Za paŭhoda kolkaść biełarusaŭ, jakija atrymali mižnarodnuju abaronu ŭ Polščy, pavialičyłasia na tysiaču
Pavodle źviestak polskaha Upraŭleńnia pa spravach inšaziemcaŭ, z pačatku 2025 hoda (studzień-červień) 1,6 tysiačy hramadzian Biełarusi padali zajavy na mižnarodnuju abaronu ŭ Polščy. Čaściej za biełarusaŭ heta robiać tolki ŭkraincy — ich było 5 tysiač, piša Most.
U paraŭnańni ź pieršaj pałovaj 2024 hoda kolkaść ukraincaŭ, jakija źviartajucca pa abaronu, amal padvoiłasia (było 2,7 tysiačy), a biełarusaŭ stała mienš (raniej było 2 tysiačy).
Usiaho za hety pieryjad u Polščy padali 8,5 tysiač takich zajaŭ. Akramia biełarusaŭ i ŭkraincaŭ, značnuju kolkaść składajuć rasijanie — kala 400. Raniej šmat zvarotaŭ pastupała i ad ludziej z Afryki i Blizkaha Uschodu, ale z 27 sakavika Polšča abmiežavała mahčymaść padačy zajaŭ na miažy ź Biełaruśsiu. Ciapier heta dazvolena tolki najbolš uraźlivym hrupam.
Za paŭhoda Polšča nadała mižnarodnuju abaronu 2,8 tysiačy zamiežnikaŭ. Ź ich 1,5 tysiačy — ukraincy, 1 tysiača — biełarusy, i kala 60 — hramadzianie Efiopii. Pry hetym kolkaść biełarusaŭ, jakija atrymali abaronu, skaraciłasia ŭ paraŭnańni ź minułym hodam (tady ich było 1,4 tysiačy).
Admoŭnyja rašeńni atrymali 1 tysiača čałaviek — siarod ich 500 ukraincaŭ, 130 rasijan i 70 biełarusaŭ. Heta značyć, što ŭzrovień admoŭ siarod biełarusaŭ nievysoki — kala 6,5%.
Akramia taho, Polšča spyniła razhlad 1,5 tysiačy zajaŭ — naprykład, kali zajaŭnik pakinuŭ krainu da pryniaćcia rašeńnia. Siarod takich vypadkaŭ — kala 300 ukraincaŭ, 100 efiopaŭ i stolki ž tadžykaŭ.
U Hruzii zatrymali biełarusa, jaki pryjšoŭ padać zajavu na prytułak
Zatrymanuju ŭ Varšavie na zapyt Interpała biełarusku na radzimu nie ekstradujuć
Biełarusa, jaki napaŭ na Paŭła Łatušku, užo departavali z Polščy ŭ Biełaruś
Hrecyja abviaściła časovuju zabaronu na prytułak dla ŭciekačoŭ z Afryki — zamiest hetaha buduć adrazu adpraŭlać u turmu
Kamientary