Łukašysty vierać, što zmohuć źniać sankcyi ni za što. Heta realna?
Miedycynski fakt, što ŭ Biełarusi ničoha nie źmianiłasia. Ale što datyčyć pieramovaŭ amierykancaŭ z Łukašenkam — lepš tak, čym nijak, piša Mikoła Buhaj.
Kali brać mižnarodny aśpiekt, Biełaruś zastajecca častkaj rasijskaj militarnaj mašyny, vajennyja pryhatavańni praciahvajucca poŭnym chodam, jak i raspalvańnie nianaviści da narodaŭ Jeŭropy i Zachadu.
Kali brać unutranuju palityku, to nivodnaja z uviedzienych za apošnija piać hadoŭ tatalitarnych praktyk nie admienienaja. Ludziej praciahvajuć aryštoŭvać, i zatrymańni — tolki viaršynia tatalitarnaha ajśbierha.
Zajavy Alaksandra Łukašenki na naradzie z dypłamatami i na Vałaamie byli takimi ž, jak zaŭsiody.
Ale pry hetym Łukašenka vyrazna daŭ zrazumieć, što hatovy na niekatoryja kroki, kab z łukašenkaŭcaŭ źniali sankcyi — što b dazvoliła jamu ekanamična ŭmacavać svoj tatalitarny režym. Łukašysty chacieli b ździełki.
Jany, vyhladaje, hatovy adpuścić (z departacyjaj) častku raniej schoplenych pratestoŭcaŭ, kab uzamien zdabyć pryznańnie svajho režymu narmalnym.
Mahčyma, Łukašenka taksama hatovy spynić hibrydnyja ataki — kab atrymać mahčymaść zarablać. Ale susiedzi vyrazna razumiejuć, što za tyja hrošy Minsk, choć i prypyniŭšy vajnu hibrydnuju, budzie rychtavacca da vajny haračaj, da napadu Rasii na inšyja jeŭrapiejskija krainy.
Trampaŭskaja Amieryka prahnie roli miratvorcy ŭ samych roznych kutkach i situacyjach: ad Zanhiezura da Kambodžy. U hetym sensie kali b chtości taki, jak Łukašenka pahadziŭsia na kruhły stoł u lubych formach — heta była b prosta viaršynia mary. Vašynhton byŭ by na mnohaje hatovy dziela takoha.
Ale i prosta vyzvaleńnie palitviaźniaŭ amierykanskaja dypłamatyja padała b jak pośpiech Trampa, svoj pośpiech.
Amierykancam z Łukašenkam susiedziami nie być, i, kali brać stratehična, ich na hetym etapie cikavić adno: nie prajhrać Ukrainy. A ŭsio astatniaje ŭ rasijskaj śfiery ŭpłyvu dla ich — pytańni nie siońniašniaha dnia.
Jeŭrapiejskija krainy hladziać na heta pa-inšamu. Im važna, kab Biełaruś pierastała być krynicaj prablem — i drobnych, i vialikich. Jany nie chočuć mieć rasijski tramplin u sercy Jeŭropy. 2022 hod doŭha nie zabudziecca.
Tamu Zachad nie zdymie ŭsich sankcyj tolki za vyzvaleńnie palitviaźniaŭ, a tym bolš častki palitviaźniaŭ. Dla źniaćcia ŭsich sankcyj Minsku daviadziecca zrabić realnyja kroki nasustrač — spynić ahresiŭnyja dziejańni, uziać pad kantrol mihracyju i źmienšyć rasijskuju vajskovuju prysutnaść. Usio heta było b i ŭ intaresach Biełarusi, bo ŭsio heta źmiakčaje tatalitarny režym i źmianšaje zaležnaść krainy ad Rasii.
Tyja sankcyi, jakija ŭvodzilisia za saŭdzieł u vajnie z Ukrainaj, buduć źniatyja, kali skončycca vajna abo kali Biełaruś prademanstruje vyraznaje dystancyjavańnie ad rasijskaj vajennaj ci chacia b prapahandysckaj mašyny. Apošniaje, darečy, što łukašenkaŭcy spakojna mahli b sabie dazvolić navat u svajoj zaležnaj situacyi — kab spyniłasia raspalvańnie varožaści, kab źmianili ton «Biełaruskija siłaviki» ŭsich maściej.
Pavietranyja sankcyi, jakija byli za «Rajanejr» — ich źniaćcio vyhadnaje i biełaruskamu hramadstvu, bo heta narmalizacyja ŭmoŭ žyćcia.
Zakryćcio niekatorych pamiežnych punktaŭ było pryviazanaje da atak mihrantami. Spyniacca ataki mihrantami — adkryjucca i pamiežnyja pierachody. I ich źniaćcio budzie vyhadnaje i biełaruskamu hramadstvu, bo heta narmalizacyja ŭmoŭ žyćcia.
Što da vyzvaleńnia palitviaźniaŭ z departacyjaj, to heta budzie bol i biada — i dla hramadstva, i dla ludziej, dla jakich Biełaruś — heta ŭsio ŭ žyćci. Ale navat kali tak adbudziecca, to heta pavysić siłu dyjaspary, jakaja budzie tuju siłu prajecyravać unutr tatalitarnaj Biełarusi. Lepš tak, čym nijak.
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak6
Kamientary
Raz u Tichanovskoj vsio tak płocho, chotiełoś by uznať o riezultatach ich piatiletniej diejatielnosti.