Spahadu da zabitaha Chamieniei vyklikajuć zdymkami jaho nibyta zabitaj unučki. Ale što dakładna viadoma pra hetu historyju?

Ali Chasiejni Chamieniei naradziŭsia 19 krasavika 1939 hoda ŭ Mašchadzie na paŭnočnym uschodzie Irana ŭ relihijnaj siamji. Jaho baćka, ajatała Sajid Džavad Chamieniei, byŭ šyickim bahasłovam azierbajdžanskaha pachodžańnia, maci — Chadydže Mirdamadzi — taksama pachodziła z duchoŭnaha asiarodździa.

Ali ros u šmatdzietnaj siamji: u jaho było try braty i siastra Badry. Apošniaja była zamužam za apazicyjnym dziejačam Ali Tehierani. U 1980‑ia hady paśla kanfliktu z uładami Isłamskaj Respubliki jana razam z mužam pakinuła Iran i apynułasia ŭ vyhnańni (žyła ŭ Iraku, paśla viarnułasia ŭ Iran u 1995 hodzie).

U 1964 hodzie Ali Chamieniei ažaniŭsia z Mansure Chadžaste Bahierzade, jakaja taksama pachodziła z relihijnaj siamji z Mašchada. U adroźnieńnie ad mnohich žonak palityčnych lidaraŭ, jana dziesiacihodździami zastavałasia pa-za publičnaj prastoraj: amal nie źjaŭlałasia ŭ miedyja i nie vykonvała pradstaŭničych hramadskich funkcyj.

Mansure Chadžaste Bahierzade zahinuła paśla ataki na Tehieran. Jana była ciažka paranienaja padčas taho samaha bambavańnia, u jakim zahinuŭ muž, i, pavodle infarmacyi iranskich miedyja, pražyła na dzień daŭžej za jaho.

Pavialičyć

Čym zajmajucca dzieci?

U šlubie z Mansure ŭ Chamieniei naradziłasia šaściora dziaciej — čatyry syny i dźvie dački.

Pieršy syn Mastafa naradziŭsia ŭ 1965-m. Jon staŭ šyickim klerykam. Viadoma, što mužčyna žanaty z dačkoj kansiervatyŭnaha bahasłova Azizały Chašvahta, što ŭmacavała suviazi siamji z tradycyjnymi relihijnymi kołami.

Druhi syn, Madžtaba, naradziŭsia ŭ 1969 hodzie. Jon taksama maje duchoŭnuju adukacyju. Na praciahu mnohich hadoŭ mienavita jaho nazyvali mahčymym pierajemnikam baćki na pasadzie viarchoŭnaha lidara. Madžtaba žanaty z dačkoj Halam-Ali Chadad-Adela, byłoha śpikiera parłamienta Irana. Heta adzin z najbolš značnych šlubnych aljansaŭ unutry kansiervatyŭnaj elity.

Pavialičyć

U studzieni ahienctva Bloomberg paviedamlała, što Madžtaba Chamieniei moža kuryravać značnyja finansavyja aktyvy. U miedyja pieryjadyčna źjaŭlajucca paviedamleńni pra jaho mahčymy dostup da zamiežnych rachunkaŭ i nieruchomaści, adnak aficyjny Tehieran hetu infarmacyju nie paćviardžaje, nazyvajučy jaje prapahandaj. U 2019 hodzie ZŠA ŭviali suprać jaho piersanalnyja sankcyi.

Treci syn, Masud (naradziŭsia ŭ 1974-m), žanaty z dačkoj ajatały Machsiena Charazi. Publičnaj infarmacyi pra jaho dziejnaść vielmi mała, jon trymajecca ŭ cieni.

Małodšy syn, Miejsam, jak i braty, atrymaŭ relihijnuju adukacyju. Jon taksama žanaty. Adnak nijakaj kankretnaj infarmacyi, navat daty jaho naradžeńnia, u adkrytym dostupie niama.

Dočki — Bušra i Chuda — zastajucca całkam niepubličnymi asobami. Miarkujecca, što jany naradzilisia ŭ 1980‑ch hadach. Pra ich siamiejnaje žyćcio viadoma tolki toje, što jany pabralisia šlubam z pradstaŭnikami duchoŭnych i palityčnych elit Irana.

Što viadoma pra ŭnukaŭ?

Dakładnaja kolkaść unukaŭ Ali Chamieniei zastajecca nieviadomaj: ni iranskija ŭłady, ni sam ofis ajatały nie publikavali padrabiaznaj infarmacyi pra jaho naščadkaŭ.

Najbolš časta ŭ mižnarodnych miedyja fihuruje siamja jaho druhoha syna, Madžtaby Chamieniei. U asobnych publikacyjach zhadvajecca, što ŭ jaho troje dziaciej — syny 2007 i 2017 hadoŭ naradžeńnia i dačka — 2013-ha.

Pra dziaciej inšych synoŭ i dačok Chamieniei kankretnych i pravieranych dadzienych u adkrytym dostupie niama, što jašče raz padkreślivaje zakryty charaktar asabistaha žyćcia siamji lidara.

Chto zahinuŭ?

Na fonie apošniaj eskałacyi kanfliktu źjavilisia paviedamleńni iranskich dziaržaŭnych ŚMI pra hibiel svajakoŭ Ali Chamieniei ŭ vyniku ŭdaraŭ pa Tehieranie. Pavodle hetych paviedamleńniaŭ, zahinuli dačka viarchoŭnaha lidara, jaho ŭnučka, a taksama ziać i niaviestka. Adnak kankretnyja imiony, uzrost i dakładnyja abstaviny publična nie ahučvalisia.

Mienavita adsutnaść detalaŭ stvaraje niavyznačanaść. Pakolki ŭ Chamieniei dźvie dački i čatyry syny, biez udakładnieńniaŭ niemahčyma dakładna skazać, pra jakuju halinu siamji idzie havorka.

Kali nasamreč zahinuła dačka i jaje muž, to ŭnučka tearetyčna mahła być ich dziciem. Kali ž paviedamleńnie zakranała siamju adnaho z synoŭ, tady «niaviestka» mahła być žonkaj syna, a ŭnučka — ich dačkoj.

Praŭda, roźnica va ŭzroście ŭ lubym razie vyhladaje vielmi vialikaj — atrymlivajecca, što miž «unučkaj» i «dziadulem» anamalnyja 86 hadoŭ.

Mahčyma, što zahinułaje dzicia nasamreč nie ŭnučka, a praŭnučka, a infarmacyju skazili dla dasiahnieńnia prapahandysckaha efiektu.

Moža być i tak, što nijakaj zahinułaj unučki ŭvohule nie było — u apošnija dni iranskija prapahandysty ŭkidvajuć u internet bieźlič fejkaŭ.

Aficyjnaha paćviardžeńnia kankretnaj viersii niama, i niezaležnyja krynicy pakul nie apublikavali bolš padrabiaznych źviestak.

• 3
• 0
• 4
• 4
• 0
• 0
• 0
• 0