Si Dzińpin prybyŭ u ZŠA z trochdzionnym vizitam, Tramp asabista sustreŭ jaho ŭ aeraporcie

Prezident ZŠA Donald Tramp vitaŭ svajho kitajskaha kalehu Si Dzińpina pralotam bambavikoŭ i 30‑mietrovaj čyrvonaj darožkaj napiaredadni pačatku ich trochdzionnaha samitu ŭ Vašynhtonie. Tramp asabista sustreŭ staršyniu KNR u aeraporcie, dzie pa lotnym poli maršavym krokam prajšoŭ arkiestr VPS ZŠA, a taksama łunali amierykanski i kitajski ściahi, piša Bi-bi-si.

Prezident ZŠA i pieršaja łedzi Miełanija Tramp vitali Si i jaho žonku Pen Lijuań na abjadnanaj bazie Endrus u štacie Merylend u sieradu ŭviečary.

Čakajecca, što pieršaja pajezdka Si ŭ Vašynhton z 2015 hoda budzie ŭklučać zakrytyja sustrečy, dziaržaŭnuju viačeru i šyrokaje koła pytańniaŭ dla abmierkavańnia — ad štučnaha intelektu da vajny ź Iranam i Tajvania, a taksama padaŭžeńnia handlovaha pieramirja.

Lidar Kamunistyčnaj partyi Kitaja pryziamliŭsia na samalocie Air China ŭ 17:39 pa miascovym časie (00:39 pa Minsku). Hanarovaja varta padyšła da samalota i vystraiłasia pa abodva baki čyrvonaj darožki, kali da trapa padjechali dva limuziny.

Si i Pen pakinuli samalot, paśla čaho dźvie pary abmianialisia pociskami ruk. Jany koratka pahutaryli, a zatym bok ab bok prajšli pa čyrvonaj darožcy i paziravali dla fatahrafij.

Dva B-1 pralacieli nad bazaj, pakul arkiestr vykonvaŭ dziaržaŭny himn ZŠA. Hetyja zvyšhukavyja samaloty źjaŭlajucca važnaj častkaj amierykanskaha bajavoha arsienału.

Paśla abmienu vietlivaściami abiedźvie pary na asobnych aŭtamabilach adpravilisia ŭ Vašynhton.

Sustreča zamiežnaha lidara ŭ aeraporcie prezidentam ZŠA — pieršy taki vypadak za 11 hadoŭ.

Apošni raz tak papu Franciška ŭ 2015 hodzie ŭšanoŭvaŭ Barak Abama. Da hetaha, u 1962 hodzie, prezident Džon Kienedzi sustrakaŭ premjer-ministra Vialikabrytanii Haralda Makmiłana.

Ministr finansaŭ ZŠA Skot Besant užo abviaściŭ, što ZŠA i Kitaj padoŭžać handlovaje pieramirje da studzienia. Termin dziejańnia pahadnieńnia, u miežach jakoha Tramp źniziŭ taryfy na niekatoryja tavary ŭ abmien na źmiakčeńnie Si abmiežavańniaŭ na pastaŭki redkaziamielnych minierałaŭ, pavinien byŭ skončycca 10 listapada.

Besant, jaki vystupiŭ paśla sustrečy ź vice-premjeram Kitaja Che Lifenam, paviedamiŭ, što baki taksama abmierkavali mahčymaść zaklučeńnia ŭ budučyni bolš źmiastoŭnaha handlovaha pahadnieńnia.

U piśmovaj zajavie, apublikavanaj kitajskim dziaržaŭnym infarmacyjnym ahienctvam «Sińchua», Si zajaviŭ, što i Kitaj, i ZŠA «vialikija dziaržavy, a ich narody — vialikija narody».

«Dźvie krainy pavinny być partniorami, a nie supiernikami», — skazaŭ jon.

Miełanija Tramp zajaviła, što niepasredna ŭdzielničała ŭ płanavańni prahramy vizitu. U intervju Fox News jana skazała, što Tramp vyrašyŭ asabista sustreć Si ŭ aeraporcie, «tamu što ŭ ich vydatnyja adnosiny».

Si supravadžajuć člen Pastajannaha kamiteta Palitbiuro partyi Caj Ci, jakoha mnohija ličać jaho pravaj rukoj, vice-premjer Che Lifen, ministr zamiežnych spraŭ Van I, a taksama inšyja vysokija čynoŭniki ź Piekina.

«Ažyćciaŭleńnie vialikaha adradžeńnia kitajskaj nacyi i adradžeńnie vieličy Amieryki mohuć całkam suisnavać, umacoŭvać adno adnaho i prynosić karyść śvietu», — havorycca ŭ zajavie Si, raspaŭsiudžanaj ahienctvam «Sińchua». U joj jon taksama vykazaŭ upeŭnienaść, što vizit «pryniasie plonnyja vyniki».

Nieviadoma, ci pryvioz Si z saboj pradstaŭnikoŭ biźniesu. Prysutnaść kitajskich kampanij u ZŠA taksama moža vyklikać pytańni nakont kitajskaj dziełavoj praktyki, subsidyj i zališnich vytvorčych mahutnaściaŭ, a ŭsio heta zdolnaje pryvieści da bolšaj krytyki i bolšaj kolkaści pytańniaŭ, čym chaciełasia b Si i jaho partyi.

Padčas vizitu Trampa ŭ Piekin u mai jaho supravadžała hrupa kiraŭnikoŭ technałahičnych kampanij ź liku najbujniejšych amierykanskich firmaŭ, uklučajučy Cima Kuka z Apple, Iłona Maska z Tesla i Džensiena Chuanha z Nvidia.

Čakajecca, što kiraŭniki amierykanskich kampanij, jakija pracujuć u śfiery štučnaha intelektu, naviedajuć raskošnuju dziaržaŭnuju viačeru, zapłanavanuju na čaćvier. Vizit Si zavieršycca ŭ piatnicu.

Tramp adkinuŭ niadaŭnija papiaredžańni pradstaŭnikoŭ haliny ab patencyjnych niebiaśpiekach štučnaha intelektu, nazvaŭšy ich «mistyfikacyjaj», u toj čas jak abiedźvie krainy imknucca damahčysia daminavańnia ŭ hetym siektary.

• 1
• 0
• 2
• 0
• 1
• 0
• 1
• 0