U Maskvie ŭzarvałasia mašyna supracoŭnika NDI «Rastecha», jaki vyrablaje łaziernyja ŭstanoŭki dla vajskoŭcaŭ
Ranicaj u paniadziełak u Novaj Maskvie ŭzarvałasia mašyna Land Cruiser 200 Prado. Aŭtamabil naležaŭ vučonamu z NDI «Polus» imia Stelmacha. Hety instytut vyrablaje ŭ tym liku łaziernaje abstalavańnie dla rasijskaj armii, piša «Ahientstvo».
Vybuch prahrymieŭ u 9:43 ranicy ŭ dvary doma pa vulicy Radužnaj u Novaj Maskvie (horad Maskoŭski). Aŭtamabil paśpieŭ całkam vyharać, chacia pažarnyja jaho patušyli. Unutry nikoha nie było, i infarmacyi pra paciarpiełych nie pastupała.
Pavodle źviestak Telegram-kanała «112», aŭtamabil naležyć 41‑hadovamu doktaru fizika-matematyčnych navuk i śpiecyjalistu ŭ halinie kvantavaj elektroniki, jaki pracuje ŭ NDI «Polus» imia Stelmacha.
«Maskoŭski kamsamolec» piša, što pierad vybucham uładalnik aŭtamabila źjechaŭ u kamandziroŭku ŭ Paŭdniova-Uschodniuju Aziju.
Telegram-kanał «112» nazyvaje pryčynaj vybuchu dystancyjny prahreŭ ruchavika.
NDI «Polus» imia Stelmacha ŭvachodzić u chołdynh «Švabie» dziaržkarparacyi «Rastech». Instytut zajmajecca łaziernymi technałohijami i kvantavaj elektronikaj, u tym liku abaronnymi technałohijami, i ŭdzielničaje ŭ forumie «Armija» Minabarony.
Siarod raspracovak NDI — łazierny celeŭkazalnik-dalnamier ŁCD-4-1, jaki vykarystoŭvajecca dla vyviedki naziemnych celaŭ i zabieśpiačeńnia stralby artyleryi i avijacyi.
Instytut uniesieny ŭ sankcyjnyja śpisy ZŠA i ES z-za ŭvarvańnia Rasii va Ukrainu.
Z pačatku vajny Ukraina praviała niekalki paśpiachovych zamachaŭ na rasijskich vysokapastaŭlenych vajskoŭcaŭ.
Ciapier čytajuć
Kryk dušy Biaspałava pra Cichanoŭskaha: Jon pieratvarajecca ŭ Łukašenku 2.0, heta trajanski koń52
Kamientary