Kasatki topiać jachty la bierahoŭ Partuhalii. Tamu što im sumna
Na praciahu niekalkich hadoŭ maraki i turysty la bierahoŭ Ibieryjskaha paŭvostrava sutykajucca z napadami kasatak. Niadaŭna ŭ vyniku ich ataki patanuła turystyčnaja jachta. Hety vypadak — adzin z sotniaŭ padobnych sutyknieńniaŭ za apošnija hady. Ekśpierty miarkujuć, što pryčynaj takoj ahresii moža być zvyčajnaja nuda.
Jak piša The Telegraph, u subotu 13 vieraśnia kala plaža Fonte-da-Telja la ŭźbiarežža Partuhalii zhraja kasatak napała na sudna kłuba Nautic Squad, na borcie jakoha znachodzilisia piać čałaviek.
Na videazapisu vidać, jak adna z kasatak raz-poraz taraniła jachtu, pakul taja nie pačała chistacca i tanuć. Usie piać turystaŭ byli paśpiachova evakuiravany na susiednija łodki niezadoŭha da taho, jak ich sudna pajšło na dno.
Nieŭzabavie dapamoha spatrebiłasia jašče adnamu sudnu z čatyrma ludźmi na borcie, jakoje sutyknułasia z toj ža zhrajaj. Na ščaście, nichto nie paciarpieŭ.
Takija napady la ŭźbiarežža Ispanii i Partuhalii za apošnija hady značna pačaścilisia. Hałoŭnaja viersija, jakuju vyłučajuć marskija bijołahi, hučyć niečakana: žyvioły mohuć pavodzić siabie tak prosta ad nudy abo ŭ pošukach fizičnaj stymulacyi. Heta svojeasablivaja «hulnia», jakaja, adnak, pryvodzić da realnaj niebiaśpieki dla ludziej.
Jak paviedamlajecca, sudna kłuba Nautic Squad — treciaje, jakoje zatapili kasatki la Ibieryjskaha paŭvostrava z 2020 hoda.
Za hety pieryjad było zafiksavana nie mienš za 500 padobnych sutyknieńniaŭ, u vyniku jakich paškodžańni atrymała kožnaje piataje sudna. Uładam navat davodziłasia papiaredžvać marakoŭ ab niebiaśpiecy vychadu ŭ mora.
U sacyjalnych sietkach maraki dzielacca svaimi historyjami: «Nas teraryzavali kožny dzień na praciahu čatyroch tydniaŭ… Šmat paškodžanych łodak… Adna žančyna navat trapiła ŭ špital. Heta vielmi realnaja prablema».
Zvyčajnaj mišeńniu dla kasatak stanoviacca ruli łodak. Cikava, što ibieryjskaja papulacyja kasatak, pra jakuju idzie havorka, znachodzicca pad pahrozaj źniknieńnia — jana naličvaje mienš za 50 asobin.
Kamientary
Niekali pry šlupačnych apieracyjach davodziłasia apynacca ŭ centry ich zhrai, i nie adnojčy, krucilisia pobač, pakazvali siabie, i nie čapali, zato nivodnaja akuła nie nabližałasia, jany bajacca kasatak.
Mahčyma kasatki prajaŭlajuć niepakoj za małych, u peŭny pieryjad dahladu za imi(jany ž žyvuć siemjami), tamu j atakujuć usich, chto švendaje pa mory praź niama čaho rabić ?...