Aleksijevič: Cichanoŭskaja simpatyčnaja, šmat zrabiła, Łatuška i Viačorka razumnyja. Ale niama adčuvańnia tryvałaści apazicyi
Biełaruskaja nobieleŭskaja łaŭreatka Śviatłana Aleksijevič ciapier pracuje nad novaj knihaj, pastupova źbirajučy materyjał. Pryčym jana budzie nie pra kachańnie, jak płanavałasia raniej, a pra prablemu kultury hvałtu i niespraviadlivaści, pra «čyrvonaha čałavieka», ź jakim usio jašče nie skončana. Nazyvacca vydańnie papiarednie budzie «U čakańni novych varvaraŭ».
Na suśvietnaj arenie Śviatłana Aleksijevič — biełaruskaja piśmieńnica №1 siarod sučaśnikaŭ. «Naša Niva» zapytała ŭ jaje, ci jość niechta siarod kaleh, kamu b jana sama addała pieršaść, i jakoj jana bačyć biełaruskuju budučyniu ŭ bližejšyja hady.
Siarod biełaruskich piśmieńnikaŭ-sučaśnikaŭ Śviatłana vyrašyła nikoha nie vyłučać: «Nichto nie nižej mianie, prosta biełaruskich piśmieńnikaŭ, jakija byli b mnie cikavyja, ciapier niama. [Alhierd] Bacharevič mnie padabajecca, mienavita jaho pisańnie, ale bolš raniejšaja tvorčaść — mietafaryčnaja, cikavaja».
U budučyniu piśmieńnica hladzić dosyć piesimistyčna.
«Mahu skazać, čaho ja chaču, ale heta nie adrazu ździejśnicca. Chočacca, kab sistema źmianiłasia, kab my paśpieli vyzvalicca. U Biełarusi budzie niešta tolki sa śmierciu Łukašenki. I toje, kaho jana atrymaje [naŭzamien], nieviadoma. Moža, kali jany ŭdvuch pamruć — i Łukašenka, i Pucin… Inakš sistema zastaniecca i tam, i tam. My možam pravaronić — i budzie ruski hubiernatar niejki. Treba pravieści maleńki karabiel i mima Rasii, i mima dyktatury, ale heta budzie vielmi składana. I apazicyja niejak nie daje mnie ŭpeŭnienaści».
Śviatłana Aleksijevič adznačaje, što ŭ jaje niama adčuvańnia tryvałaści apazicyi, adčuvańnia, «što jana moža supraćstajać».
«Śviatłana Cichanoŭskaja — simpatyčnaja, jana šmat zrabiła, [Pavieł] Łatuška — razumny (pieramohi na musaŭskim froncie jamu naležać, jaho taki chitry mozh jamu padkazaŭ) i [Franak] Viačorka razumny. Ale što? A narod? A rabaciahi? Narod ža ŭsio vyrašaje, što my tut [u emihracyi] vyrašajem? Niejkuju hodnaść vyratujem, a voś narod… Bajusia, tolki minimum praz pakaleńnie niešta mahčyma».
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary