U Indyi pamierła najstarejšaja azijackaja słanicha. Joj było bolš za 100 hadoŭ
U Indyi pamierła najstarejšaja słanicha Azii pa mianušcy Vatsała, jakoj było bolš za 100 hadoŭ — amal udvaja bolš za siaredni viek azijackich słanoŭ. Žyviolina pajšła z žyćcia ŭ zapaviedniku Pana, što znachodzicca ŭ centralnym indyjskim štacie Madchja-Pradeš, paviedamlaje The Times Of India.
Vatsała naradziłasia na pačatku XX stahodździa ŭ lasnym rehijonie Niłambur štata Kierała. U maładości jaje vykarystoŭvali jak pracoŭnuju žyviolinu dla transpartavańnia draŭniny. U 1972 hodzie jaje pieravieźli ŭ štat Madchja-Pradeš, a z 1993 hoda jana žyła ŭ zapaviedniku dla tyhraŭ Pana, dzie słanichu łaskava nazyvali «Dadzi», što aznačaje na chindzi «babula».
Chacia ŭ Vatsały nie było ŭłasnych słanianiat, jana padtrymlivała inšych słanich padčas rodaŭ i stała pryjomnaj maci dla mnohich dzicianiat.
Žyćcio Vatsały było niaprostym: u 2003 i 2008 hadach jana pieražyła žorstkija ataki słana Ram Bachadura padčas sprob sparvańnia, što pryviało da ciažkich traŭmaŭ i doŭhaha adnaŭleńnia.
Na praciahu 30 hadoŭ za joj dahladaŭ jaje machaut (dahladčyk słana) Maniram Hond, jaki adznačyŭ, što Vatsała zaŭsiody była ciarplivaj i łaskavaj. U apošnija hady jana mieła prablemy sa stravavańniem i chadźboj, jaje karmili vadkaj ježaj i dapamahali pieramiaščacca. Navat kali słanicha straciła zrok, jana paznavała hołas svajho dahladčyka.
8 lipienia Vatsała ŭpała kala lasnoha kanała i ŭžo nie zmahła padniacca. Jaje sprabavali ratavać, ale biezvynikova. Słanichu kremiravali ŭ zapaviedniku.
Ministr štata nazvaŭ jaje nie prosta słanichaj, a «maŭklivaj zachavalnicaj lasoŭ», simvałam štata i lubimaj babulaj dla mnohich słanianiat.
Niahledziačy na toje, što ŭ pryrodzie azijackija słany zvyčajna žyvuć da 60 hadoŭ, a ŭ zapaviednikach — da 80, uzrost Vatsały byŭ unikalnym. Adnak z-za adsutnaści dakumientaŭ, jakija dakładna paćviardžali b uzrost žyvioliny, jaje nie zmahli ŭnieści ŭ Knihu rekordaŭ Hinesa.
Siońnia ŭ Indyi žyvie bolš za 27 tysiač dzikich słanoŭ, ale z-za vysiakańnia lasoŭ i dziejnaści čałavieka jany znachodziacca pad pahrozaj.
U Zambii zvarjaciełaja słanicha zabiła dźviuch turystak
Na Ziamli jość niabačnaja miaža, jakuju žyvioły nie pierasiakajuć. Voś čamu
Navukoŭcy stvaryli «šarścistuju myš» z prykmietami mamanta. Mahčyma, praź niekalki hadoŭ adrodziać i vymierłaha hihanta
Na fiestyvali ŭ Indyi bolš za 20 čałaviek paciarpieli praz raźjušanaha słana
U Zimbabve z-za zasuchi źbirajucca zabić 200 słanoŭ
Kamientary
Nacyja siońnia, ci nikoli.
Siońnia nie pryjdzie!