«Heta nie płoŭ, a kaša ź miasam». Biełarusy znoŭ spračajucca z-za školnaha charčavańnia
U adnoj ź biełaruskich škoł dzieciam pryhatavali płoŭ. Rolik z płovam vykłała karystalnica tyktoku ź nikam «Školny kuchar». Kuchary ździvilisia — čamu školniki admaŭlajucca jeści haračaje? «Voś čamu dzieci nie jaduć? Zrabili płoŭ, a jany prynieśli ŭ stałovuju čypsy, koka-kołu — voś ich ježa!» — aburałasia kucharka na videa, zaŭvažyła BGMedia.
Kadry chutka stali virusnymi i sabrali bolš za 2800 kamientaroŭ.
Biełarusy padzialilisia na dva łahiery. Adny ŭspaminali svoj školny płoŭ z nastalhijaj: «O, pamiataju taki! Vielmi navat smačny byŭ». Inšyja nie pahadzilisia: «Heta nie płoŭ, a kaša ź miasam. Navat nie padobny da płova. Ad adnaho vyhladu apietyt źnikaje».
Pitanije v škole!
«U dziaciej pavinien być vybar straŭ, jak u narmalnaj stałovaj. Va ŭsich husty roznyja. Čamu na vytvorčaści, va ŭniviersitetach jość vybar, a dzieciam — nie? Nie biaspłatna ž kormiacca», — pisali kamientatary.
Znajšoŭsia i adkaz ad prahmatykaŭ: «Ja hladžu, tut adny hurmany sabralisia pa płovie. Heta hramadskaje charčavańnie, a nie kaŭkazski restaran».
Niekatoryja ličać, što dzieci prosta «zažralisia».
«Pierabivajuć apietyt čypsami i sałodkim, potym nie jaduć. Nie davać im hrošaj na hłupstva — i ŭsio stanie narmalna», — rajać niekatoryja kamientatary.
Inšyja, naadvarot, prapanoŭvali zakryć školnyja stałoŭki i pakinuć tolki bufiety: chaj, maŭlaŭ, baćki sami źbirajuć «ssabojki».
Tym časam u Biełarusi razharajecca surjoznaja sprečka adnosna školnaha charčavańnia. Pravierki Kamiteta dziaržkantrolu pakazali: u stałoŭkach chapaje parušeńniaŭ. Tak, u adnoj sa škoł Mahilova kuchary pry padrychtoŭcy bitočkaŭ «aščadzili» 3,5 kiłahrama miasa. U Salihorsku revizory znajšli schavanyja miaški z mukoj, cukram i 12 litraŭ soku.
Na naradzie 23 kastryčnika Alaksandr Łukašenka aburyŭsia:
«Ja vas nieadnarazova papiaredžvaŭ — abkradać dziaciej, trucić ich niajakasnaj ježaj złačynna! Dziaržava tracić vielizarnyja hrošy, a adkidaŭ pałova. Heta narmalna?»
Paśla raznosu ministr adukacyi Andrej Ivaniec zajaviŭ, što ciapier dyrektary škoł abaviazanyja štodnia kaštavać ježu, jakuju hatujuć u stałovych. Tak chočuć «uzmacnić piersanalnuju adkaznaść».
U sacsietkach heta ŭspryniali z humaram: «Ciapier dyrektar budzie pracavać pa sumiaščalnictvie dehustataram i dyjetołaham».
Biełarusy adznačajuć, što prablema nie tolki ŭ smaku, ale i ŭ arhanizacyi charčavańnia.
«Hałoŭnaja biada — nie smak, a tempieratura. Pakul dzieci dabiarucca da stałovaj, usio ŭžo astyła», — pišuć u kamientarach.
Ciapier u krainie bolš za miljon školnikaŭ charčujucca ŭ navučalnych ustanovach, ź ich kala 750 tysiač — za košt biudžetu. Pry hetym z 1 kastryčnika košt školnaha charčavańnia vyras prykładna na 5%. Ułady abiacali, što heta dazvolić kuplać bolš jakasnyja pradukty.
Łukašenka abvinavaciŭ školnych kucharaŭ u kradziažy. Ludzi pakryŭdzilisia
Ministr adukacyi Ivaniec zajaviŭ, što dyrektar škoły pavinien sam zdymać probu ŭ školnaj stałovaj
Čynoŭniki znajšli parušeńni ŭ školnych stałovych
Łukašenka ŭziaŭsia za školnyja abiedy i prydumaŭ, što rabić z adkidami ŭ stałoŭkach
Kamientary