RPC zapatrabavała ad Biełaruskaj pravasłaŭnaj carkvy viarnuć u nazvach zhadvańnie Maskoŭskaha patryjarchata
Sinod RPC vyrašyŭ publična asadzić kiraŭnictva Biełaruskaj pravasłaŭnaj carkvy.
U adnoj z pastanoŭ Sinoda RPC, pasiadžeńnie jakoha prajšło 24 lipienia 2025 hoda, vyrašana nahadać kiraŭnictvu Biełaruskaha ekzarchata, mitrapaličych akruhaŭ pra toje, što aficyjnyja najmieńni takich (u tym liku jurydyčnyja najmieńni i najmieńni, raźmieščanyja na aficyjnych sajtach i dakumientach), a taksama najmieńni ich kananičnych strukturaŭ — jeparchij, prychodaŭ, manastyroŭ, padvorjaŭ i inšych — pavinny ŭtrymlivać słovazłučeńni «Ruskaj Pravasłaŭnaj Carkvy» abo «Maskoŭskaha Patryjarchata». (žurnał №54)», — zaŭvažyła «Chryścijanskaja vizija»
Sinod zapatrabavaŭ usie najmieńni «pryvieści ŭ adpaviednaść z hetym vyznačeńniem».
Hnieŭ maskoŭskaha načalstva moža być vyklikany tym, što, jak paviedamlajecca ŭ niekatorych krynicach, u pierapracavanym dla pierarehistracyi statucie BPC źnikła jaje «druhoje najmieńnie» — Biełaruski ekzarchat Maskoŭskaha patryjarchata. Mienavita tak i nijak inakš u Maskvie nazyvajuć Biełaruskuju carkvu.
Toj ža Sinod RPC raniej, na pasiadžeńni 30 maja 2024 hoda, zaćvierdziŭ źmieny i dapaŭnieńni ŭ statut BPC (žurnał №53). Praŭda, z ahavorkaj: «z ulikam prapanavanaj papraŭki». Jak možna mierkavać, papraŭka tyčyłasia mienavita najmieńnia, i biełaruskim bokam uličanaja nie była, što i vyklikała ŭžo publičny paprok z boku Maskoŭskaj patryjarchii.
Za apošnija dziesiacihodździ ŭ Biełarusi skłaŭsia kansensus nakont najmieńnia svajoj carkvy jak «Biełaruskaja Pravasłaŭnaja Carkva» biez hruvastkaha aznačeńnia «Maskoŭskaha Patryjarchata». Kali ŭ svoj čas va Ukrainie była patreba vykarystoŭvać hetaje dadatkovaje aznačeńnie, kab adroźnivać UPC MP ad UPC Kijeŭskaha patryjarchata, to ŭ Biełarusi nijakich alternatyŭnych carkoŭnych jurysdykcyj nie było. Bolš za toje, słovazłučeńnie «Biełaruskaja pravasłaŭnaja carkva» ŭ publičnym užyvańni hučyć značna bolš zrazumieła, čym «Biełaruski ekzarchat», bo słova «ekzarchat» pachodzić z vuzkaśpiecyjalnaj kananičnaj movy i abaznačaje formu arhanizacyi i kiravańnia, jakaja moža ź ciaham času transfarmavacca ŭ inšuju formu.
Niesumnienna, užyvańnie paniaćcia «Biełaruskaja Pravasłaŭnaja Carkva» vyklikaje ŭ Maskvie razdražnieńnie i ŭsprymajecca jak imknieńnie da bolšaj adasoblenaści ad Maskvy, zaznačaje «Chryścijanskaja vizija».
Ciapier čytajuć
Nasta Bazar pastupiła na prahramu Kalinoŭskaha i choča stać sacyjałahiniaj: «Vučoba paśla 40 hadoŭ — svojeasablivy eliksir maładości»22
Kamientary
CIKAVA čym Łukašenka adkaža, Unijactvam ?