Były rasijski pradprymalnik źmianiaje praviły hulni ŭ jeŭrapiejskim pieraŭzbrajeńni
U Jeŭropie imkliva nabiraje moc novy vytvorca zbroi, zdolny kinuć vyklik tradycyjnym hihantam abaronnaj pramysłovaści. Kampanija Destinus, zasnavanaja vychadcam z Rasii Michaiłam Kakoryčam, robić staŭku na tannyja i masavyja dalnabojnyja rakiety i drony. Z padrabiaznaściami znajomić Financial Times.
Sučasnaja jeŭrapiejskaja abarona sutyknułasia z surjoznaj prablemaj — krytyčnym niedachopam ułasnych srodkaŭ paražeńnia dalokaha radyusa dziejańnia. Siońnia rehijanalny lidar MBDA vyrablaje rakiety Storm Shadow/Scalp z dalokaściu kala 500 km, adnak ich zapasy zastajucca nizkimi. Mižnarodnaja inicyjatyva Elsa, jakaja abjadnoŭvaje šeść krain dla stvareńnia novych rakietnych sistem, zmoža dać vyniki tolki da 2030‑ch hadoŭ.
Situacyju jašče bolš abvastryła niadaŭniaja admova ZŠA ad płanaŭ raźmiaścić u Hiermanii amierykanskija rakiety Tomahawk. Na hetym fonie ŭ Jeŭropie ŭsio macniej uźnikajuć sumnievy ŭ tym, što kantynient moža i nadalej abapiracca vyklučna na amierykanskuju padtrymku ŭ śfiery dalnabojnych udaraŭ.
Mienavita ŭ hety momant kampanija Destinus, zasnavanaja vychadcam z Rasii Michaiłam Kakoryčam, prapanavała svaju madel — masavyja i adnosna tannyja dalnabojnyja sistemy.
Ad zvyšhukavych samalotaŭ da dalnabojnych rakiet
Kampanija była zasnavanaja ŭ 2021 hodzie dla raspracoŭki zvyšhukavych samalotaŭ, adnak užo praz hod, paśla pačatku poŭnamaštabnaha ŭvarvańnia Rasii va Ukrainu, zrabiła rezki pavarot u bok abaronnaha siektara.
Z taho času Destinus užo vyrabiła tysiačy dalnabojnych dronaŭ i mini-kryłatych rakiet Ruta Block 1, jakija vykarystoŭvajucca jeŭrapiejskimi ŭradami i pastaŭlajucca va Ukrainu. Heta pryviało navat da taho, što rasijskija ŭłady ŭnieśli kampaniju ŭ śpis mahčymych celaŭ.
Nastupnym etapam pavinna stać Ruta Block 2 — sistema z dalokaściu bolš za 700 kiłamietraŭ. Jaje vytvorčaść da kanca hoda płanujuć razharnuć razam ź niamieckim kancernam Rheinmetall, adnym z najbujniejšych vytvorcaŭ zbroi ŭ Jeŭropie. Partniorstva pavinna dać Destinus dostup da bolš mahutnaj vytvorčaj bazy i dapamahčy chutka naroščvać vypusk.
Jašče bolš ambicyjnym prajektam stała Ruta Block 3. Pavodle płanaŭ kampanii, novaja sistema budzie mieć dalokaść da 2000 kiłamietraŭ — bolš, čym amierykanskija Tomahawk, jakija zdolnyja paražać celi prykładna na 1600 kiłamietraŭ. Lotnyja vyprabavańni pavinny pačacca ŭ nastupnym hodzie.
Na dumku ekśpiertaŭ, kampanija maje šaniec zaniać važnaje miesca ŭ jeŭrapiejskim pieraŭzbrajeńni. Śpiecyjalist pa vajskovaj avijacyi ź Mižnarodnaha instytuta stratehičnych daśledavańniaŭ Duhłas Bary (Douglas Barrie) adznačaje, što hałoŭnaj pieravahaj Destinus staŭ realny bajavy dośvied jaje sistem va Ukrainie.
Adnak hałoŭnymi pytańniami zastajucca: jak chutka kampanija zmoža maštabavać vytvorčaść, z kim jany abjadnajucca i adkul voźmuć inviestycyi.
Pavodle Kakoryča, Destinus užo ŭdzielničaje ŭ niekalkich jeŭrapiejskich prahramach pa raźvićci dalnabojnych udarnych sistem, chacia kankretnyja krainy jon nie nazyvaje.
Sakret značnaj tannaści vytvorčaści
Kakoryč tłumačyć zdolnaść Destinus chutka naroščvać abjomy vytvorčaści madellu raźmierkavanaj vytvorčaści i viertykalnaj intehracyjaj.
Kampanija vyrablaje mnohija klučavyja kampanienty samastojna, uklučajučy turbareaktyŭnyja ruchaviki i bojehałoŭki, zamiest taho kab spadziavacca na doŭhi łancužok pastaŭščykoŭ.
Pavodle jaho słoŭ, hetaje rašeńnie było častkova pryniata pad upłyvam razmovy ź Iłanam Maskam u 2012 hodzie padčas naviedvańnia zavoda SpaceX.
U Destinus śćviardžajuć, što taki padychod u pierśpiektyvie dazvolić vypuskać sistemy, jakija buduć «u dziesiać razoŭ tańniejšyja» za tradycyjnyja zachodnija anałahi, chacia sam Kakoryč pryznaje, što dasiahnuć hetaha atrymlivajecca nie zaŭsiody.
Chto taki Kakoryč?
49‑hadovy Michaił Kakoryč nie płanavaŭ budavać abaronnuju impieryju. Jon naradziŭsia ŭ Sibiry ŭ vielmi ścipłych umovach, vyznačaŭsia pośpiechami ŭ fizicy i matematycy i adkryŭ svoj pieršy biznes jašče padčas vučoby ŭ Novasibirskim dziaržaŭnym univiersitecie.
U pačatku 2000‑ch hadoŭ jon stvaryŭ i kupiŭ niekalki roźničnych sietak, paśla čaho zaniaŭsia kaśmičnaj industryjaj. Jaho kampanija Dauria Aerospace stała pieršaj pryvatnaj kaśmičnaj kampanijaj u Rasii. U 2012 hodzie Kakoryč pakinuŭ Rasiju. Jon śćviardžaje, što pryčynaj stała jaho padtrymka apazicyi.
Paśla pierajezdu ŭ ZŠA Kakoryč zasnavaŭ kampaniju Momentus, jakaja zajmałasia kaśmičnaj transpartnaj infrastrukturaj. Prajekt padtrymali viadomyja inviestary, u tym liku aksieleratar Y Combinator. Adnak pierad vychadam kampanii na biržu Kakoryč byŭ vymušany pakinuć pasadu kiraŭnika — častkova z-za prablem amierykanskich rehulataraŭ, źviazanych ź jaho tahačasnym rasijskim hramadzianstvam.
U 2024 hodzie pradprymalnik pahadziŭsia vypłacić hramadzianski štraf u pamiery 2 miljonaŭ dalaraŭ i atrymaŭ piacihadovuju zabaronu zajmać kirujučyja pasady ŭ publičnych kampanijach u miežach pahadnieńnia z Kamisijaj pa kaštoŭnych papierach i biržach ZŠA. Sprava tyčyłasia abvinavačvańniaŭ, źviazanych z raskryćciom infarmacyi kampanijaj. Pry hetym Kakoryč padkreślivaŭ, što nie pryznaŭ svajoj viny.
Paśla pierajezdu ŭ Šviejcaryju jon zasnavaŭ Destinus. Spačatku kampanija zajmałasia raspracoŭkaj technałohij zvyšhukavoha palotu. Ale paśla pačatku vajny va Ukrainie kančatkova pierajšła da vytvorčaści zbroi.
Pierachod da abaronnych prajektaŭ spadabaŭsia nie ŭsim: častka pieršapačatkovych inviestaraŭ vyjšła z prajekta. Adnak ich miesca zaniali novyja inviestary — pieravažna jeŭrapiejskija fondy i siamiejnyja inviestycyjnyja ofisy.
U minułym hodzie štab-kvatera Destinus była pieraniesienaja ŭ Niderłandy. Za čas isnavańnia kampanija pryciahnuła amal 400 miljonaŭ jeŭra, uklučajučy kredytnuju liniju na 50 miljonaŭ jeŭra ad niamieckaha Commerzbank.
Siońnia Destinus maje kala tysiačy supracoŭnikaŭ u niekalkich krainach, užo pracuje z prybytkam i atrymlivaje dachody ŭ sotni miljonaŭ jeŭra. Pavodle krynic Financial Times, kampanija ciapier sprabuje pryciahnuć jašče kala 200 miljonaŭ jeŭra.
Kakoryč, jaki ŭ 2024 hodzie admoviŭsia ad rasijskaha hramadzianstva i staŭ hramadzianinam Hrenady, nie vyklučaje novych bujnych ździełak. Destinus užo supracoŭničaje z bankam Rothschild u pytańniach dalejšaha raźvićcia i pahłynańniaŭ. U minułym hodzie kampanija damoviłasia ab kupli šviejcarskaha startapu Daedalean, jaki raspracoŭvaje aŭtanomnyja sistemy kiravańnia dla avijacyi.
Na dumku Kakoryča, Jeŭropa pakul nie maje pramysłovaha adkazu na maštab udaraŭ, jakija Rasija nanosić pa Ukrainie. I času, kab stvaryć takuju sistemu, zastajecca ŭsio mienš.
Kamientary