Artura Siańko pakinuli pad vartaj u ZŠA. Jamu pa-raniejšamu pahražaje departacyja
Sudździa admoviŭsia vyzvalać demakratyčnaha aktyvista ź Biełarusi Artura Siańko pad abaviazacielstva źjaŭleńnia. Jamu pa-raniejšamu pahražaje departacyja.
Jak paviedamiŭ Reform.news siabra Artura Siańko, u paniadziełak adbylisia papiarednija słuchańni pa spravie ab departacyi maładoha čałavieka. Słuchańni pravodzilisia ŭ režymie anłajn. Sudździa Semiuel Uiljams pryniaŭ rašeńnie pakinuć Siańko pad vartaj.
Asnoŭnaje pasiadžeńnie adbudziecca 28 kastryčnika. Da 14 kastryčnika advakat Siańko moža padać dadatkovyja dakumienty.
Biełarus znachodziŭsia na terytoryi ZŠA lehalna. 26 žniŭnia 2021 hoda Artur Siańko prybyŭ u punkt propusku Otay Mesa Port of Entry, štat Kalifornija, dzie zajaviŭ pra bojaź pieraśledu i paprasiŭ palityčnaha prytułku. Takaja pracedura praduhledžana Zakonam ab imihracyi i hramadzianstvie. Artur Siańko jak minimum z 2022 hoda znachodzicca ŭ miždziaržaŭnym vyšuku pa palityčnym artykule 369 KK RB — abraza pradstaŭnika ŭłady.
Praz dva dni paśla prybyćcia ŭ ZŠA jon byŭ vyzvaleny da dalejšaha razhladu spravy biez pryznačanaj daty suda. Paśla hetaha jon padaŭ piśmovuju zajavu na pradastaŭleńnie palityčnaha prytułku, a taksama na praciahu ŭsiaho času znachodžańnia ŭ ZŠA supracoŭničaŭ ź mihracyjnymi orhanami, padavaŭ kantaktnyja dadzienyja i infarmacyju pra miesca svajho znachodžańnia.
15 žniŭnia 2025 hoda jon byŭ vyklikany paviestkaj u pradstaŭnictva Departamienta ŭnutranaj biaśpieki ZŠA (U.S. Department of Homeland Security) u Ńju-Jorku. Artur Siańko prybyŭ na miesca razam z advakatam. Dovady i arhumienty advakata ab zakonnym znachodžańni ŭ ZŠA Artura Siańko jak prasiciela prytułku nie byli pryniaty. Imihracyjnyja aficery admovilisia hladzieć dakumienty.
Arturu Siańko nadzieli kajdanki i supravadzili ŭ izalatar. Akramia taho, supracoŭniki mihracyjnaj słužby prapanavali biełarusu padpisać dakumient pra toje, što data, miesca i abstaviny jaho prybyćcia na terytoryju ZŠA nieviadomyja, ad čaho jon admoviŭsia, bo, pavodle jaho słoŭ, heta supiarečyć rečaisnaści.
Ciapier čytajuć
Mer Minska chacieŭ sabie pasadu va ŭradzie, ale Łukašenka nie puściŭ2
Kamientary
A sprava ŭ jaho na 99,9% vyjhryšnaja: abraza pradstaŭnika ŭłady ŭ ZŠA heta nia tolki nie złačynstva, a abaronienaje 1-j Papraŭkaj (svaboda słova) vykazvańnie. A ŭ Biełarusi jamu za heta turma śviecić.
Dva miesiacy ŭ turmie - i ŭ jaho pramy šlach da hramadzianstva praz 5 hod adčyniajecca. Uličvajučy, što ludzi takoha ščaścia čakajuć pa 8-10 hod, ja dumaju, jon pavinien jašče dziačyć ICE i sudździ. Kali, kaniešnie, za im niama kryminału ŭ ZŠA.