandyi». Pra heta stała viadoma jašče letam 2025 hoda, kali francuzski prezident Emanuel Makron naviedaŭ vostraŭ na fonie palityčnaj napružanaści.

Kanada ž zajaŭlała pra namier adkryć konsulstva ŭ Hrenłandyi jašče ŭ 2024 hodzie — da viartańnia Trampa na pasadu prezidenta. U Atavie takija płany tłumačyli imknieńniem da taho, kab kiravańnie Arktykaj ažyćciaŭlałasia «arktyčnymi dziaržavami ŭ partniorstvie z karennymi narodami».

Tramp adklikaŭ svaje patrabavańni nakont Hrenłandyi

Donald Tramp nieadnarazova zajaŭlaŭ, što Hrenłandyja «tak ci inakš» pavinna pierajści pad kantrol ZŠA, pakolki heta vyspa adyhryvaje klučavuju rolu ŭ zabieśpiačeńni biaśpieki Arktyčnaha rehijona, a taksama z punktu hledžańnia nacyjanalnych intaresaŭ biaśpieki Złučanych Štataŭ.

Dackija i inšyja jeŭrapiejskija čynoŭniki ŭ adkaz nahadvali, što Hrenłandyja, jakaja źjaŭlajecca aŭtanomnaj terytoryjaj Danii, užo abaronienaja normami kalektyŭnaj abarony NATA. Akramia taho, amierykanskaja vajskovaja prysutnaść na vostravie zabiaśpiečanaja pahadnieńniem 1951 hoda.

U studzieni Tramp pahražaŭ uvieści myty suprać krain, jakija nakiravali vajskoŭcaŭ u Hrenłandyju ŭ miežach misii Arctic Endurance («Arktyčnaja tryvałaść»), — Hiermanii, Danii, Narviehii, Šviecyi, Francyi, Vialikabrytanii, Niderłandaŭ i Finlandyi. Adnak nieŭzabavie prezident ZŠA admoviŭsia ad eskałacyi kanfliktu: jon zajaviŭ, što padčas sustrečy z hienieralnym sakratarom NATA Markam Rute byŭ znojdzieny kampramis. Padrabiaznaściaŭ damoŭlenaściaŭ udzielniki abmierkavańnia nie ahučyli.

• 3
• 0
• 0
• 0
• 0
• 0
• 1
• 0