MZS Biełarusi skazaŭ Polščy i Litvie, što pytańnie adkryćcia miažy nie moža vyrašacca imi adnaasobna.
«Nie premjeru Polščy i tym bolš Litvy vyrašać, kali adnoviać svaju pracu punkty propusku praź dziaržaŭnuju miažu «Babroŭniki» i «Kuźnica». Tym nie mienš my prymajem da viedama ich zajavy i ličym nieabchodnym vyrazna akreślić našu pryncypovuju pazicyju. Miaža — heta składanaja inžynierna-techničnaja i arhanizacyjnaja sistema. Lubyja źmieny ŭ režymie jaje pracy patrabujuć paŭnavartasnaj dvuchbakovaj padrychtoŭki. Biełaruś pahodzicca z adkryćciom sa svajho boku miažy tady i tolki tady, kali budzie poŭnaściu hatovaja da hetaha infrastrukturna, kadrava i, što najbolš važna, u śfiery biaśpieki», — zajaviŭ pradstaŭnik MZS Biełarusi Rusłan Varankoŭ.
Jon źviarnuŭ uvahu na adsutnaść paśladoŭnaści ŭ dziejańniach zachodnich susiedziaŭ Biełarusi: abvieščanyja terminy pastajanna pieranosiacca, a samo pryncypovaje rašeńnie — pierahladajecca.
«U cełym adnaŭleńnie funkcyjanavańnia punktaŭ propusku nie moža i nie budzie rehulavacca adnabakovymi rašeńniami. Takoha ž padychodu my budziem prytrymlivacca i va ŭzajemadziejańni ź litoŭskim bokam, jaki napiaredadni ŭvioŭ abmiežavańni na biełaruska-litoŭskaj miažy, — skazaŭ Rusłan Varankoŭ. — Adnaŭleńnie pracy taksama niemahčyma biez naładžvańnia prafiesijnaha dyjałohu pamiž kampietentnymi słužbami. My čakajem ad polskaha boku adkaznaha padychodu: dasiahnutyja damoŭlenaści pavinny być stabilnymi i nadziejnymi».
«Hramadzianie i biznes nie mohuć stanavicca zakładnikami situacyj, kali rašeńni ab zakryćci miažy prymajucca pa-za pravavymi miežami i biez papiaredniaha paviedamleńnia. Havorka idzie nie tolki pra biełarusaŭ, palakaŭ ci litoŭcaŭ, ale taksama i pra hramadzian inšych dziaržaŭ — členaŭ Jeŭrapiejskaha sajuza, dla jakoha biełaruska-polskaja i biełaruska-litoŭskaja miežy źjaŭlajucca ŭschodniaj miažoj», — dadaŭ pres-sakratar.
«Tut jak nikoli darečy vykazvańnie ministra zamiežnych spraŭ Polščy spadara Radosłava Sikorskaha: dla tanha patrebnyja dvoje. Biełaruski bok svaju partyju ŭžo daŭno i vyrazna vykonvaje. Ciapier čakajem, kali ž susiedzi, narešcie, vyvučać svaju», — reziumavaŭ jon.
Nahadajem, što punkty propusku ŭ «Kuźnicy» i «Babroŭnikach» mohuć być adkrytyja praz dva tydni, a Litva zakryła miažu ź Biełaruśsiu da 30 listapada.
Łukašenka zajaviŭ, što litoŭcy sami z terytoryi Biełarusi pierakidvali cyharety na mietearałahičnych zondach
Łukašenka zajaviŭ, što chutka śmiardziučaja Jeŭropa budzie płacić Biełarusi za čystaje pavietra
Jurkonis pra zakryćcio miežaŭ: Davajcie nie dumać jašče pra Pieciu z Baranavič, jaki choča zarabić dzieści tam u Biełastoku
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary