U nastupnyja 10 hadoŭ vučonyja spadziajucca pieramahčy biaspłodnaść. Ale hetaja technałohija niasie i novyja ryzyki

Havorka pra stvareńnie technałohii in-vitro hamiet (IVGs) — jajcakletki i śpiermatazoidy, jakija stvarajucca ŭ łabaratoryi ź pieraprahramavanych kletak skury abo stvałavych kletak čałavieka (u niezaležnaści ad hiendara). Heta adkryćcio zdolnaje źniać uzrostavyja (jak i lubyja inšyja) abmiežavańni na začaćcie, a taksama adkryć mahčymaść dla par ź inšymi seksualnymi aryjentacyjami mieć bijałahičnych dziaciej, zajavili navukoŭcy na niadaŭnim pasiadžeńni Upraŭleńnia pa fiertylizacyi i embryjałohii čałavieka ŭ Vialikabrytanii (HFEA), pieradaje vydańnie The Guardian.

Brytanski nahladalny orhan pa pytańniach fiertylnaści pryjšoŭ da vysnovy, što technałohija moža być na miažy žyćciazdolnaści.

Ale heta nie ŭsio. Technałohija IVGs całkam parušyć zvykły pryrodny paradak, jaki maje na ŭvazie abaviazkovuju najaŭnaść hienietyčnaha materyjału dvuch čałaviek dla atrymańnia naščadkaŭ. Chutka dla hetaha moža chapić adnaho čałavieka, albo zmoža ŭdzielničać cełaja hrupa ludziej (ad 3-4 baćkoŭ i bolš).

Na dumku navukoŭcaŭ, kancepcyja soła-baćkoŭstva, kali dzicia stvarajecca ź jajcakletki i śpiermatazoida adnaho čałavieka, źjaŭlajecca «krajniaj formaj incestu» i z vysokaj vierahodnaściu pryviadzie da recesiŭnych žorstkich hienietyčnych zachvorvańniaŭ, bo dzicia nie budzie mieć hienietyčnaj raznastajnaści.

U adroźnieńnie ad hetaha, multypleksnaje baćkoŭstva, dzie dzicia naradžajecca z udziełam hienaŭ čatyroch čałaviek, nie niasie takich bijałahičnych ryzyk. U hetym vypadku dźvie pary stvarajuć embryjony, ź jakich zatym atrymlivajucca hamiety dla kančatkovaha začaćcia. 

Ale pry niacotnaj kolkaści baćkoŭ ci jašče bolšaj ich cotnaj kolkaści nastupstvy dla dziciaci mohuć akazacca žudasnymi. Vysokija ryzyki dla zdaroŭja naščadkaŭ mohuć uźniknuć i pry złoŭžyvańni technałohijaj z boku pažyłych ci niepaŭnahadovych baćkoŭ, adznačajuć daśledčyki HFEA.

HFEA taksama padkreślivaje, što technałohija IVGs adkryje mahčymaść dla stvareńnia vialikaj kolkaści embryjonaŭ u łabaratoryi. U niekatorych krainach heta moža pryvieści da šyrokaha hienietyčnaha štučnaha adboru, kali baćki buduć adsiejvać nieŭpadabanyja ci «niepaŭnavartasnyja płady» jašče na stadyi kanstrujavańnia budučaha dziciaci, što moža viarnuć papularnaść eŭhieniki razam z ułaścivymi joj paniaćciami «čyścini kryvi» i «zabrudžvańnia hienafondu». 

Hetyja nieetyčnyja i rasisckija kancepcyi aktyŭna ŭžyvalisia ŭ 19-m — 20-m stahodździach, asabliva ŭładami Treciaha Rejchu padčas ich palityki hienacydu ŭ dačynieńni da inšych narodaŭ i «hienietyčna niepaŭnavartasnych hramadzian».

«Navukovyja daśledavańni ŭ halinie IVGs chutka raźvivajucca, i tamu nieabchodna zahadzia vyznačyć pravavyja miežy dla vykarystańnia hetaj technałohii», — adznačaje kiraŭnik HFEA Piter Tompsan.

Na dadzieny momant vykarystańnie štučnych hamiet zabaroniena ŭ kliničnaj praktycy va ŭsich krainach śvietu, ale ŭžo ciapier stanovicca vidavočnym: IVGs mohuć źmianić razumieńnie siamji i čałaviečaha začaćcia ŭ najbližejšyja 10 hadoŭ, kanstatuje The Guardian.

• 2
• 1
• 0
• 1
• 3
• 0
• 0
• 0