U Mahiloŭskim zaasadzie pračnuŭsia miadźviedź Fiedzia. Značyć, viasna ŭžo blizka
20 lutaha 2026 hoda ŭ Mahiloŭskim zaasadzie paśla paŭtara miesiaca zimovaj śpiački pračnuŭsia bury miadźviedź Fiedzia, jakoha miascovyja žychary nazyvajuć «sinoptykam». Supracoŭniki zaasada ŭžo kala dziesiaci hadoŭ nazirajuć za jaho pavodzinami i śćviardžajuć, što jon ni razu nie pamyliŭsia z «prahnozam» viasny, paviedamlaje telekanał STB.
Sioleta Fiedzia pajšoŭ u śpiačku 10 studzienia paśla mocnaha śniehapadu, a padčas pieršaj adlihi vyjšaŭ ź biarłohu. Praŭda, ciapier jon jašče ŭsio adno krychu sonny.
Pavodle supracoŭnikaŭ zaasada, za dziesiać hadoŭ Fiedzia ni razu nie «pamyliŭsia»: kali pračynajecca — značyć, chutka paciapleje. Časta jaho abudžeńnie supadaje z Maślenicaj.
Paśla doŭhaha snu miadźviedź maje dobry apietyt. Kab adnavić siły, jamu dajuć pažyŭnuju ježu: piarłovuju kašu, chleb ź miodam, arechi, suchafrukty i syryja jajki.
Jahonaja susiedka — miadźviedzica Jahadka — u hetym hodzie spała tolki kala dvuch tydniaŭ. Dla jaje heta była pieršaja sapraŭdnaja zimovaja śpiačka. Dva hady tamu jaje z bratam znajšli ŭ lesie biez maci: miadźviedzica nie viarnułasia da małych. Brat zastaŭsia ŭ Viciebsku, a Jahadku pryvieźli ŭ Mahiloŭ, dzie jaje vykarmili supracoŭniki. Jana stała ŭlubionkaj naviedvalnikaŭ i navat «śpiavaje» za pačastunak.
Mahiloŭski zaasad — nie tolki miesca dla ekskursij, ale i svojeasablivy centr reabilitacyi žyvioł. Tut žyvuć rysi, jakija źjavilisia paśla hibieli maci padčas pažaru. Jany ŭžo dali niekalki patomstvaŭ.
Kolkaść žyvioł pastajanna raście — ciapier ich kala piacisot. Niadaŭna źjavilisia novyja žychary: karova šatłandskaj parody chajlend, dva straŭsa emu, kienhuru Bienieta i kanadski voŭk. Supracoŭniki płanujuć papoŭnić kalekcyju małpami, a ŭ budučyni — navat viarbludam.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ20
Kamientary