Były dyrektar aeradroma «Orša» znajšoŭsia ŭ nabližanaha da Łukašenki biznesmiena
Biznesmien Siarhiej Ciacieryn arhanizavaŭ prytułak dla karupcyjanieraŭ — jon źbiraje zvolnienych čynoŭnikaŭ u svaich prajektach pad Aleksandryjaj, zaŭvažyŭ kanał «Viciebsk, ja hulaju».
Nabližany da Alaksandra Łukašenki biznesmien Siarhiej Ciacieryn praciahvaje pracaŭładkoŭvać byłych kiraŭnikoŭ i čynoŭnikaŭ, jakija stracili pasady praz kryminalnyja spravy.
«Vićbičy» apublikavali materyjał, dzie raskazali, što były dyrektar aeradroma «Orša» Mikałaj Čarvinski ciapier pracuje namieśnikam kiraŭnika SFH «Start TS», jakoje naležyć nabližanamu da Łukašenki Siarhieju Ciacierynu.
Vosieńniu 2025 hoda stała viadoma, što Čarvinski staŭ fihurantam kryminalnaj spravy: jaho vinavacili ŭ vykarystańni padnačalenych na ŭłasnym leciščy. Nieŭzabavie jon byŭ zvolnieny. I voś jon ciapier znajšoŭsia ŭ dobrym miescy.
Ciacieryn užo nie ŭpieršyniu daje prytułak kiraŭnikam z karupcyjnym šlejfam. U jaho rezidencyi pad Kopyśsiu paśpieli trapić były namieśnik staršyni Aršanskaha rajvykankama Andrej Kanstancinaŭ i były dyrektar Hłybockaha MKK Siarhiej Sarahaviec.
Były namieśnik staršyni Aršanskaha rajvykankama Andrej Kanstancinaŭ pracuje ŭ tym ža «Start TS» pamočnikam kiraŭnika. Jon vylecieŭ ź dziaržsłužby i trapiŭ pad kryminalny pieraśled pa karupcyjnym artykule. U 2023 hodzie Kanstancinava sudzili pavodle karupcyjnaha artykuła — jamu dali 4 hady ŭmoŭna. Pry hetym sankcyja hetaha artykuła zvyčajna praduhledžvaje i zabaronu zajmać kiraŭničyja pasady.
Jašče adzin eks-kiraŭnik z kryminalnym šlejfam — były dyrektar Hłybockaha małočnakansiervavaha kambinata Siarhiej Sarahaviec, uznačaliŭ prajekty Ciacieryna ŭ pasiołku Kopyś, jaki aficyjna ličycca radzimaj Łukašenki.
Raniej Sarahaviec vyklikaŭsia ŭ sud pa spravie ab pryčynieńni škody pradpryjemstvu, piša telehram-kanał. Ciapier jon kiruje zarehistravanaj im kampanijaj «Miłkkop start», jakaja spačatku adnaviła pracu miascovaha syrarobnaha zavoda, a niadaŭna adkryła piakarniu.
Kamientary