«Kamanda raźbitaja». Byłaja supracoŭnica «Bajsoła» raskazała, jak adbivajecca na fondzie rašeńnie pa Stryžaku

«Mnie zdajecca heta nieprymalnym»

— Čamu vy vyrašyli pakinuć Bysol?

— Ja vyrašyła pajści z kamandy, tamu što na siońniašni dzień unutranyja pracesy ŭ korani razychodziacca z maimi ŭłasnymi kaštoŭnaściami. Paśla ŭsioj situacyi z kiejsam charasmienta i taho, jak prajšoŭ unutry kamandy praces pryniaćcia finalnaha rašeńnia, i paśla ŭsiaho taho, što zajaviŭ Andrej.

Ja sama, jak apieracyjnaja dyrektarka, zaŭsiody i ŭsim raskazvała pra toje, jak uładkavany praces pryniaćcia rašeńniaŭ u fondzie: što rašeńni prymajucca dyrektaratam, što niama praktyki takoj, kab Andrej niešta vyrašaŭ adnaasobna. Heta važnyja ŭnutrykamandnyja pryncypy, na jakich mnohaje budavałasia.

Bysol publična prytrymlivajecca pryncypu prazrystaści. Ale ŭ vyniku ŭsie pryncypy i pracesy byli prosta vyklučanyja ŭ adnabakovym paradku. Nie kažučy ŭžo pra toje, pra jakuju situacyju idzie havorka, jakaja situacyja pryviała nas da hetaha ŭsiaho. Mnie zdajecca heta nieprymalnym — zastavacca ŭ arhanizacyi paśla takich vynikaŭ pracy kamisii.

— Kali b Andrej nie zastavaŭsia, vy b zastalisia ŭ arhanizacyi? Što mienavita było dla vas vyrašalnym momantam?

— Tak, ja mahła b praciahnuć pracu. Vyrašalnaj stała ŭsia hetaja situacyja, na samaj spravie: pačynajučy ad kiejsaŭ, pra jakija pryjšłosia daviedacca, i zakančvajučy kateharyčnym admaŭleńniem damoŭlenaściaŭ ab pracesach pryniaćcia rašeńniaŭ, vidavočnaje adnaasobnaje panavańnie.

«Praces pajšoŭ» nie tudy «ŭ momant, kali rašeńnie było ahučana Andreju»

— U jaki momant praces razhladu «pajšoŭ nie tudy»?

— Z samim razhladam było ŭsio ŭ paradku. Kamisija razam z davieranymi asobami prarabiła vialikuju pracu, my razmaŭlali ź vialikaj kolkaściu źniešnich ekśpiertaŭ, nie tolki ź biełaruskaha siektara, i płanavali jašče praciahnuć ź imi pracu pa adbudovie ŭnutranych pracesaŭ.

Rašeńnie ŭnutry kamisii prymałasia ŭ całkam «zdarovym» farmacie. Praces pajšoŭ «nie tudy» ŭ momant, kali rašeńnie było ahučana Andreju. Jon nie zmoh pryniać jaho, choć i publična zajaŭlaŭ pra toje, što «rašeńnie kamisii budzie dla jaho abaviazkovym da vykanańnia». Heta nie maje fantazii, jon sam pisaŭ pra heta ŭ siabie ŭ fejsbuku.

— Kali ŭsio heta adbyłosia letam, zdavałasia, što jon prymaje situacyju, byli navat čutki pra jaho novuju pracu. Čamu, kali było ahučana rašeńnie, jon vyrašyŭ usio pierahledzieć?

— Kali ščyra, u mianie ŭ hałavie takija ž pytańni. Tak, letam usio było mocna spakajniej, Andrej prajaŭlaŭ prykmiety damovazdolnaści adnaznačna. Ale ŭ momancie, paśla ahučvańnia vynikaŭ pracy kamisii, padčas roznych kamandnych sustreč my sutyknulisia z całkam procilehłaj situacyjaj. Ja nie čakała takoj kolkaści manipulacyj, kali ščyra.

— Jak jon manipulavaŭ?

— Andrej inicyjavaŭ praces kamandnaha hałasavańnia i štučna stvaryŭ situacyju, u jakoj vybar pa fakcie stajaŭ nie ŭ płoskaści «ci praciahvać ź im supracoŭnictva», a ŭ płoskaści «kamu vy daviarajecie: mnie (Andreju) abo kamisii». A jana, darečy, składałasia z kamandy fondu. Heta vyklikała sapraŭdny ŭnutrany kanflikt.

Mnie vielmi baluča za kamandu i ja nie ŭjaŭlaju, što ciapier unutry pieražyvajecca.

U vyniku zaraz pajšło try čałavieki z fondu. Było i šmat inšaha, ale ja b nie chacieła b heta ahučvać, trochi soramna, kali možna tak skazać. 

«Ja lubiła svaju pracu»

— U jakim stanie zastavaŭsia Bysol na momant, kali vy pajšli, i što dumajecie, jak buduć raźvivacca spravy ŭ budučyni?

— Ahulny stan Bysol niaprosty — kamanda raźbitaja ad usich padziej, ź niamym pytańniem pra toje, jak ža prymajucca rašeńni ŭ fondzie. Partniory, jakija ŭvažliva sačyli za situacyjaj, pojduć prymać svaje rašeńni adnosna dalejšaha supracoŭnictva. Vialikaje pytańnie, jak heta ŭsio adabjecca na ŭzajemadziejańni z pryvatnymi donarami. Usio heta mocna ŭskładniaje budučyniu.

Mnie praŭda chaciełasia b, kab ideja i misija fondu realizoŭvalisia, usio ž heta vielmi vialikaja sprava. Ale nie ŭjaŭlaju, jak heta ciapier budzie mahčyma ŭ poŭnym abjomie.

Ja lubiła svaju pracu i zastavałasia ŭ pracesach da apošniaha, navat niahledziačy na abmiežavalnyja asabistyja abstaviny.

• 0
• 0
• 2
• 10
• 2
• 8
• 4
• 0