Biełaruski IT-miljarder Hurski: Maju pieršuju žonku zabiŭ hiembler
Stvaralnik Flo raskazaŭ historyju svajho pośpiechu i tyja ciažkaści, ź jakimi daviałosia sutyknucca.
Juryj Hurski — biełaruski IT-pradprymalnik, biznes jakoha ciapier aceńvajecca ŭ $1 miljard, a jaho mabilnym dadatkam Flo aktyŭna karystajucca 68 miljonaŭ čałaviek.
U intervju jutub-prajektu «Eto Osietinskaja» jon raskazaŭ svaju historyju
Jak napisać biestsieler u 17 hadoŭ?
Svaju pieršuju knihu pra fotašop, jakaja ŭbačyła śviet u 2000 hodzie i stała biestsieleram, jon napisaŭ u 17 hadoŭ.
«Ja intuityŭna dobra zrazumieŭ nišu. Tady ja navat nie razumieŭ, što takoje niša, ja nie razumieŭ, što takoje rynak. […] Ale Rasija vielmi mocna adroźnivałasia ad inšaha śvietu ŭ płanie Photoshop, tamu što ŭ Rasii jon byŭ piracki. Adpaviedna, im karystalisia miljony. I ja zrazumieŭ, što ludzi vykarystoŭvajuć Photoshop dla amatarskich met, heta značyć adkarektavać fatahrafiju. I ja napisaŭ knihu dla amataraŭ i ich amatarskich met.
I heta było vielmi vialikaje traplańnie ŭ rynak, tamu što mienavita hety zapyt u rynka i byŭ. Photoshop u ludziej byŭ, i jany chacieli rabić niejkija prykolnyja štuki. U mianie tamu kniha nazyvałasia «Truki, efiekty, Photoshop», —
tłumačyć pryčynu pośpiechu Hurski.
«Ale tady ja zrabiŭ jašče adnu reč, jakuju potym šmat razoŭ paŭtaraŭ užo ŭ biznesie. Ja jaje zrabiŭ absalutna intuityŭna. Ja spačatku knihu vydaviectvu pradaŭ, a potym napisaŭ», — zhadvaje biznesmien i tłumačyć, što na toj momant jon užo napisaŭ u hazietu na hetuju temu sieryju artykułaŭ, jakija padabalisia ludziam.
Jak zhadvaje Juryj, «knihi prynosili na miesiac niekalki tysiač dalaraŭ tady, kali ŭ Biełarusi siaredni zarobak u lepšym vypadku byŭ sotnia dalaraŭ. To-bok dobry zarobak ličyŭsia 100, a 300 — heta ličyłasia karaleŭskim zarobkam».
Jak paznajomiŭsia ź Viktaram Prakapieniem
Jak zhadvaje Hurski, jon paznajomiŭsia z Viktaram Prakapieniem padčas vučoby pa prahramie Executive MBA.
«MBA mnie sapraŭdy dapamahło, ale nie z punktu hledžańnia viedaŭ, tamu što viedy, u pryncypie, bolš-mienš adpaviadali tamu, što ja moh uziać z knih. A z punktu hledžańnia traplańnia ŭ inšuju supolnaść. […] U nas byli tolki ŭładalniki biznesaŭ ci kiraŭniki.
Heta byŭ 2008 hod. Jakraz pačaŭsia kryzis. […] Usie pastupili na MBA, takija paśpiachovyja. […] U nas tady ŭ Biełarusi była dastatkova raźvitaja IT-halina. Byŭ tak zvany Park vysokich technałohij. [….] Pa sutnaści, heta asobny pravavy režym dla IT-kampanij, jaki dazvoliŭ halinie vyjści ŭ poŭnaściu biełuju zonu. […]
Kali ja zadumaŭ, što treba vychodzić u IT, ja staŭ dajmać svaich znajomych sa ŭsiakimi idejami. I voś Viktar [Prakapienia] nie ź pieršaha razu na heta adhuknuŭsia. Pa sutnaści, my zrabili heta jak adździeł unutry ŭžo isnujučaj [jaho] kampanii Viaden Media. Dla taho, kab zastacca ŭnutry Parka vysokich technałohij. Tamu što novaja kampanija patrabavała b taho, kab my jaje zavodzili [u PVT] nanoŭ».
U vyniku Prakapienia pryznačyŭ Hurskaha kiraŭnikom Viaden Media, što dazvoliła jamu raźvivać svoj napramak unutry kampanii, jakaja ŭžo daŭno isnavała na rynku i ŭvachodziła ŭ PVT.
Adkul u Hurskaha cikaŭnaść da fitnes-industryi
Hurski zhadvaje, što pieršymi praduktami, jakija jany vypuścili, byli krokamier i dadatak dla fitnesu.
Čamu mienavita jany? Jak tłumačyć biznesmien, vybar byŭ nie vypadkovym:
«U 24 hady ja važyŭ 140 kiłahramaŭ. (…) Adpaviedna, zaniaŭsia svaim zdaroŭjem, pachudzieŭ da 80. (…) I mnie vielmi nie padabałasia ŭ zale pisać na papiercy padychody. I ja prosta zrabiŭ dadatak pieradusim dla siabie, kab mnie było samomu zručna. I vyśvietliłasia, što ŭ hetym jość rynkavaja nieabchodnaść.
I dadatak nasamreč dobra pradavaŭsia. Hetak ža, jak i dobra išoŭ krokamier, tamu što ludziam było cikava, kolki jany nachodžvajuć. Heta była prosta vielmi zrazumiełaja rynačnaja niša ź vielmi zrazumiełym juzierskim bolem, jaki dobra spracavaŭ».
Akramia hetaha, uvahu da fitnes-praduktaŭ Hurski tłumačyć vopytam vypusku knih vydaviectvam «Picier-M», u jakim jon byŭ hienieralnym dyrektaram.
«My vypuskali dastatkova mnoha knih u śfiery zdaroŭja i razumieli, jak tam rabić kantent, jak heta pracuje na rynku, što zapatrabavana, i hetak dalej».
Jak zaŭvažaje Hurski, niahledziačy na toje, što biznes byŭ paśpiachovym, jon nie moh stać vialikim, «tamu što navat nie było sietak dla nabyćcia trafika, ničoha nie było».
«[Karystalniki] płacili adzin raz $1,99. Prosta za spampoŭvańnie. I faktyčna heta pryvodziła da taho, što da sotniaŭ tysiač dalaraŭ dabracca było zrazumieła jak, ale ŭžo, naprykład, da dziasiatkaŭ miljonaŭ na toj madeli dabracca było nievierahodna składana», — tłumačyć biznesmien.
Jak staŭ miljanieram
U 2011 hodzie kampanija Viaden Media była pradadziena, pa słovach Hurskaha, «za niekalki dziasiatkaŭ miljonaŭ» dalaraŭ. Jon atrymaŭ «kala 20 miljonaŭ».
«Ja dakładna pamiataju, što ŭ svaje 28 ja staŭ miljanieram i vielmi hetym hanaryŭsia. Hanarycca ŭvohule kiepska. Heta da dabra nie davodzić. Tamu što hanarlivaść ciabie nie prymušaje palapšacca. […] Ja čytaŭ vielmi viadomuju statystyku, što praktyčna nichto z zasnavalnikaŭ bujnych kampanij nie moh paŭtaryć [pośpiech]», — davodzić biznesmien i tłumačyć, što bujny pośpiech — heta šmat u čym źbieh vielmi vialikaj kolkaści abstavin.
«Kali pačynaješ aceńvać pośpiech i čamu ty tam apynuŭsia, to realna aceńvaješ, što šmat u čym mnie pašancavała. Šmat u čym ja apynuŭsia ŭ patrebnym miescy. Šmat u čym mnie pašancavała, što ja byŭ u Biełarusi, dzie praca kaštavała nie jak u Kalifornii. I my mahli prosta za hetyja hrošy heta zrabić. […] Mnie pašancavała, što my zmahli skarystacca infrastrukturaj i dośviedam Viktara. Ciapier ja b da hetaha staviŭsia značna spakajniej. Biez takoha, što ja małajčyna».
Čamu Hurski nie lubić hiemblinh
Juryj zhadvaje, što ŭ Viaden Media była častka, jakaja zajmałasia raspracoŭkaj internet-kazino. I hetaja častka biznesu jamu nie padabałasia.
Jak jon tłumačyć, hiemblinh jamu nie padabajecca pa niekalkich pryčynach.
«Ty vielmi lohka možaš acanić, što ty ŭnosiš u hety śviet. Ty prosta dumaješ: «Kali ja budu pracavać našmat lepš, ludziam budzie horš ci lepš?» I ŭjavi, što ŭ ciabie internet-kazino. I ty vielmi dobra pracuješ, u ciabie vielmi dobryja markietołahi, u ciabie ŭsio vielmi dobra. Što ty ŭnosiš u śviet? Značna bolš ludziej dojdzie da halečy, voś i ŭsio. […] Tam asnova — heta zaležnyja ludzi, chvoryja. I adpaviedna, potym hetyja ludzi prynosiać vielmi šmat u śviet prablem. I dla siabie, i dla inšych», —
tłumačyć Juryj i zhadvaje, što praź dziesiać hadoŭ paśla taho, jak jon zajmaŭsia hiemblinham, u jaho siamji zdaryłasia trahiedyja:
«Maja pieršaja, da taho času [užo] byłaja žonka była, darečy, zabitaja hiembleram padčas rabavańnia. Jon napiaredadni prajhraŭ hrošy na staŭkach i chacieŭ skraści hrošaj, kab adyhracca. Jon zalez u dom i zadušyŭ jaje. […] Voś heta vynik takoj dziejnaści. I čym bolš pracuješ u takoj halinie, tym u ciabie bolej takich kiejsaŭ u śviecie».
Na što patraciŭ svoj pieršy kapitał i čamu Flo zmahło abyści kankurentaŭ
Jak zhadvaje Juryj, na svoj pieršy kapitał jon «zasnavaŭ šerah kampanij i prainviestavaŭ, kupiŭ dom» — i hrošy skončylisia.
Siarod inviestycyj byŭ i startap Flo. Na momant vychadu na rynak padobnych raspracovak, pa słovach Juryja, było sotni, adnak mienavita Flo zdoleła pryciahnuć miljony karystalnikaŭ.
Jak tłumačyć Hurski, pryčyn pośpiechu było niekalki. Pa-pieršaje, technałahičnaja pieravaha: jany dosyć rana pačali vykarystoŭvać niejrasietki i inšyja technałohii štučnaha intelektu, što zrabiła pradukt značna bolš dakładnym — jašče zadoŭha da źjaŭleńnia OpenAI. Heta było paśla prajekta «Maskarad».
Pa-druhoje, umieńnie hulać u doŭhuju — ciarpliva vieści zadaču na praciahłym adrezku času.
Taksama vialikuju rolu adyhrała zdolnaść stvarać kantent. Mienavita praź jaho naładziłasia manietyzacyja:
«Kali heta budzie prosta hoły pieryjad treka, jaki pakazvaje dni cykłu, za heta ludzi płacić nie buduć», — davodzić Hurski i tłumačyć, što ŭ ich dadatku «źjaviłasia šmat kantentu, jaki apisvaje biahučy dzień, stan. To-bok źjaviŭsia sens dla ludziej płacić. I zdolnaść rabić kantent — heta taksama była asobnaja historyja, nie vielmi častaja na rynku».
Jašče adna mocnaja rysa jaho kamandy, jakuju adznačaje Hurski — markietynh, najpierš pierformans-markietynh: praca z rekłamnymi placoŭkami i sacsietkami, a nie pijar. U vyniku spałučeńnie ŭsich hetych faktaraŭ, na jaho dumku, i dało vynik.
«Naohuł jość niejkaja ŭnutranaja ŭstanoŭka, ludzi dumajuć, što ideja — heta ŭžo amal biznes. Ale nasamreč ideja — heta navat nie technałohija, heta ŭ 100 razoŭ mienš.
Technałohija — heta nie prajekt, a prajekt — heta nie biznes. To-bok pamiž kožnaj hetaj stadyjaj znachodzicca prosta razryŭ. Razryŭ — heta vielizarnaja-vielizarnaja prorva. I zdolnaść pryjści ad technałohii da biznesu — heta ŭžo peŭny skił. Biznes — heta kali jon užo zarablaje, kali jon znajšoŭ markiet-fid (kali pradukt abo pasłuha idealna traplaje ŭ patreby rynku — NN), kali jon adnosna ci całkam stabilny, voś heta ŭžo biznes», — davodzić Juryj.
Kolki zarablaje Flo i jak dapamahaje skaracić kolkaść razvodaŭ
Pa słovach Hurskaha, u hetym hodzie ŭ Flo budzie kala 300 miljonaŭ dalaraŭ vyručki. Ciapier u dadatku jość i partniorski režym dla mužčyn, dziakujučy jakomu mužčyna bačyć, što adbyvajecca ź jaho žančynaj.
Jak tłumačyć Hurski, heta zroblena dla taho, kab mužčyny «razumieli, z kim majuć spravu, i, adpaviedna, razumieli, kali pary zaniacca začaćciem, da hetaha času padsabracca i prajavić siabie z najlepšaha boku.
«Začaćcie — heta ŭzajemny prajekt. I ŭ hetym płanie my ciapier hladzim i na hety rynak. […] I my abaviazkova dadamo ŭ mužčynski režym jašče i pra mužčynu», — adznačaje biznesmien.
Ale «asnoŭny bol», davodzić Hurski, zaklučajecca ŭ tym, što pary pa roznych pryčynach praktyčna nie razmaŭlajuć pamiž saboj, asabliva na temu seksu.
Hetaja prablema raspaŭsiudžvajecca i na temu začaćcia. U takoj situacyi, na pohlad biznesmiena, «pradukt moža dobra spracavać, tamu što mužčynu moža tłumačyć nie žančyna, a dadatak. Pra toje, što nieabchodna palepšyć, zrabić, dapamahčy, vypravić. […] Pradukt moža razumieńnie adno adnaho vielmi mocna padniać, prybraŭšy hety communication gap unutry pary».
Jak tłumačyć Hurski, «dla mnohich par, kab jakasna zaciažaryć, treba prosta nie prapuścić avulacyju. Adpaviedna, rabić dzicia ŭ hetyja dni. Ale dla mnohich navat heta prablema — skazać mužu».
Dziakujučy dadatku, jak davodzić biznesmien, mužčyna budzie sam bačyć, kali budzie najbolš spryjalny dla začaćcia dzień.
Druhi važny momant źviazany z tym, što mužčyny, u adroźnieńnie ad žančyn, žyvuć u roŭnym harmanalnym cykle. Dla mnohich razumieńnie taho, što stan žančyny mocna źmianiajecca na praciahu cykła, «źjaŭlajecca adkryćciom».
Jon padkreślivaje: razumieńnie taho, što «harmony vielmi mocna ŭpłyvajuć» na stan žančyny, moža stać dla mužčyn vialikaj dapamohaj u adnosinach i zachavać ich:
«Razumieć, što, aha, siońnia moža być taki ŭpłyŭ, a zaŭtra taki ŭpłyŭ. Tamu heta nasamreč cikavaja niša. I ja liču, što heta taksama vielmi dobra z punktu hledžańnia misii. Tamu što patencyjna jana pavinna ŭmacoŭvać pary. Lubaja ŭśviadomlenaść raźvivaje toje, što ludzi lepš razumiejuć, chto jany i navošta. I adpaviedna, mohuć paźbiahać kampulsiŭnych rašeńniaŭ. Tamu heta vielmi cikavy prajekt u ramkach Flo».
Chto pieršy daŭ hrošaj na Flo
Jak zhadvaje Hurski, u pačatku raźvićcia Flo asnoŭnaja zadača była «nakapić aŭdytoryju». I im pašancavała ź inviestycyjami. Pieršym fondam, jaki ŭkłaŭ hrošy, byŭ Flint Capital Dźmitryja Śmirnova. Jak zaŭvažaje Hurski, fond zrabiŭ staŭku na zasnavalnikaŭ, nie majučy vyraznaha bačańnia biznes-madeli.
«Kali ja ich potym pytaŭsia, čamu jany prainviestavali, jany skazali, što heta była pieradusim staŭka na faŭderaŭ. I jany prainviestavali pa acency miljony z dva [dalaraŭ]. Adpaviedna, kali sioleta [inviestycyjny] raŭnd Flo budzie miljardy pad dva, to jany, adpaviedna, zrobiać tysiaču iksoŭ», — davodzić biznesmien.
Jak padzialili biznes z bratam
U Juryja Hurskaha jość brat-bliźniuk Dźmitryj, jakija źjaŭlajecca hałoŭnym vykanaŭčym dyrektaram (SIEO) Flo. Sam ža Juryj zajmaje pasadu prezidenta.
«My nie dzialili ničoha. Paśla taho, jak ja papracavaŭ SIEO ŭ apieracyjnym biznesie, ja vyrašyŭ, što bolš nikoli ŭ žyćci nie budu pracavać tak, tamu što ja ŭsio-taki pradprymalnik, a nie kiraŭnik, nie mieniedžar. Heta prosta nie majo. […] Dźmitryj u hetym davoli efiektyŭny», — tłumačyć Juryj.
Kryzisy kampanii: pratesty ŭ Biełarusi, kavid i vajna
Juryj adznačaje, što jaho kampanii daviałosia prajści praz čaradu kryzisaŭ.
Pieršy źviazany z padziejami 2020-ha, kali ŭ Biełarusi adbyvalisia pratesty, i adpaviedna «vialikaja kolkaść ludziej prosta vymušana była źjechać». Heta, pa słovach biznesmiena, «byŭ pieršy ŭzrovień vyprabavańniaŭ», da jakoha dadalisia sankcyi i kavid.
«Pačynalisia sankcyi suprać niekatorych palitykaŭ u Biełarusi i hetak dalej. Užo vielmi hruntoŭna psavaŭsia flor u hetym płanie. Kali brać pieryjad da hetaha, 2017-2019 hod — heta byŭ załaty čas biełaruskaha IT, kali ličyli, što heta naradžajecca novy ŭschodniejeŭrapiejski IT-tyhr».
Jak zaŭvažaje Hurski, dalejšamu raźvićciu biełaruskaha IT-siektara pieraškodziła nie tolki «palityka žadańnia ŭłady»:
«Ja nie dumaju, što tak usio lohka, jak žadańnie ŭłady. Heta ŭsio ž vielmi vialikija trendy. Zaraz, paśla ŭkrainskaj vajny, stała bolš zrazumieła, što tady adbyvałasia nasamreč. Ale tady, viadoma, usie byli ŭ takim bolšym ramantyźmie, ja b tak skazaŭ. Mnohim daviałosia źjechać, i dla kampanii heta byŭ peŭny pieršy stres.
Kavid, kali kampanija pavinna była pieramiaścicca pa damach. Potym pačałasia vajna, i my byli vymušanyja ŭsie svaje kampanii vyvieźci ź Biełarusi, z Rasii na praciahu troch-čatyroch miesiacaŭ».
Potym u industryi zdaryŭsia surjozny kryzis: Apple źmianiła palityku pryvatnaści, i praz heta ŭsim kampanijam stała składana rabić efiektyŭny markietynh — jon litaralna abrynuŭsia.
Plus da hetaha, jak zhadvaje Hurski, było šmat stresavych momantaŭ u biznesie. Staryja biznes-madeli pierastali pracavać, rost zamarudziŭsia, daviałosia terminova ŭvodzić niejkija novyja rašeńni, kab jaho adnavić.
«I ŭsio heta adbyvałasia absalutna niejak biaskoncym strumieniem», — davodzić Hurski.
Pra žyćcio ŭ Łondanie
Choć aficyjna ličycca, što Juryj Hurski žyvie na Kipry, minimum kala tydnia na miesiac jon pravodzić u Łondanie, dzie vučacca jaho troje dziaciej.
Całkam pierabracca ŭ stalicu Vialikabrytanii jon nie płanuje, bo «asablivaha sensu niama hłabalna, uličvajučy, što i na Kipry ja plus-minus tydzień na miesiac».
Da taho ž u Łondanie vysokija padatki.
«Ale dla jakaści žyćcia dobra, asabliva voś ciapier u mai. Zimoj trochi horš, kali nadvorje drennaje. […] Adzinaje, što heta vielmi darahi horad, vielmi darahi», — dzielicca Hurski.
Pry hetym, pa słovach biznesmiena, jany nie bačać u Jeŭropie alternatyvy Łondanu pa mahčymaści pryvozić ludziej ź inšych krain.
«U cełym Łondan — heta adziny ŭ Jeŭropie sapraŭdy internacyjanalny horad. […] Chiba na Ńju-Jork padobny trochi. Tolki lepšy. To-bok šmat-šmat pryjezdžych. A emihranty — heta ž załatoje dno. Tamu što emihrant prajšoŭ pa sutnaści dvajny filtr. Spačatku jon nabraŭsia śmiełaści pajechać z rodnaj krainy. Heta ŭžo asablivyja ludzi. A z druhoha boku, jon pryjechaŭ u novaje miesca. U jaho tut ničoha niama. […] I jamu nieabchodna ŭsio rabić. I tamu ŭnutranaja matyvacyja, zrazumieła, našmat-našmat vyšejšaja», — davodzić Hurski.
Pa słovach biznesmiena, jany pravodzili surjoznaje daśledavańnie jeŭrapiejskich haradoŭ, kali vybirali miesca dla raźmiaščeńnia svajho ofisa. Jon zaŭvažaje, što «ŭ Anhlii jašče vielmi zrazumieły šlach na atrymańnie pašparta. […] Asabliva kali ty traplaješ pad katehoryju vysokakvalifikavanaha supracoŭnika, to šlach dosyć prosty, zrazumieły i nie vielmi doŭhi».
Łondan choča bahatych ci talenavitych?
Pa słovach Hurskaha, vybar Łondana «ŭ cełym, na toj momant nie byŭ pamyłkaj». Pry hetym jon źviartaje ŭvahu, što ŭ Vialikabrytanii pavysili padatki dla vielmi bahatych ludziej.
«Moj niadoŭhi dośvied znosin z palitykami ŭ inšaj krainie mianie pryvioŭ da poŭnaha razumieńnia, što čaściakom jany sami nie viedajuć, što robiać, i nie vielmi pradumvajuć svaje dziejańni. […]
Nichto ž nie kaža, što kali ŭ vas jość 30 tysiač zvyšbahatych, to heta zakranaje jašče 300 tysiač čałaviek. Tamu što kožny zvyšbahaty daje pracu jašče dziesiaci».
Hurski paraŭnoŭvaje heta z «mietastazami rostu» — kali niama novych mahčymaściaŭ dla rostu, usio zamiraje. I cytuje anhlijskuju prymaŭku: «Hałoŭnaja dobleść džentlmiena — heta pavaha da realnaści».
«Nam moža nie padabacca realnaść, my možam jaje abmiarkoŭvać, možam bubnieć. Ale ź joj treba prosta pracavać. Z takoj, jakoj jana jość. I pavažać jaje. To-bok nie vydumvać, a prymać jaje takoj, jakaja jana jość», — tłumačyć mužčyna i dadaje, što asabista ličyć, što «ničoha ŭ hetym dobraha niama dla Łondana», ale «ŭ cełym my apynulisia ŭ hetaj realnaści, my budziem jaje pavažać i ź joj budziem žyć».
Jaki zaraz zapyt rynku?
Jak adznačaje Juryj Hurski, paśla ŭsich kryzisaŭ rynak choča inšy farmat. Kali ŭ 2019—2020 hadach inviestary šukali vialikija kampanii z vysokaj vyručkaj i vialikim partfielem praduktaŭ — pa anałohii z Mail.ru, — to ciapier situacyja kardynalna źmianiłasia. Sučasny rynak čakaje zrazumiełych equity-historyj: kab było vidavočna, čym zajmajecca kampanija, kamu jana naležyć i kudy ruchajecca. U inviestaraŭ niama žadańnia raźbiracca ŭ składanaj struktury z dolami roznych kłasaŭ u roznych jurydyčnych asobach. Tamu ciapier hałoŭny fokus — na prazrystaści i samastojnaści kampanij.
«Zaraz my, chutčej, viartajemsia da vytokaŭ. Da taho, kab vałodać kampanijami, ale kab kampanii byli całkam samastojnyja. […] Na [inviestycyjnym] raŭndzie Flo rynak nam vielmi dakładna skazaŭ, što dla taho, kab kampanii canilisia, jany pavinny vyhladać jak samastojnyja kampanii. Jany nie pavinny zaležać adna ad adnoj», — davodzić Hurski.
«My pavažajem realnaść», — padkreślivaje biznesmien i raskazvaje, što ŭ adkaz na novyja realii kampanija ŭžo treci raz za svaju historyju adaptujecca. I napieradzie jaje čakajuć novyja źmieny, bo «idzie epocha štučnaha intelektu».
Hurski adznačaje, što padobnyja tendencyi nazirajucca i ŭ inšych hulcoŭ rynku — naprykład, amierykanski chołdynh IAC (uładalnik Match Group) taksama pačaŭ vydzialać asobnyja kampanii z ahulnaj struktury, što śviedčyć pra ahulny kirunak ruchu.
«Rynak pamianiaŭsia. Technałohii pamianialisia, košt hrošaj pamianiaŭsia, šmat čaho pamianiałasia. I tamu zaraz pravilniej heta pradstavić u inšym vyhladzie. U pryncypie, možna skazać, što treba było rabić krychu pa-inšamu. Ale ci była heta pamyłka ŭ momant ździajśnieńnia? U momant ździajśnieńnia — nie. Tady byli absalutna inšyja ŭvachodnyja danyja», — reziumuje Juryj Hurski.
Ciapier čytajuć
Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi18
Kamientary