Pamiłavany i departavany ŭkrainiec Katovič raskazaŭ, za jakuju abrazu na jaho pakryŭdziŭsia Łukašenka

Alaksandr pierajechaŭ u Biełaruś z Ukrainy ŭ 2019 hodzie. Pryčyna prostaja — kachańnie. U 2016 hodzie ŭ Adesie, adkul sam rodam, jon paznajomiŭsia ź biełaruskaj dziaŭčynaj.

Sprabavali žyć razam i va Ukrainie, i ŭ Polščy, ale ŭ vyniku asieli ŭ Biełarusi, dzie i pabralisia šlubam.

— Ja pačaŭ rabić dazvoł na žycharstva, znajšoŭ pracu… A ŭ 2022 hodzie pačałasia vajna. Ja vykazaŭ svaju pazicyju adrazu.

Alaksandr pryznajecca, što emocyi strymać było składana, tamu jon pačaŭ pisać kamientaryi ŭ čacie «Biełaruś za MKADam».

— Pisaŭ, što Rasija — akupant, ahresar i hetak dalej.

Ale kaža, što praciahnułasia heta ŭsio niadoŭha — Alaksandr supakoiŭsia i zabyŭ navat pra tyja kamientary, jakija pakidaŭ. A praz paŭtara hoda jamu pra ich nahadali.

— 8 žniŭnia 2023 hoda a šostaj ranicy da mianie pryjšoŭ HUBAZiK. Čałaviek vosiem sa strabaskopami, ščytami, šlemami i pistaletami. Zakavali mianie ŭ naručniki, skazali: «Ty pisaŭ, pisaŭ i dapisaŭsia. Małajčyna».

U HUBAZiKu Alaksandru pahražali, źbivali, a taksama prymusili zapisać pakajalnaje videa.

— Usio pytali: «Z SBU pracuješ?!». Žartavali: to kazali, što «ŭsio, ty adsiul nie vyjdzieš», to «moža, praz try dni ciabie i adpuścim». U vyniku advieźli da śledčaha. Toj skazaŭ, kab u mianie nie było iluzij, bo raspačali kryminalnuju spravu pa artykule 130 č. 1 — raspalvańnie varožaści. Faktyčna za toje, što ja pisaŭ «rasijanie takija-siakija». Śledčy skazaŭ, što dla mianie ŭsio budzie drenna.

Paśla ŭkrainiec trapiŭ na Akreścina. Jon nazyvaje troje sutak tam samymi žudasnymi za ŭvieś čas.

— Mianie źmiaścili ŭ karcar — pakojčyk płoščaj try-čatyry kvadraty. Tam było jašče 12 čałaviek. Usie stajali, bo miesca prysieści amal nie było. To-bok siadzieli pa čarzie. Krychu pasiadzieŭ i ŭstaješ, kab inšy moh adpačyć. Było leta — nam ci rabili skraźniak, ci začyniali ŭsio i tempieratura padymałasia hradusaŭ da 45. Tak śpiakotna, što majki možna było prosta vykručvać — pot ciok ručajom. U apošni dzień ja mocna zachvareŭ.

Nastupnym punktam dla Alaksandra stała Vaładarka. Tam umovy byli nie značna lepšyja: pierapoŭnienyja kamiery, błaščycy, žudasnaje staŭleńnie.

Na Vaładarcy Alaksandr pravioŭ paŭhoda, za hety čas u jaho niekalki razoŭ źmianiaŭsia śledčy, a kolkaść kryminalnych artykułaŭ usio pavialičvałasia.

U vyniku jamu vystavili abvinavačvańnie pa čatyroch artykułach — dadali 361 prym. 1 č. 3 (udzieł u ekstremisckim farmiravańni), 367 č. 2 (paklop na Łukašenku), 368 č. 2 (abraza Łukašenki).

— Niedzie ja napisaŭ «vusaty». Voś heta paličyli abrazaj Łukašenki. A paklopam — toje, što ja napisaŭ, što na vybarach u Biełarusi byŭ zadziejničany administratyŭny resurs, dla taho, kab dasiahnuć nieabchodnych vynikaŭ.

Biełaruskaja milicyja paličyła Alaksandra adzinym stvaralnikam kanałaŭ «Biełaruś za MKADam». Ale mužčyna tłumačyć, što heta nie tak:

— Kali mianie aryštavali, ja byŭ u čacie «Biełaruś za MKADam» — ja sapraŭdy byŭ aktyŭnym udzielnikam i šmat čaho pisaŭ. Adkazvaŭ na kamientary kštałtu «Mačy nacyjanalistaŭ, mačy chachłoŭ». U toj momant čata jašče nie było ŭ śpisie ekstremisckich farmiravańniaŭ — trapiŭ jon tudy ŭžo paśla majho zatrymańnia. Ale zadniaj dataj mnie paviesili toj artykuł. 

Alaksandr kaža, što spačatku jaho sapraŭdy padazravali ŭ stvareńni taho čata, ale ŭ vyniku heta abvierhli.

28 sakavika 2023 hoda ŭkrainca asudzili — dali 5 hadoŭ kałonii. Dla Alaksandra heta stała šokam.

— Ja ž pisaŭ praŭdu, ničoha takoha. Pa zakonie možna było mianie pakarać štrafam ci anulavać dazvoł na žycharstva i vysłać ź Biełarusi. Ale ž zrazumieła, što ludzi, jakija ładzili sudzilišča nada mnoj, vykonvali zahad źvierchu. Tamu i apielacyja maja nie spracavała.

Pavialičyć

Adbyvać pakarańnie nakiravali ŭ kałoniju №17 u Škłovie, dzie Alaksandr i prabyŭ hod i čatyry miesiacy, pakul jaho raptoŭna nie vyzvalili.

— Kažuć ža, što niekali Łukašenka pracavaŭ kantraloram u hetaj kałonii — tamu ciapier jana ŭzorna-pakazalnaja, tudy časta pryjazdžaje kiraŭnictva ź inšych kałonij, kab pieraniać dośvied. Źniešnie ŭsio davoli niabłaha: hazon, vientylavanyja fasady, uvieś čas robicca ramont… Novyja prybiralni, televizary, dobra abstalavany mahazin i pierahavorny punkt. Ale ja nie adnojčy čuŭ, što ŭ inšych kałonijach «ekstremistam» žyć lahčej.

Mužčyna pracavaŭ na vytvorčaści i za ciažkuju pracu, jak i inšyja «ekstremisty», atrymlivaŭ śmiešny zarobak — ad 2 da 15 rubloŭ štomiesiac.

Alaksandr pracavaŭ na šviejnaj vytvorčaści — razhładžvaŭ prasam detali, ź jakich potym šyli vopratku dla rasijskich vajskoŭcaŭ.

Pra toje, što jaho pieradaduć Ukrainie, mužčyna nie viedaŭ da samaha apošniaha momantu. Pačałosia ŭsio z taho, što ŭviečary 20 listapada jamu skazali nie iści na pracu ŭ načnuju źmienu.

Pasiarod nočy Alaksandra adpravili na KPP — zahadali ŭziać z saboj usie rečy.

— U mianie było pryblizna 40 kiłahramaŭ rečaŭ u troch vialikich sumkach. Nie tak daŭno žonka nabyła mnie siertyfikat u kramu (bo hrošy ž mnie nielha było dasyłać) i ja atavaryŭsia — a možna heta było raz na try miesiacy. Razam sa mnoj byŭ jašče adzin ukrainiec, jakoha asudzili pa narkatyčnym artykule. Jamu, darečy, zastavałasia siadzieć usiaho 40 dzion. Nas abšukali i pastavili ŭ «stakan».

Bližej da paŭdnia supracoŭniki kałonii zładzili jašče adzin vobšuk — vykinuli amal usio. Alaksandru dazvolili pakinuć sabie dźvie pary trusoŭ, dźvie pary škarpetak, palčatki, šapku, ciełahrejku, abutak, zubnuju pastu dy ščotku.

— Čałaviek, jaki ładziŭ vobšuk, skazaŭ: «Usio astatniaje vam nie spatrebicca». Bolš ničoha nie tłumačyŭ. Nas adviali na karancin, tam užo było inšaje staŭleńnie: nam prynieśli harbatu, kavu, cyharety dali. Paśla skazali, što nas čakaje etap.

Pavialičyć

Doŭhaja daroha dadomu pačałasia 22 listapada a 2‑j hadzinie nočy. Paśla čarhovaha vobšuku ŭkraincam paviedamili, što ich paviazuć u SIZA dla praviadzieńnia śledčych dziejańniaŭ.

— Nas padviali da biełaha Ford Transit, adzieli naručniki, a na hałovy nakinuli miaški. Paśla hetaha ŭ mianie źjavilisia dumki, što chutčej za ŭsio paviazuć za miažu. Ja raniej čuŭ, što voś tak, ź miaškami na hałovach, ludziej vyvozili ŭ Litvu. To ja razumieŭ, što jedziem ci ŭ Litvu, ci va Ukrainu.

Pa słovach Alaksandra, šlach da kančatkovaha punktu zaniaŭ siem hadzin. Kaža, u niejkim poli sabrałasia šmat mašyn, a ludziej pačali pierasadžvać u busik.

— Razam sa mnoj było čałaviek dzieviać, my razhavarylisia, zrazumieli, što ŭsie ŭkraincy. To-bok užo kančatkova stała jasna, što nas kamuści addaduć. Źniać miaški dazvolili tolki na biełaruska-ukrainskaj miažy. Miaža pustaja, nikoha niama. Nam dali buterbrody padsiłkavacca. Potym ja pabačyŭ vialiki aŭtobus z ukrainskaj simvolikaj. Adtul vyšli śpiecsłužby, snajpiery — šmat ludziej. My pierasieli va ŭkrainski aŭtobus, z nami pačali fatahrafavacca, vitać va Ukrainie.

Vyzvalenych ludziej adrazu pavieźli na abśledavańnie ŭ balnicu.

Pa nazirańniach Alaksandra, siarod 31 čałavieka, kaho adpuściŭ Łukašenka, było 7‑8 čałaviek palitźniavolenych.

• 12
• 0
• 0
• 2
• 0
• 9
• 9
• 0