U Polščy chočuć uvieści daviedku ab niesudzimaści i abaviazkovy psichatest dla kiroŭcaŭ taksi
U Polščy płanujuć zrabić bolš strohimi praviły dla kiroŭcaŭ, jakija pracujuć praz servisy typu Uber i Bolt. U novym zakonaprajekcie, jaki raspracavali deputaty ad partyi «Prava i spraviadlivaść» razam z prafsajuzam taksistaŭ, prapanujecca abaviazkova patrabavać daviedku ab niesudzimaści z krainy pachodžańnia, a taksama prachodžańnie psichałahičnaha testu na polskaj movie, piša the-warsaw.pl.
Akramia taho, usie transpartnyja srodki, što vykarystoŭvajucca ŭ słužbach taksi, pavinny prachodzić techahlad i być abstalavanyja pryładami dla rehistracyi pajezdak.
Adna z aŭtarak zakonaprajekta, deputatka Anna Krupka, zajaviła, što žančyny ŭ Polščy chočuć adčuvać siabie ŭ biaśpiecy padčas pajezdak u taksi, tamu nieabchodna viedać, chto siadaje za rul. Jana pryhadała vypadak, kali kiroŭcu z Hruzii, jaki pracavaŭ praz mabilnuju prahramu, abvinavacili ŭ zhvałtavańni pasažyrki.
Deputat Januš Kavalski dadaŭ, što niedapuščalna, kab taksi ŭ Polščy stanavilisia «prystaniščam złačyncaŭ». Prafsajuzny lidar Pavieł Saturski zajaviŭ, što isnujuć arhanizavanyja hrupy, jakija masava zavoziać inšaziemcaŭ u Polšču, kab tyja pracavali taksistami, i heta časta supravadžajecca parušeńniami.
Pry hetym u Polščy ŭžo dziejničajuć bolš strohija, čym raniej, praviły: usie kiroŭcy, što pracujuć praz mabilnyja prahramy, pavinny mieć polskaje paśviedčańnie kiroŭcy. Kampanii abaviazanyja asabista praviarać dakumienty kiroŭcaŭ, uklučajučy fota, paśviedčańnie kiroŭcy, daviedku ab niesudzimaści i inšyja nieabchodnyja papiery. Infarmacyja pra kiroŭcaŭ pavinna zachoŭvacca piać hadoŭ.
Za parušeńni praduhledžanyja vialikija štrafy. Naprykład, za arhanizacyju pieravozak bieź licenzii praduhledžany štraf da 500 tysiač złotych (kala 125 tysiač dalaraŭ), a za admovu pakazać kantrolnuju pryładu — da 12 tysiač złotych (kala 3245 dalaraŭ). Maksimalny štraf dla kampanij i kiroŭcaŭ moža dasiahać adnaho miljona złotych (kala 250 tysiač dalaraŭ).
Kamientary