Na pasiadžeńni Minharvykankama 25 vieraśnia haradskoje kiraŭnictva abmierkavała płany pa horadabudaŭnictvie i raźvićci infrastruktury. Raźvićcio Minska ŭ budučyni budzie pravodzicca pavodle ŭzvažanaj i sistemnaj stratehii, piša ahienctva «Minsk-Naviny».
Staršynia Minharvykankama Uładzimir Kucharaŭ adznačyŭ, što Minsk — kampaktny horad, tamu ŭsie novyja zabudovy treba płanavać vielmi ŭvažliva, kab jany adpaviadali zakanadaŭstvu i najaŭnaj struktury horada.
Asablivaja ŭvaha budzie nadavacca nie tolki centralnym rajonam, ale i ŭskrainam, a taksama budaŭnictvu žylla ŭ haradach-spadarožnikach, stvareńniu nieabchodnaj infrastruktury i analizu terytoryj dla novych abjektaŭ — jak žyłych, tak i administracyjnych ci pramysłovych.
Staršynia kamiteta architektury i horadabudaŭnictva Viktar Hućko padkreśliŭ, što hienieralny płan horada praduhledžvaje zachavańnie nasielnictva Minska na ŭzroŭni dvuch miljonaŭ čałaviek. Dla strymańnia rostu horada realizujecca stratehija farmiravańnia ahłamieracyi razam z haradami-spadarožnikami.
Raźvićcio horada budzie hruntavacca na padziele Minska na dzieviać vialikich rajonaŭ, jakija možna ŭsprymać jak «unutranyja harady».
U kožnym rajonie buduć raźmiaščacca abjekty absłuhoŭvańnia nasielnictva, zony adpačynku, spartyŭnyja placoŭki, kulturnyja i zabaŭlalnyja centry, a taksama pracoŭnyja miescy.
Płanujecca, što terytoryja horada krychu pavialičycca — prykładna na 3,3 tysiačy ha, da 38,1 tysiačy ha, a kolkaść nasielnictva vyraście na 25—30 tysiač čałaviek. Asnoŭnyja źmieny zapłanavany ŭ paŭnočnym i ŭschodnim siektarach horada.
U paŭnočnym siektary ciapier realizujecca inviestycyjny prajekt «Paŭnočny Bierah», a va ŭschodnim buduć źjaŭlacca novyja žyłyja rajony kala ahraharadka Kałodziščy i ŭ masivie Zialony Bor. Praduhledžana taksama budaŭnictva nieabchodnaj sacyjalnaj infrastruktury dla novych rajonaŭ, a raźvićcio pramysłovych zon budzie ažyćciaŭlacca ŭ sučasnych formach: technałahičnyja parki, navukova-vytvorčyja abjadnańni i raźvitaja absłuhoŭvajučaja infrastruktura.
Raźvićcio transpartnaj sistemy Minska praciahniecca. Tranzitnyja patoki transpartu buduć vyviedzienyja z treciaha haradskoha kalca, zamiest hetaha buduć pabudavanyja dźvie paŭkalcavyja mahistrali z paramietrami haradskich praśpiektaŭ. Heta dazvolić pavialičyć płošču parkaŭ i nabiarežnych. Płanujecca budaŭnictva treciaj linii mietro i prajektavańnie čaćviortaj, a taksama pavieličeńnie pieravozak čyhunačnym transpartam praz stancyju «Minsk-Pasažyrski».
U horadzie praciahvajecca stvareńnie sučasnych vieładarožak, jakija buduć prachodzić pobač z asnoŭnymi zonami masavaha pryciahnieńnia ludziej.
Kamientary