Łarysa Dolina tak i nie vyzvaliła kvateru, a čylić z rodnymi ŭ Emiratach
Śpiavačku buduć vysialać z kvatery z udziełam sudovych prystavaŭ.
Advakat Paliny Łurje Śviatłana Śvirydzienka paviedamiła, što artystka tak i nie pieradała im klučy, choć usie terminy ŭžo minuli. Tamu jany napisali zajavu i pieradali spravu sudovym prystavam, piša Mash.
Pradstaŭnik śpiavački zajaviŭ, što Łarysa Alaksandraŭna źjechała adpačyvać da 20 studzienia i ŭsie pytańni buduć vyrašacca paśla.
Pra toje, što zaraz jana adpačyvaje ŭ Abu-Dabi razam z dačkoj i ŭnučkaj, pakupniki daviedalisia z sacyjalnych sietak i byli nadzvyčaj ździŭleny.
Letam 2024 hoda Dolina pad upłyvam machlaroŭ pradała svaju kvateru i pieradała im atrymanyja za jaje 112 młn rasijskich rubloŭ (tady kala 1 młn dalaraŭ). Adnak zatym śpiavačka damahłasia pryznańnia ździełki fiktyŭnaj, i sud kanfiskavaŭ kvateru ŭ pakupnicy Paliny Łurje i viarnuŭ jaje artystcy.
Paśla hetaha śpiavačka sutyknułasia z hramadskim asudžeńniem, a vypadki, kali pradaviec sprabuje asprečyć ździełku, zajaŭlajučy, što staŭ achviaraj machlaroŭ, pačali nazyvać «efiektam Dolinaj».
16 śniežnia 2025 hoda Viarchoŭny sud Rasii pryniaŭ rašeńnie na karyść pakupnicy kvatery Paliny Łurje i pastanaviŭ razhledzieć pytańnie ab vysialeńni śpiavački.
Raniej advakat Łurje Śviatłana Śvirydzienka raskazała, što Dolina paprasiła dazvolić joj zastacca ŭ kvatery da 1 sakavika nastupnaha hoda, ale jaje klijentka admoviła.
Sud abaviazaŭ jaje vysielicca da 13 studzienia.
Kamientary