U śpisie mahčymych Papaŭ dadaŭsia i kardynał, jaki naviedvaŭ biełaruskich palitviaźniaŭ
Paśla śmierci Papy Franciška śviet čakaje imia novaha duchoŭnaha lidara 1,3 miljarda katalikoŭ. U liku hałoŭnych kandydataŭ adrazu niekalki jarkich fihur — kožny sa svaim padychodam da viery i mižnarodnaj palityki. Simpatyi da Ukrainy vykazvaje kardynał Kłaŭdya Hudžeroci ź Italii, piša BILD. Hudžeroci taksama dobra viadoma biełaruskim viernikam.
69-hadovy vatykanski ijerarch dobra viadomy biełaruskim viernikam, bo z 2011 pa 2015 hod byŭ apostalskim nuncyjem u našaj krainie.
U vieraśni 2012 hoda Kłaŭdya Hudžeroci zrabiŭ vizit u turmy, dzie ŭtrymlivalisia biełaruskija palityčnyja źniavolenyja, što staŭła znakavym aktam duchoŭnaj padtrymki i mižnarodnaj uvahi da situacyi z pravami čałavieka ŭ Biełarusi.
Jon naviedaŭ niekalki pienitencyjarnych ustanoŭ, dzie asabista pieradaŭ vitańni i duchoŭnuju padtrymku palitviaźniam ad Papy Bieniedykta XVI. Siarod ich byli, naprykład, Aleś Bialacki, Źmicier Daškievič, Pavieł Sieviaryniec.
Taksama Kłaŭdya Hudžeroci spryčyniŭsia da viartańnia ŭ krainu Tadevuša Kandrusieviča, jakoha ŭłady ŭ 2020 hodzie nie puskali nazad.
Nuncyj Hudžeroci nieadnarazova maliŭsia na Dziady ŭ Kurapatach, a kali byŭ nuncyjem u Vialikabrytanii, pieryjadyčna naviedvaŭ Biełaruskuju biblijateku imia Skaryny ŭ Łondanie.
Hudžeroci taksama doŭhi čas pracavaŭ u Kijevie i Tbilisi, a ciapier uznačalvaje vatykanskuju strukturu pa spravach uschodnich cerkvaŭ. Na dumku naziralnikaŭ, jon «idealnaje spałučeńnie dypłamata i pastyra» — i adzin ź niamnohich u Vatykanie, chto adkryta padtrymlivaje Ukrainu, piša BILD.
Kamientary