Huteryš papiaredziŭ, što AAN moža paciarpieć «niepaźbiežny finansavy krach»
Hienieralny sakratar AAN Antoniu Huteryš papiaredziŭ krainy-ŭdzielnicy, što Arhanizacyja Abjadnanych Nacyj moža sutyknucca ź niepaźbiežnym finansavym kracham. Pavodle jaho słoŭ, kryzis vyklikany masavymi niavypłatami členskich uznosaŭ, a taksama biudžetnym praviłam, pavodle jakoha niavykarystanyja srodki treba viartać dziaržavam, piša Reuters.
U liście ad 28 studzienia Huteryš adznačyŭ, što finansavaje stanovišča praciahvaje paharšacca, staviačy pad pahrozu realizacyju prahram AAN. Da kanca 2025 hoda ahulnaja zapazyčanaść pa ŭznosach dasiahnuła rekordnych 1,57 miljarda dalaraŭ. Kali situacyja nie źmienicca, arhanizacyja moža zastacca biez hrošaj užo letam, i tady joj daviadziecca radykalna pierahledzieć svaje finansavyja praviły.
Asnoŭnyja ciažkaści ŭźnikli paśla taho, jak ZŠA — najbujniejšy donar AAN — istotna skaracili finansavańnie i admovilisia ad abaviazkovych płaciažoŭ u asnoŭny i miratvorčy biudžety. Akramia taho, prezident ZŠA Donald Tramp zajaviŭ pra stvareńnie alternatyŭnaj Rady miru, jakaja, na jaho dumku, moža zamianić AAN.
Naprykancy 2025 hoda 48 krain nie apłacili svaje ŭznosy całkam, siarod ich byli ZŠA i Rasija, choć paźniej Rasija ŭsio ž pieraličyła astatni 71 miljon dalaraŭ. Kitaj, naadvarot, vykanaŭ usie abaviazacielstvy ŭ poŭnym abjomie. Pamier uznosaŭ zaležyć ad ekanamičnaj vahi krainy: ZŠA zabiaśpiečvali kala 22% biudžetu AAN, Kitaj — kala 20%.
Kab vypravić situacyju, u minułym hodzie Huteryš inicyjavaŭ reformu AAN (prajekt UN80), nakiravanuju na skaračeńnie vydatkaŭ i pavyšeńnie efiektyŭnaści. U vyniku biudžet arhanizacyi na 2026 hod udałosia źmienšyć na 7%, da 3,45 miljarda dalaraŭ.
Raźviedka ZŠA: Biełaruś stała pieradavym vajskovym płacdarmam Rasii24
Kamientary