«Dla kožnaha byŭ svoj televizar». Biespracoŭny biełarus raskazaŭ, jak u Hiermanii jamu zrabili biaspłatnuju apieracyju
Pavieł Sakałoŭski, u minułym adzin ź lidaraŭ Biełaruskaha niezaležnaha prafsajuza na AAT «Biełaruśkalij», napisaŭ dla «Salidarnaści», jak heta — lažać u zvyčajnaj niamieckaj balnicy, pryčym być pry hetym «darmajedam».
Na dniach mianie vypisali paśla apieracyi ŭ klinicy Bremiena. I pakul śviežyja ŭspaminy, chaču padzialicca hetym dośviedam.
Apieracyja była płanavaja — pa vyrazańni pierfaracyi ŭ barabannaj pieraponcy (nastupstvy daŭniaj spartyŭnaj traŭmy: u školnyja hady aktyŭna zajmaŭsia boksam).
U balnicy ja pravioŭ čatyry dni.
Važna: na dadzieny momant u mianie niama pastajannaj pracy. Z punktu hledžańnia režymu Łukašenki, ja adnošusia da katehoryi «darmajedaŭ», jakija pavinny płacić za miedycynskuju dapamohu (takija idei ŭładami vykazvalisia nieadnarazova).
U Hiermanii staviacca inakš: ja nie tolki atrymlivaju dapamohu ad centra pa pracaŭładkavańni, ale i standartnuju miedycynskuju strachoŭku dla takoj katehoryi ludziej.
U dzień apieracyi ŭ 8:30 ranicy ja byŭ u rehistratury. Addaŭ dakumienty dla špitalizacyi, jakija byli padrychtavany zahadzia. Mianie nakiravali ŭ adździaleńnie, dzie lažać usie, kamu robiać płanavyja apieracyi.
Tam vydali mieniu, kab ja adznačyŭ, što chaču na śniadanak, abied i viačeru. Vybar vialiki, uklučajučy pazicyi dla viehietaryjancaŭ.
Zatym mianie zaprasili ŭ pakoj, dzie čarhovy raz spytali pra moj stan, pamierali tempieraturu, cisk, saturacyju kryvi i skazali, što daviadziecca krychu pačakać.
Ja pajšoŭ znajomicca z terytoryjaj. U balnicy jość park z sažałkaj, fantanam i łavačkami, svaja kircha, niekalki karpusoŭ, budynki dla miedycynskich lekcyj i sieminaraŭ, ułasnaje kafe, viertalotnaja placoŭka dla dastaŭki składanych pacyjentaŭ.
U pryznačany čas ja viarnuŭsia ŭ pryjomny pakoj. Tam mnie vydali rečy, u jakija treba pieraapranucca, a maje asabistyja, pierapisaŭšy, pakłali ŭ vialiki boks i apiačatali jaho.
Mianie pasadzili ŭ kresła i pavieźli ŭ apieracyjnuju. Zatym u adnym z pamiaškańniaŭ pierakłali na katałku, nakryli koŭdraj, i my pradoŭžyli šlach.
U pieradapieracyjnym adździaleńni da mianie pryjšła bryhada aniestezijołahaŭ: pytalisia, jak siabie adčuvaju, ci jość alerhii, pierakanalisia što ja — heta ja, spytaŭšy datu naradžeńnia i jakuju apieracyju mnie treba rabić, pravieryli branzalet z asabistymi danymi na ruce, jaki mnie nadzieli krychu raniej.
Paśla hetaha dali narkoz. U momant, kali adčuŭ, što «vyrubajusia», jašče paśpieŭ pahladzieć na hadzińnik, što visieŭ u apieracyjnaj — 13:40.
Ačuniaŭ u prastornym pamiaškańni, padzielenym pieraharodkami: heta miesca, dzie ludzi prychodziać u siabie paśla apieracyi. Tam aniestezijołahi i reanimatołahi zdymajuć pakazańni z pryboraŭ, pastajanna zapisvajuć u časopis usio heta. Znoŭ spytali, jak siabie adčuvaju, pa majoj prośbie prynieśli vadu ŭ šklancy z sałominkaj.
U 17:00 pa mianie pryjšli i pieravieźli ŭ pałatu, prosta na łožku, jaki ŭsie hetyja dni byŭ potym maim.
U adździaleńni ŭžo byli maje rečy. Mnie addali telefon, kab moh napisać i patelefanavać svajakam. Nu a praz paŭhadziny prynieśli viačeru.
Padčas znachodžańnia ŭ balnicy vadu, čaj, kavu, sok možna brać kruhłyja sutki (akramia taho, što rehularna prynosić piersanał) u kalidory, na śpiecyjalnym vazku.
Try razy na dzień u ciabie mierajuć tempieraturu, cisk, saturacyju, pytajucca, jak spravy, jość knopka vykliku miedrabotnika.
Ranicaj paśla śniadanku daktary robiać ahlad, u ich mabilny pierasoŭny post z usim nieabchodnym abstalavańniem. Jany ŭ kampjutary adkryvajuć tvaju historyju i ŭnosiać novyja danyja.
Mnie pašancavała ź vidam z pałaty, moh sustrakać šalona pryhožyja śvitanki (adździaleńnie znachodziłasia na 7‑ym paviersie).
Pałata na try čałavieki, dla kožnaha byŭ svoj televizar, taksama razdali navušniki, kab my mahli hladzieć televizar i nie zaminać adzin adnamu.
Praz čatyry dni mianie vypisali, pravioŭšy ranicaj niekalki testaŭ. Apieracyja prajšła dobra, pryznačyli čas, kali pryjści na ahlad i źniaćcie švoŭ.
Ja vielmi ŭražany ŭzroŭniem absłuhoŭvańnia i dastupnaści miedycyny dla ŭsich słajoŭ nasielnictva ŭ Hiermanii. Tut absalutna nie maje značeńnia, chto ty — praces atrymańnia dapamohi adnolkavy dla ŭsich.
Ciapier čytajuć
Mackievič: Zaraz nie čas asprečvać lidarstva Cichanoŭskaj. Jana vielmi dobraja ŭ jakaści lidarki2
Kamientary