Padčas vizitu ŭ Aŭstraliju Śviatłana Cichanoŭskaja pieramiaščałasia pa Sidnei na Uber
Pra heta «Lusterku» raspavioŭ jaje dypłamatyčny daradca Dzianis Kučynski. Pavodle jaho słoŭ, heta vyklikała vialikaje ździŭleńnie ŭ achovy, jakuju ŭłady krainy nadali dla lidarki biełaruskich demakratyčnych sił.
Padčas pajezdki ŭ Aŭstraliju Śviatłana Cichanoŭskaja sustrełasia z vysokapastaŭlenymi čynoŭnikami hetaj krainy: premjer-ministram Entani Ałbanizam, ministram zamiežnych spraŭ Peni Vonh i deputatami parłamienta. Lidarka demsił abmiarkoŭvała ź imi situacyju ŭ Biełarusi, padtrymku Ukrainy i sankcyi.
Dypłamatyčny daradca Cichanoŭskaj Dzianis Kučynski adznačyŭ, što vizit prachodziŭ na vysokim uzroŭni: palityku dali dziaržaŭnuju achovu «na ŭzroŭni premjer-ministra i hienierał-hubiernatara».
— Heta, z adnaho boku, pryznańnie jaje statusu, a z druhoha — kłopat pra biaśpieku, — adznačyŭ Kučynski. — Adnak pa damoŭlenaści z aŭstralijskim bokam transpart my pavinny byli zabiaśpiečvać sami. U staličnaj Kanbiery nam vielmi dapamahała litoŭskaje pasolstva, ale ŭ Sidnei situacyja vyhladała inakš: łahistyka była całkam na našym zabieśpiačeńni.
Pavodle jaho słoŭ, u hetym horadzie Cichanoŭskaja z kalehami vyrašyła karystacca taksi. Heta vyklikała nieparazumieńnie ŭ miascovaj słužby biaśpieki.
— Miascovaja achova była ździŭlena, kali daviedałasia, što delehacyja na čale ź lidarkaj demsił budzie pieramiaščacca pa Sidnei na… Uber. Ale dla nas heta byŭ całkam śviadomy vybar — dziela ekanomii času i srodkaŭ, — tłumačyć Dzianis Kučynski. — Prahrama była nastolki ščylnaj, što kožnaja chvilina mieła značeńnie: pieramovy, intervju, dyskusii, sustrečy ź biełaruskaj dyjasparaj. Zvyčajna padčas zamiežnych pajezdak Śviatłana nie pieramiaščajecca na taksi, tak mohuć rabić tolki členy delehacyi.
Daradca Cichanoŭskaj dadaŭ, što taki farmat pracy dazvoliŭ być maksimalna praduktyŭnymi.
— Darečy, padčas adnoj z takich pajezdak na Uber Śviatłana Cichanoŭskaja navat dała intervju adnamu z najbujniejšych aŭstralijskich časopisaŭ — prosta z zadniaha siadzieńnia aŭtamabila. U cełym heta było vielmi charakterna dla ŭsiaho vizitu i asablivaściej miascovaha pratakołu: minimum pompy, maksimum efiektyŭnaści. My staralisia vykarystoŭvać kožnuju chvilinu, kab raspavieści pra Biełaruś i sustrecca z tymi, chto moža padtrymać našu krainu, — padsumavaŭ jon.
Pavodle słoŭ Kučynskaha, za pajezdki Cichanoŭskaj na Uber u Sidnei delehacyja zapłaciła kala 40 aŭstralijskich dalaraŭ (kala 78 biełaruskich rubloŭ pa kursie Nacbanka na 10 listapada).
Ciapier čytajuć
Łatuška pieramoh usich na vybarach u Kaardynacyjnuju radu13
Łatuška pieramoh usich na vybarach u Kaardynacyjnuju radu
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary