Prarasijskija aktyvisty pačali ckavać Juryja Žyhamonta, jaki viarnuŭsia na jutub z «Padarožžami dyletanta»
Lubimaja mnohimi biełarusami pieradača pra biełaruskija miaściny i pra luboŭ da biełaruskaj historyi praź niekalki hadoŭ viarnułasia na jutub i vyklikała šalenstva ŭ prarasijskich aktyvistaŭ. «Va Ukrainie ŭsio taksama pačynałasia z «cikavostak», — piša Azaronak.
Prahrama «Padarožža dyletanta» — heta videaprajekt, u jakim Juryj Žyhamont padarožničaje pa roznych biełaruskich miaścinach, raskazvaje pra minułaje, architekturu, admietnaści, tradycyi, miascovyja lehiendy i duchoŭnuju spadčynu. Robić viadučy heta ź vializarnaj ciepłynioj i pavahaj da biełaruskaj kultury.
U mai 2025 hoda vyjšaŭ novy vypusk, pryśviečany Hierviatam Hrodzienskaj vobłaści.
Viartańnie lehiendarnaha nacyjanalnaha prajekta ŭ krainie, jakuju Kreml rychtuje da anieksii Rasijaj, aburyła prapahandystaŭ.
«Źnianacku, raptam i na radaść usim ekstremistam vylez z-pad plintusa Juraś Žyhamont», — napisaŭ Azaronak. I dadaŭ, što, maŭlaŭ, rasijskaja ahresija pačałasia ź cikavaści va Ukrainie da ŭsiaho nacyjanalnaha. «Va Ukrainie ŭsio taksama pačynałasia z «cikavostak», — tak napisaŭ jon.
Prapahandyst Vadzim Hihin taksama dałučyŭsia da ckavańnia.
«Padarožžy dyletanta» — častka typovaha zmaharskaha bahažu. U svoj čas hetaja pieradača naniesła niamała škody, farmirujučy alternatyŭnaje «krajaznaŭstva» nacyjanalistyčnaha hatunku. I ja pryniaŭ udzieł u vyhnańni hetaj prahramki z efiru Biełteleradyjokampanii.
Što ž, zrabić razhromnuju recenziju na «Padarožžy» ciažkaściaŭ nie składała: tam byŭ lap na lapie i lapam pahaniała. A Juryj Uładzimiravič Azaronak, tady namieśnik staršyni na BT, pryniaŭ adpaviednaje rašeńnie», — chvalicca Hihin.
Prarasijski aktyvist Siarhiej Łušč, jaki, jak dakazali, biare hrošy na antybiełaruskuju dziejnaść ad Kramla, raskazaŭ, što niekali pracavaŭ mantažoram na prahramie «Padarožžy dyletanta».
Łušč pryjšoŭ na efir da Ryhora Azaronka, kab vylić brud na byłoha kalehu.
Łušč abvinavaciŭ Žyhamonta ŭ rusafobii, dyletantyźmie i mifabudaŭnictvie — maŭlaŭ, viadučy prahramy prydumlaŭ historyju navat biez scenara, na chadu.
Łušč raskazaŭ, što kali jašče byŭ mantažoram na prahramie, užo tady napisaŭ danos kiraŭnictvu STB, što prahrama — rusafobskaja. I tady Žyhamonta zvolnili.
A da hetaha — zvolnili z BT. Zrabiŭ heta pa danosie Hihina Juryj Azaronak, baćka Ryhora.
Tady Žyhamont tłumačyŭ «KP», čamu prahramu źniali z efiru — «z-za niapravilnaj padačy infarmacyi».
Maŭlaŭ, knižki, jakija aŭtary čytajuć dziela padrychtoŭki da pieradačy, — niapravilnyja, prahrama nie karysnaja dla hledača, Ivan Hrozny, akazvajecca, vyzvaliŭ Biełaruś ad usiaho polskaha i litoŭskaha. A Kastuś Kalinoŭski — polski zdradnik, jaki chacieŭ pradać Biełaruś Polščy. Taksama Žyhamontu skazali, što zvarotu «šanoŭnaje panstva» ŭ Biełarusi nikoli nie było». «Treba kazać: «Pavažanyja hledačy…» — tłumačyŭ tady Žyhamont.
Ciapier čytajuć
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca4
Kamientary
[Zredahavana]