Z Oz.by niespakojna. Biełaruskaja kampanija try hady ŭ minusie, a rasijski kankurent jaje vyciskaje
Biełaruski — niekali tolki knižny — markietpłejs Oz.by nie vytrymlivaje kankurencyi z boku rasijskaha kapitału. Kampanija masava zakryvaje kramy i atrymlivaje pozvy ad kontrahientaŭ. Ale situacyju možna papravić.
Oz.by (jurydyčnaja asoba — TAA «Prynosim radaść») heta prykład jakasnaha ajčynnaha markietpłejsa, za jaki nie soramna.
Kampanija była stvorana biełarusami ŭ 1999-m i dahetul im naležyć, dziejničajučy ŭ składanych umovach i na ścipłym rynku.
Kampaniju zasnavaŭ tahačasny student fakulteta prykładnoj matematyki i infarmatyki Andrej Hrynievič, jaki padpracoŭvaŭ u vydaviectvie i napisaŭ dla taho prosty sajt, praź jaki možna było pradavać knižki.
Potym jon napisaŭ taki samy sajt užo dla siabie — prymaŭ na jaho zamovy, a potym na aŭtobusie ranicaj jeździŭ na knižny kirmaš na «Dynama», kab tam kupić zamoŭlenyja knižki i paśpieć za vychodnyja raściahnuć ich pa zamoŭcach. Adtul biznes i vyras.
U 2018 novym ułaśnikam kampanii staŭ vyhadavany ŭnutry jaje Dzianis Tkačoŭ, jaki adpracavaŭ unutry amal usiu ŭśviadomlenuju karjeru i vyras da top-mieniedžara. Ciapier jamu naležyć 100% «Prynosim radaść».
Ale apošni časam spravy iduć nie vielmi. «Naša Niva» vałodaje finansavaj spravazdačnaściu kampanii za apošnija hady, i z dakumientaŭ malujecca takaja karcina.
Na pačatku 2020-ch kampanija rezka naraściła kredytnuju nahruzku (z 761 tysiačy rubloŭ u 2020-m da 7,32 miljona rubloŭ u 2022-m), adnačasova pačali raści inviestycyi ŭ asnoŭnyja srodki i fond apłaty pracy, što aznačaje staŭku na ahresiŭnaje zaniaćcie rynku.
Kampanija, pa sutnaści, naroščvała kolkaść kramaŭ i punktaŭ realizacyi. Hetamu spryjała najaŭnaść u krainie płaciežazdolnaj publiki i bolšaj ekanamičnaj aktyŭnaści «źnizu». Napeŭna, heta było pravilnym i vidavočnym na toj momant rašeńniem pa raźvićci. Ale biełaruski biznes nie moža ni viedać, ni praličvać doŭhaterminovyja trendy, abumoŭlenyja palitykaj.
Kali 2021 hod jašče byŭ zakryty ź nievialikim čystym prybytkam, to z 2022-ha ŭ hadavym bałansie pačała raści suma niepakrytych strat, a prybytki pa vynikach hodu pajšli ŭ minus.
Užo try hady zapar kampanija stratnaja i prajadaje kredytnyja resursy i tłušč papiarednich hadoŭ.
Za 2024 hod kampanija maje 719 tysiač rubloŭ strat ad biahučaj dziejnaści, 490 tysiač rubloŭ čystych strat pa vynikach hodu i 1,17 miljona rubloŭ niepakrytych strat za papiarednija pieryjady.
Staŭka na ahresiŭny ryvok nie moža akupicca, chacia inšyja apieracyjnyja pakazčyki ŭ normie: vyručka składaje 62,28 miljona rubloŭ, z salidnaj rentabielnaściu prodažaŭ u 41%.
Ale jaskrava vyražana prablema rostu: raschody na realizacyju (22,58 miljona rubloŭ) amal roŭnyja vałavamu prybytku (25,43 miljona rubloŭ).
Vałavy prybytak 2024-ha ŭ adnosinach da 2023-ha vyras tolki na 4%, a zatraty na jaho atrymańnie vyraśli da taho ž pieryjadu na 10%. Delta ŭ vypadku Oz.by — heta straty.
Hrašovy patok pry hetym z 2021-ha vyras tolki na 7% — heta vielmi ścipłaja ličba realnaha finansavaha rostu adnosna ŭkładzienych resursaŭ.
Pačynajučy z 2024, kampanija faktyčna vymušana pačała zdavać nazad, admoviłasia ad ekspansii luboj canoj i pačała rezać svaju sietku.
Za 2024 hod zakryłasia piać kram u Žodzinie, Minsku, Breście i Hrodnie.
I tolki za paŭhoda biahučaha hodu zakryłasia ŭžo 12, pa nastupnych adrasach:
- Minsk, Partyzanski praśpiekt, 85
- Słuck, Lenina, 183
- Minsk, Kiryły Turaŭskaha, 12
- Minsk, Ždanoviča, 7
- Žodzina, Lenina, 17/2
- Minsk, Łabanka, 94
- Orša, Lenina, 17
- Minsk, Kazinca, 120
- Minsk, Biady, 46
- Mahiloŭ, Minskaja šaša, 31
- Mazyr, Junactva, 59A
- Minsk, Charužaj, 17.
Z maja 2025-ha pastaŭščyki i kontrahienty masava pajšli na Oz.by u sud, patrabujučy vypłat ścipłych pa mierkach industryi sum. U ramkach prykaznych vytvorčaściaŭ Oz.by pavinien 11, 28, 2, 16, 6, 4, 5, 20, 21, 11 tysiač rubloŭ…
Ahułam ciaham 2025 hodu kampanija maje vypłacić kontrahientam 7,5 miljona rubloŭ pa kantraktach pastaŭki.
Da 2024 hoda ekanomii za košt ludziej, jak možna mierkavać sa spravazdačy, nie adbyvałasia: zarpłatny fond stabilna ros z hoda ŭ hod pry stabilnaj kolkaści supracoŭnikaŭ (kala 500 čałaviek). Ale, pa našaj infarmacyi, sioleta zdaralisia i prablemy z vypłataj zarobkaŭ.
Kampanija bjecca za adnosnyja kapiejki (200, 300, 500 rubloŭ) na tendarach; a ŭłaśnik vypłačvaje sabie vielmi ścipłyja dyvidendy — mienš za dva siarednija zarobki pa Minsku.
Paharšeńnie situacyi ŭ Oz.by adbyvajecca na fonie ahresiŭnaha zachodu na biełaruski rynak rasijskaha hihanta «Vajłdbieryz», jaki sotniami adkryvaje svaje punkty vydačy. Kampanii nie kankurujuć pa ŭsioj namienkłatury tavaraŭ, ale pierasiačeńni istotnyja i vialikija.
Pry hetym u kampanii rasijskaj miljarderki Taćciany Kim isnujuć vialikija niarynkavyja pieravahi.
Pa rašeńni Alaksandra Łukašenki «Vajłdbieryz» vyzvaleny ad padatku na prybytak na 10 hadoŭ (paśla čaho da 2026 budzie płacić tolki pałavinny), da 2062 hoda «Vajłdbieryz» nie płacić padatak na nieruchomaść i ziamielny padatak, pieršyja piać hadoŭ z momantu atrymańnia prybytku nie płacić padatak na dyvidendy, a taksama PDV na tavary, vyrablenyja na terytoryi JEAES, padachodny dla supracoŭnikaŭ «Vajłdbieryz» — 9%. Hetyja lhoty raspaŭsiudžvajucca na hihancki łahistyčny centr u «Vialikim kamiani», u jaki Taćciana Kim abiacaje inviestavać 120 miljonaŭ dalaraŭ (a Łukašenka, u svaju čarhu, ciešyć siabie nadziejaj, što «Vajłdbieryz» uzdymie prodažy tavaraŭ dziaržvytvorčaści).
U hety ciažki dla ajčynnaj kampanii pieryjad vyhladała b adkaznym zapłanavać tam pakupki.
U vypadku, kali Oz.by nie zmoža vybracca ź situacyi i zakryć daŭhi papiarednich pieryjadaŭ, trajektoryja losu hetaj arhanizacyi absalutna jasnaja: kampaniju vykuplać rasijanie, i jašče adna niša biełaruskaha rynku kančatkova adydzie im.
Kamientary