Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi

Samaja zahadkavaja tema apošnich dzion u Biełarusi — śmierć 47-hadovaha vykładčyka BNTU Michaiła Ščukina. Nahadajem paśladoŭnaść padziej. Uviečary 28 maja ŭ telehram-kanale «Minčanin» było apublikavana 10-siekundnaje videa, źniataje va ŭnutranym dvoryku BNTU. Na im mužčyna vyryvajecca i sprabuje ŭciačy ad niekalkich achoŭnikaŭ. Što adbyvałasia dalej, nieviadoma, ale ŭ tym ža dopisie apublikavana fota, jak hety mužčyna lažyć miortvym, nakryty biełaj praścinaj.

Na nastupny dzień, paśla taho jak infarmacyja stała raźlatacca pa sacsietkach, adreahavali prapahandysty i siłaviki.

U blizkim da ŭładaŭ kanale «Narodny antyfejk» było vystaŭlena vaśmisiekundnaje videa, na jakim niekalki milicyjanieraŭ (ci achoŭnikaŭ) biahuć uśled za mužčynam, faktyčna supravadžajučy jaho. Rolik abryvajecca na momancie, kali mužčyna dabiahaje da asfaltu, na jakim pryparkavanyja aŭtamabili.

U milicejskim kanale «Advarotny bok» apublikavana fota taho, jak toj samy mužčyna staić na hanku ŭniviersiteta, a pobač ź im čaćviora siłavikoŭ i troje ŭ cyvilnym.

Byli apublikavanyja i dva skrynšoty pierapiski Ščukina sa studentkami.

Pavialičyć

Pavialičyć

Taksama ŭ kanale «Milicyja Minska» źjaviłasia videa, na jakim pradstaŭnik siłavikoŭ tłumačyŭ svaju viersiju taho, što adbyłosia. Maŭlaŭ, były vykładčyk sprabavaŭ trapić u VNU, zładziŭ kanflikt z administracyjaj. Kali pryjechała milicyja, to Ščukin nanios niekalki ŭdaraŭ pravaachoŭnikam i sprabavaŭ uciačy.

Va ŭsioj hetaj historyi zastajecca šmat niedahavoranaha. Adkazu na šmat jakija pytańni pakul niama.

Pavialičyć

1) Čamu apublikavana tolki vosiem siekund pahoni?

Na studenckim videa vykładčyk u šapcy i kurtcy vybiahaje z 11 korpusa BNTU (fakultet infarmacyjnych technałohij i robatatechniki) i ŭciakaje ad traich siłavikoŭ, adzin ź ich z aŭtamatam. Paśla jon zafiksavany va ŭnutranym dvary kala pomnika. Pamior Ščukin na parkoŭcy kala 9 korpusa. Ahułam jon i siłaviki prabiehli kala 400 mietraŭ. Heta nasamreč niemałaja adlehłaść, kab jaje pieraadoleć, niemaładomu vykładčyku treba 3-4 chviliny.

Z ulikam taho, što milicyjaniery majuć nahrudnyja videakamiery, niezrazumieła, čamu apublikavany tolki vosiem siekund pahoni. Niama ni pačatku kanfliktu — kab zrazumieć, pra što razmaŭlali siłaviki z vykładčykam, čamu jon vyrašyŭ biehčy, — ni apošnich momantaŭ pahoni — kali, jak miarkujecca, Ščukin upaŭ z sardečnym prystupam.

2) Dzie ŭdary pa milicyjanierach?

Milicyja śćviardžaje, što eks-vykładčyk akazvaŭ supraciŭ i nanios niekalki ŭdaraŭ milicyjanieram. Ale na jakim etapie? Pierad tym, jak kinuŭsia na ŭcioki? U kancy, kali jaho dahnali? MUS nie pryvodzić nivodnaha dokazu «supracivu», ni na adnym kadry ŭdaraŭ nie vidać.

Kali «ŭdarami» ličycca toj startavy momant sa studenckaha videa, kali Ščukin vykručvajecca i pačynaje biehčy, to heta ŭ čarhovy raz demanstruje chłuśniu z boku MUS. 

3) Čamu milicyja naŭmysna apuskaje fakt śmierci vykładčyka?

U raspoviedzie na abodvuch milicejskich kanałach ni razu nie zhadvajecca pra toje, što ŭ vyniku incydentu vykładčyk pamior. Milicejskaja pravierka nasamreč pavinna pravodzicca — ale pieradusim pa fakcie śmierci čałavieka. A ŭ pres-relizie siłavikoŭ havorka pra inšaje.

«Nievykanańnie zakonnych patrabavańniaŭ supracoŭnika orhanaŭ unutranych spraŭ pry vykanańni im słužbovych abaviazkaŭ ciahnie za saboj ustanoŭlenuju zakonam adkaznaść», — padkreślivajecca tam. Hučyć jak ździek — da jakoj adkaznaści vy pryciahniecie miortvaha Ščukina?

4) Pryjšoŭ da studentki ci da administracyi?

U prapahandystaŭ z «Narodnaha antyfejka» raskazvajecca, što pamiž Ščukinym i adnoj sa studentak adbyŭsia kanflikt, paśla čaho, maŭlaŭ, byli vyklikanyja supracoŭniki słužby biaśpieki.

U milicejskim «Advarotnym baku» inšaja praŭda: «Mužyk sa zvalnieńniem nie pahadziŭsia i na praciahu tydnia sprabavaŭ niezakonna prarvacca ŭ navučalnuju ŭstanovu, patrabujučy dać mahčymaść pradoŭžyć pravodzić zaniatki. Kali jon kančatkova ŭsich dastaŭ, supracoŭniki słužby achovy VNU vyklikali milicyju, kab sucišyć skandalista».

Jakaja ź viersij praŭdzivaja? I adkul uziałasia inšaja?

5) Jak i kali zvalniali Ščukina?

Źmiest apublikavanych skrynšotaŭ pierapiski vykładčyka i studentak pačvarny. Adnak kali jany praŭdzivyja, to atrymlivajecca, što kiraŭnictva ŭniviersiteta zapluščvała vočy na pavodziny Ščukina. Jon pracavaŭ 10 hadoŭ, byŭ zahadčykam kafiedry — i nijakaj infarmacyi pra dyscyplinarnyja spahnańni za damahalnictvy.

Havorycca, što jaho nibyta zvolnili pa skančeńni kantrakta. Ale fakt zakančeńnia kantrakta vykładčyka pasiarod navučalnaha hoda vyhladaje dziŭnym. Kantrakty zvyčajna nie padpisvajucca tak, kab skančvacca pierad siesijaj.

***

Uviečary 29 maja na staronkach «Minskaj praŭdy» supracoŭnik Ministerstva adukacyi, prapahandyst Andrej Łazutkin apublikavaŭ svaje razvahi pa temie. Darečy, jaho i raniej vykarystoŭvali dla padobnych situacyj — apublikavać pazicyju kiraŭnictva sistemy adukacyi (asabliva kali ministram byŭ Ihar Karpienka).

Łazutkin pryznaje, što ŭ situacyi, kali vykładčyk damahaŭsia studentki, ale nie było składu złačynstva (sproby zhvałtavańnia ci raspaŭsiudu parnahrafii), to jaho cicha zvalniajuć pa zhodzie bakoŭ.

Ale cikavaje nie heta: supracoŭnik Minadukacyi namiakaje na toje, što milicyjaniery ŭsio ž mahli prymianiać śpiecsrodki ŭ adnosinach vykładčyka. «Treba hladzieć, ci ŭžyvalisia ŭ dačynieńni da Ščukina śpiecsrodki i što stałasia pryčynaj śmierci — udar, padzieńnie, spynieńnie serca», — razvažaje Łazutkin.

• 2
• 0
• 4
• 12
• 4
• 1
• 14
• 0