Biełarus staŭ Hierojem Ukrainy. «Jaho mužčynski pačatak byŭ vielmi mocny»
Novaja dakumientalnaja stužka «Biełsata» raskazvaje pra Alaksieja Skoblu z pazyŭnym «Tur», jaki zahinuŭ, baroniačy Kijeŭ u 2022 hodzie. Adzinym ź biełarusaŭ-dobraachvotnikaŭ jon byŭ paśmiarotna ŭdastojeny zvańnia Hieroj Ukrainy.
14 sakavika 2022 hoda jamu mieła spoŭnicca 32 hady. Jon zahinuŭ 13 sakavika. Išoŭ čaćviorty tydzień abarony Kijeva — bitvy, ad jakoj zaležała, ci zachavajecca dziaržaŭnaść Ukrainy, a značyć, ci zachavajecca i Biełaruś.
Jon byŭ synam prostych ludziej ź Minska. Mama była vychavacielkaj ŭ dziciačym sadku, baćka — kiroŭca aŭtobusa. Sam jon — aŭtamiechanik.
Baranić Ukrainu ad rasijskaj ahresii Alaksiej pajechaŭ jašče ŭ 2015 hodzie.
Kali vajna acichła, viarnuŭsia da mirnaha žyćcia, ažaniŭsia. Kali ŭ 2022 hodzie rasijanie papiorli na ŭsiu Ukrainu, jon adrazu ŭziaŭ u ruki zbroju.
Kali ich mašynu padstrelili pad Maščunom, jon, paranieny, zastaŭsia prykryvać pabracimaŭ. Za hety hieraizm i byŭ udastojeny zvańnia Hieroja Ukrainy. Jaho imia ŭpisanaje ŭ historyju.
A jaho asabistuju historyju stužkaj raskazała režysiorka Volha Voranava.
Film ujaŭlaje saboj dakumientalny repartaž, jaki spałučaje intervju z tavaryšami pa słužbie, vałanciorami i blizkimi Alaksieja. U im Tur paŭstaje jak asoba, dla jakoj spraviadlivaść była nie abstrakcyjaj, a žyćciovym pryncypam.
«Tur, jaho ŭsie vielmi pavažali. Niehledziačy na ŭzrost. Jaho słova było važkim. Heta byŭ čałaviek sa stryžniem», — adznačaje adna ź jahonych znajomych.
«U jaho było vielmi mocnaje pačućcie spraviadlivaści», — zhadvaje siabar dziacinstva.
«Kali my svarylisia, žartavali adzin z adnaho, to ŭ Alaksieja zaŭždy było adrazu pajści i bicca. Jaho mužčynski pačatak byŭ vielmi mocny i spraviadlivy».
V 2015 hodu Skobla dałučyŭsia da taktyčnaj hrupy «Biełaruś» u składzie «Pravaha siektara».
«U jaho hareli vočy. Jon tolki pryjechaŭ ź Biełarusi, i jon taki cyvilny čałaviek, u jakoha napieradzie byŭ uvieś jaho bajavy šlach», — zhadvaje pieršaje znajomstva z Alaksiejem u 2015 hodzie adzin ź jaho bajavych tavaryšaŭ.
Pa jaho ŭspaminach, u pieršym ža vyjeździe na šachtu Butaŭka pad Danieckam Skobla vyratavaŭ paranienych ukrainskich bajcoŭ:
«Jon vyzvaŭsia siarod jašče niekalkich chłopcaŭ, jakija advažylisia paleźci na vyšku i evakujavać paranienych ukraincaŭ z 80-j desantnaj bryhady. I jon, ryzykujučy ŭłasnym žyćciom, vyratavaŭ žyćcio svaich pabracimaŭ».
U 2016 hodzie Alaksiej staŭ pieršym ź biełarusaŭ, chto zaklučyŭ kantrakt z USU i staŭ słužyć u składzie Siłaŭ śpiecyjalnych apieracyj Ukrainy (SSA). Jon prajšoŭ elitnyja vajskovyja kursy i nie adnojčy braŭ udzieł u vykanańni vysokaśpiecyjalizavanych zadač, ździajśnieńni dyviersij na terytoryi voraha.
Kulminacyjaj filma stanovicca apovied pra apošni boj Skobli, jaki adbyŭsia 13 sakavika 2022 hoda pad Kijevam za dzień da dnia jaho naradžeńnia.
Padčas vykanańnia zadańnia pa aeraraźviedcy jaho hrupa patrapiła ŭ zasadu. Atrymaŭšy ciažkija ranieńni, Alaksiej, zrazumieŭ, što nie vyžyvie, i zahadaŭ hrupie adychodzić, prykryvajučy ich.
«Jon zahinuŭ jak hieroj. Nie ad abstrełu minamiotnaha, a kankretna ŭ kantakcie z voraham. (…) Jon vieryŭ u Valhału. A patrapić u Valhału možna tolki, jak havoryć pra heta mifałohija, zahinuŭšy ŭ bai sa zbrojaj u rukach», — adznačaje jaho bajavy tavaryš.
Za hety podźvih Alaksieju Skoblu było prysvojena zvańnie Hieroja Ukrainy. U jaho honar u Chmialnickim nazvali vulicu.
«Pa hetaj vulicy jon niekali hulaŭ z žonkaj. Ciapier, prachodziačy pobač, žonka kožny raz bačyć, u čyj honar była nazvana heta vulica — u honar našaha hieroja», — zaŭvažaje adna ź siabrovak siamji.
Apytanka
Śmiarotna paranieny, zastaŭsia prykryvać svaich. Chto taki biełarus «Tur», zabity pad Kijevam
«Ja viedaju, što na hetaj vajnie ja zdochnu. Ale chaču stvaryć narmalny šturšok ruchu»: vyjšła druhaja častka filma «Vołat. Žyćcio na nuli»
Kamandujučym Siłami bieśpiłotnych sistem Ukrainy pryznačany «Madziar» — kultavy dobraachvotnik, jaki pryjšoŭ u armiju ŭ 2022-m
Vajskovaja raźviedka Ukrainy ŭznaharodziła biełaruskich dobraachvotnikaŭ
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary