«Karaleva kietaminu» atrymała 15 hadoŭ turmy pa spravie ab śmierci akciora Mećju Pery

Sanhie, jakaja maje hramadzianstva ZŠA i Vialikabrytanii, pahražała da 65 hadoŭ turemnaha źniavoleńnia pa cełym šerahu abvinavačvańniaŭ, źviazanych z prodažam narkotykaŭ. Jana znachodziłasia pad aryštam z žniŭnia 2024 hoda.

Mačycha akciora Debi Pery paprasiła sud pryznačyć Sanhie maksimalny termin turemnaha źniavoleńnia.

«Toj bol, jaki vy pryčynili sotniam, moža być navat tysiačam ludziej, niemahčyma admianić. Niama radaści, niama śviatła. Jon nie vierniecca», — napisała Debi Pery, źviartajučysia da abvinavačanaj.

Sanhie — adna ź piaci abvinavačanych pa spravie ab śmierci Mećju Pery, jaki na praciahu niekalkich dziesiacihodździaŭ zmahaŭsia z narkatyčnaj zaležnaściu.

Paśla śmierci Pery fiederalnyja ŭłady ZŠA praviali maštabnaje rasśledavańnie, u chodzie jakoha ŭstanavili, što akcior atrymlivaŭ kietamin praz padpolnuju sietku pa pastaŭkach narkotykaŭ, jakaja pracavała ŭ Halivudzie.

Doktar Salvador Płasiensija ŭ śniežni 2025 hoda byŭ pryhavorany da 2,5 hoda turemnaha źniavoleńnia i staŭ pieršym fihurantam spravy ab śmierci Pery, jaki atrymaŭ termin.

Inšamu doktaru Marku Čaviesu sud pryznačyŭ try hady ŭmoŭnaha nahladu i 300 hadzin hramadskich rabot. Čavies pryznaŭ siabie vinavatym pa adnym z punktaŭ abvinavačańnia — u zmovie z metaj raspaŭsiudžvańnia kietaminu.

Mark Čavies u sudzie raskazaŭ, što pradaŭ kietamin Salvadoru Płasiensii, jaki pierapradaŭ narkotyk asistentu akciora Kienietu Ivamasie pa mocna zavyšanaj canie. Apošni 28 kastryčnika 2023 hoda asabista ŭvioŭ preparat Mećju Pery, paśla čaho akcior pamior.

«Cikava, kolki hety idyjot zapłacić», — napisaŭ Płasiensija ŭ adnym z tekstavych paviedamleńniaŭ.

Pa infarmacyi prakuroraŭ, Pery płaciŭ bolš za 2000 dalaraŭ za fłakon kietaminu, što značna pieravyšaje tuju canu, pa jakoj kuplali narkotyk dylery.

Sanhie pracavała praz pasiarednika Eryka Fleminha. Jana pradała 51 fłakon kietaminu asabistamu pamočniku Pery, Kienietu Ivamasie, jaki žyŭ u adnym domie z akcioram.

Ivamasa nieadnarazova ŭvodziŭ Pery kietamin, jaki jon atrymlivaŭ ad Sanhie. 28 kastryčnika 2023 hoda pamočnik akciora zrabiŭ jak minimum try injekcyi narkotyku Mećju Pery.

Prysudy Ivamasie i Fleminhu buduć vyniesieny ŭ kancy krasavika.

«Vydalicie ŭsie paviedamleńni»

Ubačyŭšy ŭ ŚMI paviedamleńni ab raptoŭnaj śmierci Pery, Sanhie pasprabavała zamiaści ślady. «Vydalicie ŭsie našy paviedamleńni», — napisała jana Fleminhu.

Pry vobšuku doma Sanhie ŭ Halivudzie śledčyja vyjavili bolš za 80 fłakonaŭ kietaminu, a taksama tysiačy tabletak, u tym liku mietamfietaminu, kakainu i ksanaksa. Taksama ŭ jaje kvatery byŭ znojdzieny ličylnik hrošaj, vahi i schavanyja kamiery.

Fiederalnyja ŭłady abvinavacili Sanhie ŭ pastaŭkach kietaminu sa svajho «schovišča» ŭ Halivudzie. Sanhie pracavała sa znakamitaściami i vysokapastaŭlenymi klijentami, pastaŭlajučy im narkotyki jak minimum z 2019 hoda, havorycca ŭ abvinavaŭčym zaklučeńni.

Mećju Pery byŭ znojdzieny miortvym u vańnie ŭ svaim domie ŭ Łos-Andželesie ŭ kastryčniku 2023 hoda. Uskryćcio pakazała, što śmierć nastupiła ad nastupstvaŭ pryjomu kietaminu.

Śmierć Pery i rasśledavańnie taho, jak jon nabyŭ takuju kolkaść preparata na praciahu niekalkich hadoŭ, dali ŭjaŭleńnie ab razmachu halivudskaj sietki handlu kietaminam — adzin doktar u intervju Bi-bi-si nazvaŭ jaje «dzikim Zachadam».

Kietamin — dysacyjatyŭny aniestetyk, jaki, pa danych Upraŭleńnia pa baraćbie z narkotykami ZŠA, vałodaje halucynahiennymi efiektami. Jon moža skažać hladzielnaje i słychavoje ŭsprymańnie i vyklikaje ŭ spažyŭca pačućcio adčužanaści i straty kantrolu.

Jon vykarystoŭvajecca ŭ jakaści injekcyjnaha aniestetyka dla ludziej i žyvioł, pakolki dazvalaje pacyjentam nie adčuvać bol i admiežavacca ad rečaisnaści.

«Siabry, lubimyja i adna žudasnaja reč»

Pery byŭ najbolš viadomy pa roli daścipnaha Čendlera Binha ŭ papularnym sieryjale «Siabry».

Pavialičyć

Sitkom «Siabry» vyjšaŭ u 1994 hodzie. Sieryjał pra šaściarych siabroŭ amal ź pieršych ža sieryj stali nazyvać «vialikim» i «abaviazkovym da prahladu».

Piersanaž Pery ŭ «Siabrach» — Čendler — trochi saramlivy vastrasłoŭ, jaki paśpiachova rabiŭ adnu karjeru, potym pačaŭ druhuju, adnak u asabistym žyćci ŭsio było nie tak prosta.

U 2022 hodzie Pery vypuściŭ miemuary «Siabry, lubimyja i adna vialikaja žudasnaja reč». Jany pačynalisia sa słoŭ: «Pryvitańnie, mianie zavuć Mećju, choć vy možacie viedać mianie pad inšym imiem. Maje siabry zavuć mianie Meci. I ja pavinien być miortvy».

U hetaj spaviadalnaj knizie Pery raskazvaje pra toje, što ŭžo da 20 hadoŭ svajho žyćcia zrazumieŭ, što jon zaležny ad ałkaholu, paźniej da jaho dadalisia abiazbolvalnyja typu vikadzinu i ciažkija narkotyki. Jon prajšoŭ jak minimum praź dźvie surjoznyja apieracyi, vyklikanyja ŭžyvańniem ałkaholu i rečyvaŭ. I, pa svajoj ułasnaj acency, patraciŭ 7 młn dołaraŭ na lačeńnie ad zaležnaści.

• 0
• 0
• 0
• 0
• 0
• 0
• 0
• 0