Drony razbambili NPZ u Samary i Krasnadarskim krai. A rasijskaja rakieta ŭščent raźniesła piacipaviarchovik u Kijevie
U noč na 28 žniŭnia ŭkraincy praciahnuli ataki dronaŭ na rasijskija NPZ. U toj ža čas Rasija naniesła samy masiravany ŭdar pa Ukrainie z pačatku lipienia: vykarystała 31 rakietu i 598 dronaŭ.
U Samary byŭ atakavany Kujbyšaŭski naftapierapracoŭčy zavod. Paśla ataki na pradpryjemstvie ŭźnikli šmatlikija pažary.
Hubiernatar Samarskaj vobłaści zajaviŭ, što «rehijon padvierhnuŭsia atacy varožych BPŁA». U aeraporcie Samary ŭviedzieny časovyja abmiežavańni na pryjom i adpraŭleńnie rejsaŭ, a taksama — abmiežavańni na pracu mabilnaha internetu.
U Krasnadarskim krai paśla ataki drona hareŭ Afipski NPZ — adno z bujnych naftapierapracoŭčych pradpryjemstvaŭ.
Pavodle infarmacyi rasijskaha kanała SHOT, pryčynaj zaharańnia stała «padzieńnie abłomkaŭ bieśpiłotnika na terytoryi Afipskaha naftapierapracoŭčaha zavoda».
Paviedamlałasia pra časovaje zakryćcio aeraporta Sočy.
U Vałhahradskaj vobłaści, pavodle hubiernatara Andreja Bačarova, była zafiksavana «masiravanaja ataka» dronaŭ. U horadzie Piatroŭ Vał Kamyšynskaha rajona ŭ vyniku padzieńnia abłomkaŭ BPŁA zaharełasia łakamatyŭnaje depo. Pažar byŭ likvidavany, paciarpiełych niama.
Pavodle źviestak Ministerstva abarony RF, za noč z 27 na 28 žniŭnia rasijskija SPA źbili 102 ukrainskija drony, u tym liku: 22 — nad Čornym moram; 21 — nad Samarskaj i 21 — nad Rastoŭskaj abłaściami; 18 — nad Krasnadarskim krajem.
U toj ža čas Rasija siońnia naniesła rakietny ŭdar pa Kijevie. Rakieta trapiła ŭ žyły dom.
Videa momantu ŭdaru publikujuć ukrainskija ŚMI.
Na hety momant viadoma pra 10 zahinułych, bolš za 48 atrymali ranieńni.
Ahułam u noč na čaćvier Rasija ažyćciaviła samuju masiravanuju pavietranuju ataku pa Ukrainie z pačatku lipienia.
Jak paviedamili ŭ Pavietranych siłach USU, usiaho Rasija vykarystała dla ŭdaru 629 abjektaŭ. Ź ich: 598 BPŁA (563 udałosia źbić), 20 rakiet Ch-101 (18 źbita), dzieviać rakiet «Iskander» (siem źbita) i dźvie rakiety «Kinžał» (adna źbita).
Heta najbujniejšy pa kolkaści vykarystanych BPŁA i dronaŭ udar z 9 lipienia, kali byŭ vykarystany 741 srodak pavietranaha paražeńnia, vynikaje sa źviestak Pavietranych sił.
Udary va ŭkrainskaj stalicy pryjšlisia pa bolš čym 20 łakacyjach, paviedamiŭ kiraŭnik MUS Ukrainy Ihar Klimienka. Paškodžańni atrymali kala 100 abjektaŭ, siarod ich šmatpaviarchovyja damy, pryvatnyja damy, ofisny budynak, dziciačy sadok, piša «RBK-Ukraina». U centry horada ŭdar pryjšoŭsia pa handlovym centry.
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska4
Kamientary
Pro bolnicy zabyli?Hdie ostalnyje 90 objektv v śpiskie?Vojennoje proizvodstvo, kazarmy, cientry priniatija riešienij. Hdie pohibšije ukrainskije hnierały?Ili hienierały tolko u russkich byvajut?