Kaleha pamierłaha vykładčyka Ščukina: Jaho kinuła žonka ź dziećmi, pačałasia depresija. U vyniku zvolnili za prahuły
29 maja stała viadoma, što ŭ dvoryku BNTU pry sprobie zatrymańnia pamior vykładčyk — eks-zahadčyk kafiedry vyšejšaj matematyki fakulteta infarmacyjnych technałohij i robatatechniki. Va ŭniviersitecie skazali, što pryčynaj śmierci 47-hadovaha Michaiła Ščukina staŭ sardečny prystup. Praŭda, u aficyjnym kamientary staličnaj milicyi fakt śmierci, jak i jaje pryčyny, zusim apuskajucca.
«Naša Niva» pahutaryła pra situacyju z vykładčykam BNTU. Jon nie vieryć u viersiju pra raptoŭny sardečny prystup, jaki zdaryŭsia sam pa sabie, i schilajecca da taho, što pryčynaj śmierci Michaiła Ščukina byli dziejańni milicyjanieraŭ.
Jon pierakazaŭ, što zaraz abmiarkoŭvajuć va ŭniviersitecie.
Michaił Ščukin skončyŭ miechanika-matematyčny fakultet Biełaruskaha dziaržaŭnaha ŭniviersiteta. Vykładać pačaŭ z 2003 hoda, z 2014-ha pracavaŭ na kafiedry vyšejšaj matematyki, byŭ jaje zahadčykam. Mieŭ bolš za 30 drukavanych navukovych i navučalna-mietadyčnyja prac, adkazvaŭ za arhanizacyju navukova-daśledčaj pracy sa studentami. Taksama jon prapanoŭvaŭ svaje pasłuhi ŭ jakaści repietytara — jaho siaredni rejtynh na prafiesijnym sajcie — 4,69 pa piacibalnaj škale. Mužčyna byŭ žanaty, mieŭ dvaich dziaciej.
Jak śćviardžaje surazmoŭca, Ščukin trapiŭ na fakultet biez propusku i płanavaŭ parazmaŭlać z kiraŭnictvam.
«Jon chacieŭ, kab jaho znoŭ uziali na pracu. Nie ŭjaŭlaŭ siabie biez BNTU. Heta byŭ kruty matematyk, viadomy ŭ vuzkich kołach. Ale da jaho nichto nie vychodziŭ — i paśla zakruciŭsia kanflikt».
Heta paćviardžaje viersiju milicyi pra «niezakonnaje traplańnie Ščukina na terytoryju ŭniviersiteta i kanflikt z administracyjaj», ale źniapraŭdžvaje čutki pra toje, što siłaviki chacieli zatrymać eks-vykładčyka pa padazreńni ŭ damahalnictvach.
Jašče ŭ krasaviku, zhodna z sajtam BNTU, proźvišča Ščukina było ŭ raskładzie pasiadžeńniaŭ kafiedry, što śviedčyć pra toje, što zvolnili jaho zusim niadaŭna.
U nieaficyjnym kanale siłavikoŭ taksama śćviardžałasia, što «vykładčyk byŭ zvolnieny pa zakančeńni terminu kantraktu, pakolki ŭ apošni čas pavodziŭ siabie nieadekvatna ŭ dačynieńni da studentaŭ i rabotnikaŭ, čaplaŭsia da maładzieńkich studentak». Naša krynica kaža, što mužčynu zvolnili najpierš za prahuły.
«Ad jaho žonka syšła i źjechała ź dziećmi, u jaho była depresija. Jon staŭ zły, šukaŭ tam niejkuju studentku — ci to hatavać, ci što jamu. Mahu skazać dakładna, što za zalacańni da studentak u BNTU nie zvalniajuć: tam takoha šmat. Ščukinu vidavočna była patrebnaja psichałahičnaja dapamoha, ale zvolnili jaho za prahuły. Nie za toje, što jon studentkam pisaŭ».
Surazmoŭca śćviardžaje, što pamiž Michaiłam Ščukinym i milicyjantami pry zatrymańni sapraŭdy zdaryłasia bojka, jakuju pradstaŭnik MUS u aficyjnym kamientary padaŭ tolki z adnaho rakursu: «pry zatrymańni minčuk nanios niekalki ŭdaraŭ supracoŭniku milicyi».
«Jon kamuści ź ich [milicyjanieraŭ] umazaŭ, nu i jaho [Ščukina] ciuknuli», — raskazvaje vykładčyk BNTU viersiju, jakaja hulaje pa ŭniviersitecie.
Pry hetym śćviardžaje, što śmierć Ščukina była hvałtoŭnaj, i ŭ hetym moža być pryčyna niedahavorvańniaŭ z boku milicyi: «Nijaki heta nie sardečny prystup».
Niahledziačy na toje, što zdareńnie ŭ BNTU adbyłosia jašče 28 maja, aficyjnyja kamientary z nahody źjavilisia tolki na nastupnyja sutki, i toje niapoŭnyja.
Čytajcie taksama: Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi
Pa stanie na 29 maja taksama była aktualnaja staronka ź infarmacyjaj pra Michaiła Ščukina jak supracoŭnika BNTU na aficyjnym sajcie. Jana źnikła tolki paśla ŭvahi da historyi z boku miedyja.
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary