Ministr zamiežnych spraŭ Litvy: Kali źmiena formy achovy pieraškadžaje dziejnaści Cichanoŭskaj — treba pra heta havaryć
Kiastucis Budrys zaklikaje ofis Śviatłany Cichanoŭskaj źviarnucca ŭ kampietentnyja orhany, kali źmiena statusu achovy pieraškadžaje ažyćciaŭleńniu jaje dziejnaści.
Tak ministr adreahavaŭ na navinu ab admienie vizitu Śviatłany Cichanoŭskaj u Armieniju paśla admovy ŭ achovie, paviedamlaje Delfi.lt.
«Ja nie biarusia sudzić, što ŭ ich dziejnaści važna, što bolš važna i kudy im treba jechać. Heta ich samastojnaja dziejnaść. (…) Sam pierahlad achovy nie byŭ palityčnym rašeńniem ab źnižeńni ŭzroŭniu, heta źmianieńnie formy. Kali heta źmianieńnie formy pieraškadžaje dziejnaści, treba pra heta kazać», — skazaŭ Budrys žurnalistam u MZS.
«Adnak hetaje pytańnie nie źviazana ź źniešniaj palitykaj Litvy», — padkreśliŭ jon.
«Dzie Ofis choča ažyćciaŭlać svaju dziejnaść — jany volnyja vyrašać. Ale dzie b jon ni znachodziŭsia, my abaviazkova budziem supracoŭničać, bo ŭ nas šmat ahulnych tem», — padkreśliŭ Kiastucis Budrys.
Partał 15min u piatnicu paviedamiŭ, što paśla taho, jak Litva adchiliła zapyt ab pryznačeńni aficyjnaj asoby dla supravadžeńnia Śviatłany Cichanoŭskaj padčas jaje vizitu ŭ Armieniju, pajezdku palityka pryjšłosia admianić. Miž tym, u MZS zapeŭnili, što litoŭskaja dypmisija ŭ Armienii hatova akazać usiu nieabchodnuju padtrymku na čas vizitu.
Cichanoŭskaja pavinna była adpravicca ŭ Armieniju dla ŭdziełu ŭ mierapryjemstvie Euronest. Heta adna z asnoŭnych placovak dla supracoŭnictva pamiž deputatami Jeŭrapiejskaha parłamienta i parłamientaryjami krain Uschodniaha partniorstva: Ukrainy, Małdovy, Hruzii, Armienii i Azierbajdžana.
Nahadajem, što Litva pryniała rašeńnie ab skaračeńni fizičnaj achovy lidara biełaruskaj apazicyi. Jaje achova pieradajecca sa Słužby biaśpieki pieršych asob dziaržavy ŭ Biuro kryminalnaj palicyi. Heta rašeńnie ŭstupiła ŭ siłu z 1 kastryčnika.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki4
Kamientary
Heta namiok?